សហជីព តំណាងកម្មករ អះអាង ថា នៅតែបន្ត ទាមទារ ដំឡើងប្រាក់ខែ ១៦០ដុល្លារ
កម្មករបើកបដាទាមទារប្រាក់ខែគោល ១៦០ដុល្លារ នៅក្បែរទីស្ដីការគណៈរដ្ឋមន្ត្រី នៅថ្ងៃទី៣០ ធ្នូ ឆ្នាំ២០១៣។
RFA/Mom Sophon
តំណាងសហជីពកម្មករមួយចំនួនដែលថៅកែរោងចក្រចោទថា ជាអ្នកញុះញង់កម្មករឲ្យធ្វើបាតុកម្មទាមទារប្រាក់ខែគោល ១៦០ដុល្លារ បានឲ្យដឹងថា ការតស៊ូទាមទារប្រាក់ខែនៅតែបន្តធ្វើ មិនមែនចប់ត្រឹមការបាញ់បង្ក្រាបដោយហិង្សាពីសំណាក់អាជ្ញាធរនោះទេ។ តំណាងសហជីពកម្មករទាំងនោះ បានទាមទារឲ្យដោះលែងកម្មករដែលត្រូវគេចាប់ខ្លួនទៀតផង។
លោកស្រី ម៉ម ញឹម និងអ្នកដឹកនាំសហជីពកម្មករផ្សេងទៀត បានឲ្យដឹងថា ការតស៊ូទាមទារប្រាក់ខែនៅតែបន្តទៀត បើសិនជាកម្មករមិនទាន់បានទទួលប្រាក់ខែគោលចំនួន ១៦០ដុល្លារ ដូចការចង់បាន ដើម្បីទប់ទល់ជាមួយថ្លៃទំនិញដែលឡើងជានិច្ចនោះ៖ «យើងនៅតែទាមទារដដែល។ ឥឡូវនេះ យើងឲ្យកម្មករគាត់ផ្អាកចូលធ្វើការសិន ដើម្បីគាត់បើកលុយសិន។ ហើយយ៉ាងណានោះ យើងនឹងប្រជុំជាមួយសហព័ន្ធទាំង៩ ដើម្បីជជែកគ្នាថាត្រូវធ្វើយ៉ាងម៉េចទៀត»។
ចំណែកលោកស្រី យ៉ាង សោភ័ណ្ឌ ប្រធានសម្ព័ន្ធសហជីពកម្ពុជា មានប្រសាសន៍ថា បើពិនិត្យតាមផ្លូវច្បាប់ លោកស្រីបំពេញការងារក្នុងនាមសហជីពការពារប្រយោជន៍កម្មករ គឺពុំមានខុសច្បាប់ឡើយ។ លោកស្រីបានឲ្យដឹងថា លោកស្រីត្រៀមខ្លួនចូលទៅឆ្លើយនៅតុលាការ បើសិនជាមានការកោះហៅទៅបំភ្លឺ៖ «ខ្ញុំរីករាយ និងស្វាគមន៍ទៅ។ ខ្ញុំគិតថា អត់បានធ្វើអីខុសទេ។ ខ្ញុំគិតថា គ្រាន់តែគាំពារកម្មករឲ្យចេះប្រើសិទ្ធិរបស់គាត់ ហើយធ្វើឲ្យគាត់រស់នៅសមរម្យ ហើយចោទប្រកាន់សហជីព ចំណុចនេះខ្ញុំមិនខុសឆ្គងទេ»។
លោក ជា មុនី ប្រធានសហជីពសេរីកម្មករនៃព្រះរាជាណាចក្រកម្ពុជា មានប្រសាសន៍ថា លោកមិនមានការបារម្ភឡើយចំពោះការប៉ុនប៉ងធ្វើការចោទប្រកាន់ចំពោះអ្នកដឹកនាំសហជីពកម្មករ ពីព្រោះការងារសហជីពតែងតែប្រឈមជាមួយថៅកែជាធម្មតា។ លោកថ្លែងថា បើថៅកែឲ្យប្រាក់ខែកម្មករទាប ចាយមិនគ្រប់នោះ វាបណ្ដាលឲ្យកម្មករគ្មានកម្លាំងចិត្តធ្វើការ ហើយផលិតផលបានតិចទៅតាមនោះដែរ។ លោក ជា មុនី បានអំពាវនាវឲ្យអាជ្ញាធរមានសមត្ថកិច្ចដោះលែងកម្មករដែលកំពុងជាប់ឃុំ និងរងគ្រោះដោយសារការបង្ក្រាបដោយហិង្សា៖ «អ្នកទាំងអស់នោះ មិនមានពាក់ព័ន្ធជាមួយអំពើហិង្សាទេ។ ការចាប់ គឺជាការព្រមាន។ តែយើងនៅតែទទូចថា សន្តិភាព យុត្តិធម៌ ត្រូវតែផ្តល់ឲ្យពួកគាត់។ អ៊ីចឹង ត្រូវតែមានការដោះលែងដោយមិនមានបទចោទ ហើយការចាប់មកលើអ្នកដឹកនាំសហជីព និងសមាគមនានា មិនមែនជាដំណោះស្រាយទេ»។
ចំណែក លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា មានប្រសាសន៍ថា ការងារសហជីព គឺជួយកម្មករ។ ដូច្នេះ លោកយល់ថា លោកមិនបានធ្វើអ្វីខុសឡើយ។ លោក អាត់ ធន់ ឲ្យដឹងថា កាលពីថ្ងៃទី៦ មករា សហជីពទាំងអស់បានអំពាវនាវឲ្យកម្មករចូលធ្វើការវិញ ដើម្បីបញ្ចប់ការប្រឈមមុខនឹងការបង្ក្រាបដោយប្រើអំពើហិង្សា ហើយការទាមទារឡើងប្រាក់ខែនៅតែបន្ត ដើម្បីលើកស្ទួយជីវភាពកម្មករ។
