ក្រសួងការងារ ឲ្យបក្សប្រឆាំង និងសហជីពធំៗ បំភ្លឺ ករណីក្រុមយុវជន បំផ្លាញទ្រព្យសម្បត្តិ រោងចក្រ
ដោយ៖ ថុល ស្រីលក្ខណ៍ និង អ៊ឹង ប៊ុនថន / វិទ្យុ វីអូឌី | ថ្ងៃព្រហស្បតិ៍ ទី2 ខែមករា ឆ្នាំ2014
រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ស្នើឲ្យគណបក្សសង្គ្រោះជាតិ និងសហជីពធំៗទាំង៦ ដែលដឹកនាំកម្មករ ប្រជាពលរដ្ឋ ធ្វើបាតុកម្មកន្លងមក ឆ្លើយតបជាលាយលក្ខណ៍អក្សរចំពោះអ្វីដែលក្រសួងនេះ អះអាងថា ក្រុមយុវជនមួយចំនួន បានវាយបំផ្លាញទ្រព្យសម្បត្តិរោងចក្រ។
លិខិតដាច់ដោយឡែកពីគ្នា ចំនួន៧ច្បាប់ របស់ក្រសួងការងារចុះថ្ងៃទី៣១ ខែធ្នូ ឆ្នាំ២០១៣ ផ្ញើជូនគណបក្សសង្គ្រោះជាតិ និងសហជីពទាំង៦នោះ លើកឡើងថា ចាប់ពីថ្ងៃទី២៤ ខែធ្នូ ឆ្នាំ២០១៣ ជនមួយក្រុមអះអាងជាសមាជិកគណបក្សនេះនិងសហជីព បានប្រើអំពើហិង្សា និងបំផ្លិចបំផ្លាញទ្រព្យសម្បត្តិសាធារណៈ និងឯកជន នៅតាមបណ្តារោងចក្រសហគ្រាស។ លិខិតបន្ថែមថា ហិង្សានេះបានធ្វើឲ្យថៅកែរោងចក្រជាជនបរទេសស្វែង រកអន្តរាគមន៍ ពីបណ្តាស្ថានទូតនៅកម្ពុជា។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ មានប្រសាសន៍ថា លោកទទួលបានលិខិតនេះ កាលពីថ្ងៃម្សិលមិញ ហើយលោកនឹងឆ្លើយតបនៅថ្ងៃនេះ។ លោកថា បាតុកររបស់លោកមានច្បាប់ទម្លាប់ត្រឹមត្រូវមិនបានប្រើហិង្សាដូចការអះអាងនោះទេ ៖
ក្រុមសហជីពទាំង៦នោះ មានសហជីពខ្លះ មិនទាន់ទទួលបានលិខិតនេះនៅឡើយទេ។
ប្រធានសហជីពសេរីកម្មករនៃព្រះរាជជាណាចក្រកម្ពុជា លោក ជា មុន្នី បានបញ្ជាក់ថា កម្មករធ្វើបាតុកម្មដោយអហិង្សា មិនមានករណីដូចការលើកឡើងនេះទេ។ លោកបារម្ភថា ក្រុមយុវជនទាំងនោះ អាចជាក្រុមភាគីទី៣ ដែលជួលឲ្យមកអុកឡុក ដើម្បីទម្លាក់កំហុសដាក់កម្មករដែលធ្វើបាតុកម្ម។ លោកទាមទារឲ្យក្រសួងស៊ើបអង្កេតពីបញ្ហានេះឲ្យបានច្បាស់ ៖
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា និងប្រធានសហព័ន្ធសហជីពនៃឧស្សាហកម្មវាយនភណ្ឌកាត់ដេរកម្ពុជា លោកស្រី ម៉ម ញឹម ក៏បដិសេធចំពោះការលើកឡើងថា កម្មកររបស់ពួកគេវាយបំផ្លាញទ្រព្យសម្បត្តិរោងចក្រនោះ ហើយក្រុមសហជីពទាំងនោះអំពាវនាវឲ្យរដ្ឋាភិបាលចាប់ជនដែលប្រព្រឹត្តល្មើសមកផ្តន្ទាទោសតាមច្បាប់។
គណបក្សសង្គ្រោះជាតិ បានដឹកនាំប្រជាពលរដ្ឋរាប់ម៉ឺននាក់ ទាមទារឲ្យបោះឆ្នោតឡើងវិញ និងទាមទារឲ្យលោកនាយករដ្ឋមន្ត្រី ហ៊ុន សែនចុះចេញពីតំណែង។ ស្របពេលគ្នានោះសហជីពចំនួន៦ដឹកនាំកម្មករធ្វើបាតុកម្មទាមទារដំឡើងប្រាក់ឈ្នួលគោល១៦០ដុល្លារ តាំងពីថ្ងៃ ទី២៤ខែធ្នូឆ្នាំ២០១៣ ដោយមិនទទួលយកការសម្រេចដំឡើងប្រាក់ឈ្នួលគោលត្រឹម១០០ដុល្លារ៕
No comments:
Post a Comment