អង្គការ សិទ្ធិមនុស្ស ស្នើឲ្យ អាជ្ញាធរ ប្រាប់ពីទីតាំង ដែលឃុំខ្លួន សកម្មជនសិទ្ធិមនុស្ស
ដោយ៖ ជន ស្រីណុច និង អ៊ឹង ប៊ុនថន / វិទ្យុ វីអូឌី | ថ្ងៃអង្គារ៍ ទី7 ខែមករា ឆ្នាំ2014
អង្គការសង្គមស៊ីវិល ដែលធ្វើការផ្តោតលើសិទ្ធិមនុស្សនៅកម្ពុជា អំពាវនាវឲ្យអាជ្ញាធរ ប្រាប់ពីទីកន្លែងដែលឃុំខ្លួនតំណាងកម្មករ និងសកម្មជនសិទ្ធិមនុស្ស ដែលត្រូវបានចាប់ខ្លួននៅអំឡុងពេលបង្ក្រាបនៅរាជធានីភ្នំពេញ កាលពីសប្តាហ៍មុន។
សេចក្តីថ្លែងការណ៍រួម របស់អង្គការសង្គមស៊ីវិល ចុះថ្ងៃទី៦ ខែមករា រួមមានអង្គការលីកាដូ និងមជ្ឈមណ្ឌលអប់រំច្បាប់សម្រាប់សហគមន៍ ឲ្យដឹងថា សមាជិកគ្រួសារ មេធាវី និងក្រុមគ្រូពេទ្យឯករាជ្យជំនាញមួយចំនួន ត្រូវបានគេបដិសេធផ្តល់ព័ត៌មានអំពីទីកន្លែង ដែលបានឃុំខ្លួនអ្នកដែលត្រូវបានចាប់ខ្លួនទាំង២៣នាក់ នៅក្នុងក្នុងអំឡុងពេលនៃការបង្ក្រាបយ៉ាងខ្លាំងក្លានៅរាជធានីភ្នំពេញ។ អ្នកដែលត្រូវបានចាប់ខ្លួននោះរួមមាន អ្នកការពារសិទ្ធិមនុស្សចំនួន៣នាក់ គឺលោក វន់ ពៅ លោក ថេង សាវឿន និងលោក ច័ន្ទ ពុទ្ធិស័ក ជាដើម ។ សេចក្តីថ្លែងការណ៍បន្តថា ចាប់តាំងពីអ្នកទាំង២៣នាក់បានចូលក្នុងតុលាការ និងត្រូវបានចោទប្រកាន់ កាលពីថ្ងៃសុក្រ និងសៅរ៍ មិនមានព័ត៌មានថ្មីណាមួយ អំពីទីកន្លែងឃុំខ្លួនអ្នកទាំងនោះ ឬស្ថានភាពសុខភាពរបស់អ្នកទាំងនោះឡើយ ហើយមនុស្សមួយចំនួនដែលឃុំខ្លួននោះត្រូវបានសមត្ថកិច្ចវាយដំយ៉ាងដំណំ។
នាយិការអង្គការសម្ព័ន្ធខ្មែរជំរឿន និងការពារសិទ្ធិមនុស្ស លីកាដូ អ្នកនាង ណាលី ពីឡូក មានប្រសាសន៍ថា អង្គការមានការព្រួយបារម្ភអំពីសុខភាព និងសុវត្ថិភាពផ្ទាល់ខ្លួនរបស់អ្នកដែលត្រូវបានឃុំខ្លួនទាំងនោះ ព្រោះពួកគេមិនបានជួបជាមួយក្រុមគ្រួសារ ឬមេធាវី ជាពិសេសពួកគេមានរបួសទៀត។
ប្រធានក្រុមអ្នកច្បាប់ការពារសិទ្ធិកម្ពុជា លោក សុក សំអឿន មានប្រសាសន៍ថា ការដែលឃុំខ្លួនមនុស្សដោយមិនអនុញ្ញាតឲ្យជួបក្រុមគ្រួសារ ឬគ្រូពេទ្យព្យាបាលបែបនេះ គឺខុសច្បាប់អន្តរជាតិដែលត្រូវបានការពារសិទ្ធិមនុស្ស និងរំលោភសិទ្ធិជនជាប់ចោទ។ លោកបន្តថា បើទោះបីច្បាប់ខ្មែរមិនបានចែងច្បាស់ពីចំណុចទាំងនេះមែន តែក្នុងច្បាប់ព្រហ្មទណ្ឌបញ្ជាក់ថា ក្រុមគ្រួសារមិនអាចជួបជាមួយអ្នកជាប់ឃុំ២៤ម៉ោង តែក្រោយពីនោះគឺត្រូវតែអនុញ្ញាតិឲ្យជួបហើយ <<ប្រសិនជាដូច្នេះ មានន័យថា យើងរំលោភសិទ្ធិសម៉ីខ្លួន ព្រោះជនជាប់ចោទគាត់មានសិទ្ធិ ដើម្បីទំនាក់ទំនងជាមួយគ្រួសារ ការព្យាបាលហើយ ប្រសិនជា ឧបមាថាឥឡូវគាត់មានរបួស ហើយអ្នកដែលឃុំខ្លួនគេនោះ អត់ព្រមព្យាបាល។ តែប្រសិនជាគេឲ្យវេជ្ជបណ្ឌិតទៅមើល វាមិនអីទេ។ ប្រសិនបើយើងទុកចោល ឲ្យគ្នារបួសកាន់តែខ្លាំងឡើង ដូចយើងធ្វើទារុណកម្មមនុស្សអញ្ជឹង ដូចសម័យពីដើម ចាប់វះសាច់ ឬក៏ដុត ហើយដាក់អំបិល ឧទាហរណ៍អញ្ជឹង យើងប្រៀបធៀបដូចគ្នា មានន័យថាយើងធ្វើទារុណកម្មគេហើយ>>។
លោក សុក សំអឿន រិះគន់ថា ភាគច្រើនច្បាប់នៅកម្ពុជាចែងមកការពារតែអាជ្ញាធរ ហើយប្រជាពលរដ្ឋជាអ្នកទទួលរងគ្រោះដោយសារច្បាប់នេះ។
VOD មិនអាចទាក់ទងរដ្ឋមន្ត្រីក្រសួងមហាផ្ទៃលោក ស ខេង និងអ្នកនាំពាក្យក្រសួងមហាផ្ទៃលោ ខៀវ សុភ័គ បានទេ។
កាលពីសប្តាហ៍មុន សមត្ថកិច្ចបានចាប់ខ្លួនមនុស្ស យ៉ាងតិច២៣នាក់ ក្នុងនោះមាន លោក វន់ ពៅ ប្រធានសមាគមឯករាជ្យ នៃសេដ្ឋកិច្ចក្រៅប្រព័ន្ធ លោក ថេង សាវឿន លោក ពុទ្ធិស័ក្កិ ជាសកម្មជនដីធ្លីនិងកម្មករ២០នាក់ទៀត នៅក្នុងការប៉ះទង្គិចគ្នាជាមួយកម្លាំងទ័ពឆ័ត្រយោង៩១១ នៅមុខរោងចក្រយ៉ាកជីន ក្នុងខណ្ឌពោធិសែនជ័យ រាជធានីភ្នំពេញ ខណៈកម្មករ ទាមទារដំឡើងប្រាក់ឈ្នួល១៦០ដុល្លារ៕
No comments:
Post a Comment