លោក អាត់ ធន់ បានអំពាវនាវឲ្យរដ្ឋាភិបាលបង្កើតក្រុមស៊ើបអង្កេតឯករាជ្យ ដើម្បីរកឲ្យឃើញជនដៃដល់ដែលបានបាញ់សម្លាប់កម្មករនៅផ្លូវវ៉េងស្រេង ដើម្បីយកមកផ្ដន្ទាទោសតាមផ្លូវច្បាប់ និងដោះលែងកម្មករ ដែលត្រូវចាប់ខ្លួនដោយសារតវ៉ាទាមទារប្រាក់ខែគោល ១៦០ដុល្លារ៖ «ជាទូទៅពេលនោះ យើងអំពាវនាវឲ្យកម្មករចូលធ្វើការសិន ពីព្រោះពេលនោះ សេចក្តីសម្រេចរបស់រដ្ឋាភិបាលមិនឲ្យធ្វើតទៅទៀតទេ។ អ៊ីចឹង យើងមិនចង់ប្រឈម។ ទី២ អំពើហិង្សាកើតឡើងថ្ងៃទី២ ទី៣ នេះ គឺបណ្ដាលឲ្យមនុស្សស្លាប់ និងរបួស និងមានការចាប់ខ្លួន។ អ៊ីចឹង យើងជំរុញឲ្យរដ្ឋាភិបាលបង្កើតគណៈកម្មការស៊ើបអង្កេតលើរឿងនេះ ដើម្បីរកអ្នកដៃដល់ និងនៅពីក្រោយនោះ យកទៅដាក់ទោសតាមច្បាប់។ ហើយពួកអ្នកជាប់ឃុំនោះ ត្រូវតែដោះលែងដោយគ្មានលក្ខខណ្ឌ»។
ប៉ុន្តែ លោក វ៉ាន់ ស៊ូអៀង ប្រធានសមាគមរោងចក្រកាត់ដេរនៅកម្ពុជា (GMAC) បានមានប្រសាសន៍ថា តំណាងសហជីពកម្មករទាំងអស់នោះមិនអាចនិយាយយករួចខ្លួនបានឡើយ។ លោកបានទាមទារឲ្យសហជីពចំនួន៥ និងសមាគមមួយទទួលខុសត្រូវចំពោះការខូចខាតរោងចក្រនានា និងការខាតបង់ផលិតកម្មទំនិញ ដោយសារមានកូដកម្មបាតុកម្មទាមទារដំឡើងប្រាក់ខែកន្លងមក។ លោកចោទថា កូដកម្មបាតុកម្មរបស់កម្មករនោះ គឺហិង្សា។ តាមការប្រកាសរបស់សមាគមរោងចក្រកាត់ដេរ ការខូចខាតកន្លងមកគិតជាប្រាក់អស់ប្រមាណ ២០០លានដុល្លារ។ លោក វ៉ាន់ ស៊ូអៀង បានបន្ថែមឲ្យដឹងថា សហជីពដែលដឹកនាំឲ្យមានបាតុកម្មតវ៉ានោះ គឺសហជីពដែលមានសំឡេងភាគតិចក្នុងការសម្រេចឡើងប្រាក់ខែ៖ «ពួកគេមិនមែនធ្វើបាតុកម្មគោរពច្បាប់ទេ។ គាត់ធ្វើហិង្សាវាយគេ បានគេចេញកម្លាំងមកការពារ។ បើអត់ការពាររោងចក្រគេបិទ»។
កាលពីថ្ងៃទី៣១ ធ្នូ ក្រសួងការងារ និងបណ្តុះបណ្តាលវិជ្ជាជីវៈ បានចេញផ្សាយសេចក្តីប្រកាសមួយ ឲ្យដឹងថា ប្រាក់ឈ្នួលអប្បបរមាសម្រាប់កម្មករ និយោជិត ផ្នែកវាយនភណ្ឌកាត់ដេរសម្លៀកបំពាក់ និងផលិតស្បែកជើងត្រូវដំឡើងពី ៨០ដុល្លារសហរដ្ឋអាមេរិក ទៅ ១០០ដុល្លារក្នុង១ខែ សម្រាប់ឆ្នាំ២០១៤ បន្ថែមលើប្រាក់អត្ថប្រយោជន៍ផ្សេងៗដែលមានស្រាប់។ ប្រាក់ឈ្នួលអប្បបរមានេះត្រូវអនុវត្តចាប់ពីថ្ងៃទី១ កុម្ភៈ តទៅ។
ប្រភពអង្គការសិទ្ធិមនុស្ស បានឲ្យដឹងថា នៅក្នុងការប៉ះទង្គិច និងបង្ក្រាបកូដកម្មបាតុកម្មកម្មករ កាលពីថ្ងៃទី២ និងទី៣ មករា កន្លងមក រវាងអាជ្ញាធរមានសមត្ថកិច្ច និងកម្មករ បានបណ្ដាលឲ្យមនុស្ស ៤នាក់ស្លាប់ របួសកម្មករជិត ៤០នាក់ របួសកម្លាំងប្រដាប់អាវុធជាង ២០នាក់ និងមានមនុស្សចំនួន ២៣នាក់បានត្រូវចាប់ខ្លួន និងឃុំខ្លួន៕
No comments:
Post a Comment