កម្មករ និងសមត្ថកិច្ច ប្រឈមមុខដាក់គ្នា នៅមុខតំបន់សេដ្ឋកិច្ចពិសេស ភ្នំពេញ ខណៈតំណាងកម្មករ ៣នាក់ ត្រូវបានឃាត់ខ្លួន
ដោយ៖ ញឹម សុខន / វិទ្យុ វីអូឌី | ថ្ងៃព្រហស្បតិ៍ ទី2 ខែមករា ឆ្នាំ2014
ការប្រឈមមុខដាក់គ្នារវាងសមត្ថកិច្ចនិងកម្មករនៅតំបន់សេដ្ឋកិច្ចពិសេសភ្នំពេញ នៅព្រឹកថ្ងៃទី០២មករា (រូបថត ញឹម សុខន)
កម្មកររាប់ពាន់នាក់ធ្វើការនៅរោងចក្រជាច្រើនក្នុងតំបន់សេដ្ឋកិច្ចពិសេសភ្នំពេញ កំពុងប្រឈមមុខជាមួយកម្លាំងសមត្ថកិច្ច ខណៈដែលតំណាងកម្មករ ៣នាក់ ត្រូវបានឃាត់ខ្លួននៅព្រឹកថ្ងៃទី០២ខែមករានេះ។
នៅម៉ោង ១០:៣០នាទីព្រឹកថ្ងៃទី០២ខែមករានេះ គេសង្កេតឃើញមានកម្លាំងសមត្ថកិច្ចប្រមាណជាង១០០នាក់ បានចុះទៅកាន់តំបន់សេដ្ឋកិច្ចពិសេសភ្នំពេញ ខណៈកម្មករជាច្រើនពាន់នាក់ បានធ្វើកូដកម្ម ចេញពីរោងចក្រ ឈរត្រៀបត្រានៅតាមដងផ្លូវ បណ្តាលឲ្យមានការប្រឈមមុខដាក់គ្នា។
ខណៈកម្មករនៅតំបន់សេដ្ឋកិច្ចពិសេសភ្នំពេញ ស្រុកអង្គស្នួល ខេត្តកណ្តាល ចេញតវ៉ាជាថ្មីនេះ លោក វន់ ពៅ ប្រធានសមាគមប្រជាធិបតេយ្យនៃសេដ្ឋកិច្ចក្រៅប្រព័ន្ធ បានឲ្យដឹងថា តំណាងកម្មករចំនួន ៣នាក់ ត្រូវបានអាជ្ញាធរឃាត់ខ្លួន ដោយសារពួកគេដឹកនាំកម្មករធ្វើកូដកម្មទាមទារដំឡើងប្រាក់ឈ្នួល ១៦០ដុល្លារក្នុងមួយខែ។ តែជាទោះយ៉ាងណា មន្ត្រីសហជីពរូបនេះ នៅមិនទាន់អាចបញ្ជាក់លំអិតជុំវិញការឃាត់ខ្លួននេះនៅឡើយទេ។
ការផ្ទុះកូដកម្មនៅព្រឹកថ្ងៃព្រហស្បតិ៍ បានធ្វើឡើងជាថ្មីទៀត បន្ទាប់ពីកម្មករនិងសហជីព បានផ្អាកការតវ៉ាមួយថ្ងៃ កាលពីថ្ងៃម្សិលមិញ។ កម្មករនិងសហជីពមួយចំនួន បានបន្តការតវ៉ាឲ្យមានការដំឡើងប្រាក់ឈ្នួលរហូតដល់ ១៦០ដុល្លារ បន្ទាប់ពីពួកគេមិនទទួលយកការបន្ថែមប្រាក់ឈ្នួល ២០ដុល្លារ លើប្រាក់ឈ្នួលចំនួន៨០ដុល្លារ កាលពីឆ្នាំ២០១៣៕
No comments:
Post a Comment