ពលរដ្ឋ បុរីកីឡា ព្រមានហែក្បួន ទៅផ្ទះលោក ស្រីស៊ុយ ស៊ីផាន ដើម្បីទារសំណង
ដោយ៖ ជន ស្រីណុច និង អ៊ឹង ប៊ុនថន / វិទ្យុវីអូឌី | ថ្ងៃសុក្រ ទី3 ខែមករា ឆ្នាំ2014
ពលរដ្ឋរងគ្រោះដីធ្លីនៅបុរីកីឡា អ្នកស្រី ឆាយ គឹមហ៊ន នៅតំបន់បុរីឡា ថ្ងៃទី០៣ ខែមករា ឆ្នាំ២០១៤(រូបភាពដោយ ជន ស្រីណុច)
ពលរដ្ឋរងគ្រោះដីធ្លីនៅ បុរីកីឡា នៅថ្ងៃសុក្រនេះ ព្រមានហែក្បួនទៅផ្ទះលោកកស្រី ស៊ុយ សុផាន និងសាលារាជធានី ដើម្បីជំរុញ ឲ្យដោះស្រាយជម្លោះដីនេះឲ្យបានឆាប់ៗ តាមការសន្យារបស់អាជ្ញាធរ និងទាមទារសំណងក្រុមហ៊ុនដែលបណ្តេញពួកគេចេញ។
ពលរដ្ឋរងគ្រោះដីធ្លីនៅបុរីកីឡា អ្នកស្រី ឆាយ គឹមហ៊ន ថ្លែងក្នុងសន្និសីទសារព័ត៌មាន ថា ពលរដ្ឋនៅទីនោះមានទុក្ខលំបាកខ្លាំង ដោយសារតែបាត់បង់ជម្រកចូលគំរប់ខួបពីរឆ្នាំហើយ ព្រោះតែសាលាក្រុងខុបខិតជាមួយ ក្រុមហ៊ុនផានអ៊ីម៉ិច ធ្វើការអភិវឌ្ឍ។ អ្នកស្រីថ្លែងទាំងទឹកភ្នែក នៅកន្លែងគំនរសំរាមស្អុយរលួយនោះថា កូនៗ និងក្មេងៗនៅទីនោះ បានបាត់បង់ការរៀនសូត្រ រងនូវការរើសអើង ហើយកើតជំងឺទាំងចាស់ទាំងក្មេង <<ធ្វើឲ្យពួកនាងខ្ញុំរស់នៅលំបាកវេទនាខ្លាំងណាស់ មិនត្រឹមតែប៉ុណ្ណោះពួកខ្ញុំរស់នៅលើគំនសម្រាម រស់នៅក្រោមកាំជណ្ដើរគេ ជួលផ្ទះគេ សុំផ្ទះគេស្នាក់នៅ មិនត្រឹមតែប៉ុណ្ណោះទេ ពួកខ្ញុំរស់នៅលំបាក ជាងស្លាប់ទៅទៀត ពួកខ្ញុំលំបាកខ្លាំងណាស់រយៈពេលពីឆ្នាំនេះ បងប្អូនជួយមើលពីទិដ្ឋភាព ដោយសារទង្វើក្រុមហ៊ុនផានអ៊ីម៉ិច ធ្វើឲ្យពួកខ្ញុំរស់នៅដូចឆ្កែដូចឆ្មា សូម្បីតែកូនៗខ្ញុំក៏បាត់ការសិក្សាទាំងស្រុងដែរ មិនត្រឹមតែប៉ុណ្ណោះកូនខ្ញុំតូចៗមិនហ៊ានទៅរៀនទេ ដោយសារអី ដោយសារទង្វើររបស់គ្រូយកថវិការពីគ្នា ដល់ចឹងម្នាក់ៗគ្មានហ៊ានទៅរៀនទេ ដោយគ្មានលុយបង់ គឺអត់បានសិក្សាទាំងអស់។>>
អ្នកស្រីសំណូមពរឲ្យសាលារាជធានី ផ្តល់ជំរកឲ្យពួកគេឲ្យបានឆាប់រហ័ស បើមិនដូច្នោះទេ ពួកគេនឹងហែក្បួនទៅសាលារាជធានី និង ផ្ទះលោកស្រី ស៊ុយ សុផាន ដើម្បីទាមទារដំណោះស្រាយ ។
