សង្គមស៊ីវិល៖ ទីលានប្រជាធិបតេយ្យ កំពុង បម្រើតួនាទី ផ្ទុយពី ឈ្មោះ
ដោយ៖ ពៅ មេត្ដា / វិទ្យុ វីអូឌី | ថ្ងៃសុក្រ ទី10 ខែមករា ឆ្នាំ2014
បាតុករគណបក្សសង្រ្គោះជាតិ តវ៉ានៅទីលានប្រជាធិបតេយ្យ កាលពីកន្លងទៅ/ជន ស្រីណុច
មន្ត្រីអង្គការសង្គមស៊ីវិលដែលធ្វើការពាក់ព័ន្ធសិទ្ធិមនុស្សនិងលទ្ធិប្រជាធិបតេយ្យសម្តែងការខកចិត្តពេលដែលអាជ្ញាធរមិនអនុញ្ញាតឲ្យប្រជាពលរដ្ឋទៅសម្តែងមតិនៅទីលាន ប្រជាធិបតេយ្យ ហើយថាទីលាននោះកំពុងបម្រើតួនាទីផ្ទុយពីឈ្មោះ។
ក្រោយយោធាបង្ក្រាបលើបាតុកររបស់គណបក្សសង្គ្រោះជាតិនៅទីលានប្រជាធិបតេយ្យកាលពីថ្ងៃទី៤ ខែមករាមក នៅទីនោះមិនអនុញ្ញាតឲ្យមានការជួបប្រជុំសម្តែងមតិដូចរាល់ដងទេ។
ប្រធានលេខាធិការដ្ឋានប្រតិបត្តិនៃគណៈកម្មាធិការប្រព្រឹត្តកម្មលោក សួន ប៊ុនស័ក្តិ លើកឡើងថា ការមិនអនុញ្ញាតឲ្យប្រជាពលរដ្ឋដែលមានបញ្ហាទៅសម្តែងមតិកង្វល់របស់ខ្លួន នៅទីលានប្រជាធិបតេយ្យនោះ បានន័យថា ទីលានប្រជាធិបតេយ្យមិនមានន័យសម្រាប់ប្រជាពលរដ្ឋទន់ខ្សោយ ឬអ្នកដែលរងគ្រោះទៀតទេ ៖
ទីលានប្រជាធិបតេយ្យជាកន្លែងសម្រាប់ឲ្យប្រជាពលរដ្ឋ ដែលជួបបញ្ហាក្នុងការរស់នៅ ឬជួបភាពអយុត្តិធម៌ផ្សេងនៅក្នុងសង្គម ហើយមិនមានដំណោះស្រាយអាចទៅសម្តែងពីទុក្ខ កង្វល់របស់ខ្លួនដើម្បីសា្ថប័នពាក់ព័ន្ធបានដឹង។ តែក្រោយការបង្ក្រាបបាតុករគណបក្សសង្គ្រោះជាតិរាប់ពាន់នាក់ ដែលទាមទារឲ្យមានការធ្វើកំណែទម្រង់ការបោះឆ្នោត និងរៀបចំការបោះឆ្នោតកាលពីថ្ងៃទី៤ ខែមករាមក នៅទីនោះមានតែវត្តមានកម្លាំងសមត្ថកិច្ច ដាក់ប្រចាំនៅទាំងថ្ងៃទាំងយប់។
នៅថ្ងៃទី០៩ ខែមករា កម្លាំងនគបាល និងកងរាជអាវុធហត្ថប្រមាណ២០០នាក់ បំបែកក្រុមយុវជន៥នាក់ នៅទីលានប្រជាធិបតេយ្យ ដែលមានបំណងច្រៀងបទភ្លេងជាតិ និងបង្ហាញពីលទ្ធិប្រជាធិបតេយ្យ សេរីភាពបញ្ចេញមតិ និងនយោបាយ។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យ៉ង់ គឹមអេង ថ្លែងថា ទីលានប្រជាធិបតេយ្យជាកន្លែងឲ្យពលរដ្ឋបញ្ចេញមតិដែលត្រូវការពារដោយ រដ្ឋាភិបាល។ លោកបន្តថា បើរដ្ឋាភិបាលបិទការសំដែងមតិក្នុងស្ថានភាពនេះ គឺបង្ហាញពីអសមត្ថភាពក្នុងការគ្រប់គ្រង ៖
ជុំវិញការបង្ក្រាបបាតុករ និងការបិទទីលានប្រជាធិបតេយ្យនេះ លោក កែម ឡី អ្នក ស្រាវជ្រាវការអភិវឌ្ឍន៍ និងជាអ្នកវិភាគបញ្ហាសង្គមយល់ឃើញរដ្ឋាភិបាល និងប្រជាពលរដ្ឋកំពុងដើរផ្ទុយគ្នាក្នុងដំណើរការអនុវត្តលទ្ធិប្រជាធិបតេយ្យ ៖
VOD មិនទាន់អាចសុំការបកស្រាយករណីនេះពីលោក ឡុង ឌីម៉ង់ អ្នកនាំពាក្យសាលារាជធានី ភ្នំពេញបានទេនៅថ្ងៃនេះ ដោយលោកប្រាប់ថា ជាប់រវល់។
កាលពីថ្ងៃទី០៤ ខែមករា នៅក្នុងកិច្ចប្រជុំបន្ទាន់មួយ លោក ប៉ា សុជាតិវង្ស អភិបាលរាជធានីភ្នំពេញ និងជាប្រធានគណៈបញ្ជាការឯកភាពរាជធានីភ្នំពេញ បានដាក់ចេញនូវវិធានការមួយ ដោយឲ្យអាជ្ញាធរខណ្ឌនិមួយៗ ដើរល្បាតឃ្លាំមើល និងពង្រឹងសន្តិសុខនៅមូលដ្ឋានរបស់ខ្លួន មិនឲ្យមានការប្រមូលផ្តុំណាមួយឡើយ។ លោកថា បើមានការប្រមូលផ្តុំណាមួយចាប់ពី១០នាក់ឡើងទៅ ដែលសង្ស័យថា ជាការប្រមូលផ្តុំធ្វើបាតុកម្ម ត្រូវបំបែកភ្លាម ដើម្បីរក្សាសន្តិសុខ សុវត្ថិភាព និងសណ្តាប់ធ្នាប់សាធារណៈ៕
No comments:
Post a Comment