ពលរដ្ឋរងគ្រោះមួយទៀត អ្នកស្រី ប្រាក់ ស៊ីថា បានយំរៀបរាប់ថា បន្ទាប់ពីក្រុមហ៊ុនផានអ៊ីម៉ិចចូលទៅធ្វើការអភិវឌ្ឍ ធ្វើឲ្យពួកគាត់បាត់បង់ទីជំរក និងមុខរបរ ហើយបានធ្វើឲ្យកូនប្រុសគាត់ម្នាក់ស្លាប់ដោយសារធ្វើចំណាកស្រុករកលុយជួយគ្រួសារ <<ដល់រហូតពេលនេះកូនខ្ញុំធ្វើចំណាក់ស្រុកដល់ប្រទេសថៃ រងគ្រោះដោយសារគ្រោះថ្នាក់ចរាចរណ៍ដោយសារតែក្រុមហ៊ុនផានអ៊ីម៉ិច ដែលបានមកឈូសកំទិចផ្ទះពួកខ្ញុំ ម្លោះហើយពួកខ្ញុំវេទនាណាស់ កូនខ្ញុំបានចាកចេញទៅរកស៊ីនៅប្រទេសថៃ គឺខ្ញុំវេទនាណាស់ កូនក៏ឈឺ ប្ដីក៏ស្លាប់ចោលទៀត។>>
ការទទួចជាថ្មីទៀតរបស់ពលរដ្ឋបុរីកីឡានេះ បន្ទាប់ពីពួកគេ អះអាងថាសាលារាជធានីបានសន្យាកាលពីថ្ងៃទី១៧ ខែធ្នូ ឆ្នាំ២០១៣ថា រយៈពេលពីរខែទៀតនឹងបញ្ចប់ជម្លោះនៅបុរីកីឡា និងបឹងកក់ មិនឲ្យមានការតវ៉ាបន្តទៅទៀតទេ។ អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ មិនខ្វល់នឹងការព្រមានរបស់អ្នកបុរីកីឡាទេ តែលោកថា សូមឲ្យទង្វើរបស់ពួកគាត់ ធ្វើឡើងស្របតាមច្បាប់។ លោកបន្តថា សាលារាជធានីបាននឹងកំពុងគិតគួរដោះស្រាយបញ្ហានេះ តែសូមទុកពេលបន្តិចទៀត <<សូមធ្វើការយោគយល់ ពួកយើងនឹងធ្វើដោះស្រាយជារួម ជាកញ្ចប់តែម្ដង រឿងបងប្អូនប្រជាពលរដ្ឋអ្នកបុរីកីឡាហ្នឹង បានជួបជានឹង ឯកឧត្ដម អភិបាលរួចហើយ គាត់បានជួបគ្នាហើយតើ ហើយគាត់បានយោគយល់ហើយ យល់នូវអ្វីដែលយើងសូមណូមពរទៅរដ្ឋាភិបាល ហើយសូមឲ្យមានការអត់ធ្មត់ ទុកពេលបន្ដិច ឲ្យអាជ្ញាធរយើងធ្វើ ដោយរាល់ថ្ងៃហ្នឹង យើងឃើញស្រាប់ហើយថា ស្ថានភាពនៅរាជធានីភ្នំពេញក្រោយថ្ងៃបោះឆ្នោតតើវាយ៉ាងណា? បាទហើយសុទ្ធតែជាការងារស្នូលធំៗណាស់។>>
នាយកលេខាធិការដ្ឋាននៃក្រុមការងារពិសេសសិទ្ធិលំនៅឋាន លោក សៀ ភារម្យ មានប្រសាសន៍ថា អាជ្ញាធរគួរតែ ជួយអន្តរាគមន៍ពួកគាត់ ឲ្យមានទីលំនៅត្រឹមត្រូវ ដោយសារតែការបណ្តេញចេញនេះឲ្យបានឆាប់ ទើបអាចទប់ស្កាត់ការតវ៉ាធំ។
ក្រុមហ៊ុន ផានអ៊ីម៉ិច របស់លោកស្រី ស៊ុយ សុផាន បានបណ្តេញពលរដ្ឋសហគមន៍បុរីកីឡាចេញតាំងពីថ្ងៃទី១១ ខែមករា ឆ្នាំ២០១២ ហើយបច្ចុប្បន្ន ពលរដ្ឋដែលនៅ មិនទាន់ទទួលបានសំណង ចំនួន ១១៧គ្រួសារ៕
No comments:
Post a Comment