ដោយ ដែន អយុធ្យា / វិទ្យុអាស៊ីសេរី | ២៣ មករា ២០១៤
ប្រធាន សហភាពសហជីព កម្ពុជា និងជាប្រធាន សមាគម គ្រូបង្រៀនកម្ពុជា ឯករាជ្យ
លោក រ៉ុង ឈុន ដឹកនាំ កម្មករ ហែក្បួនបាតុកម្ម នារាជធានីភ្នំពេញ នៅថ្ងៃទី ២៦ ធ្នូ ឆ្នាំ២០១៣ (រូបភាព RFA / Mom Sophon)
មេសហជីព ត្រៀម ដឹកនាំកម្មករ ១ម៉ឺននាក់ ធ្វើកូដកម្ម នៅថ្ងៃ២៦ មករា
មេដឹកនាំសហជីពបានឲ្យដឹងថា នៅថ្ងៃទី២៣ ខែមករា មន្ត្រីសាលារាជធានីបានអញ្ជើញតំណាងសហជីពកម្មករចំនួន ៩ស្ថាប័ន ឲ្យចូលរួមពិភាក្សាលើសំណើសុំធ្វើបាតុកម្មអហិង្សាមានមនុស្សចំនួន ១ម៉ឺននាក់នៅទីលានប្រជាធិបតេយ្យ ថ្ងៃទី២៦ ខែមករា។
អ្នកស្រី យ៉ាង សោភ័ណ្ឌ ប្រធានសម្ព័ន្ធសហជីពកម្ពុជា ស្ថិតក្នុងចំណោមសហជីពផ្សេងទៀត ដែលបានចូលរួមប្រជុំមានប្រសាសន៍ថា សាលារាជធានីមិនអនុញ្ញាតឲ្យមេដឹកនាំសហជីពកម្មករជួបជុំធ្វើបាតុកម្មនៅថ្ងៃទី២៦ ខែមករា ខាងមុខទេ។ ប៉ុន្តែអ្នកស្រីអះអាងថា សហជីពទាំង ៩ស្ថាប័ន នឹងរក្សាជំហរបន្តដឹកនាំកម្មករ និងគ្រូបង្រៀនធ្វើបាតុកម្មអហិង្សាតាមការគ្រោងទុក។
ទាក់ទិនបាតុកម្មនេះ លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ និងប្រធានសហភាពសហជីពកម្ពុជា ក៏បានឲ្យដឹងថា គោលបំណងដឹកនាំធ្វើបាតុកម្មអហិង្សា គឺដើម្បីទាមទារឲ្យតុលាការ ឬរដ្ឋាភិបាលដោះលែងមនុស្សចំនួន ២៣នាក់ ដែលកំពុងជាប់ក្នុងពន្ធនាគារ និងទាមទារដំឡើងប្រាក់ខែគោលកម្មករឲ្យបានសមរម្យ៖ «សូមឲ្យមានការដំឡើងប្រាក់ឈ្នួលជូនកម្មករ កម្មការិនី ឲ្យបាន ១៦០ដុល្លារក្នុង១ខែ និងសុំឲ្យមានការស៊ើបអង្កេតនាំខ្លួនជនដៃដល់ និងអ្នកបញ្ជាយកមកផ្ដន្ទាទោសតាមច្បាប់ ដែលបង្កឲ្យកម្មករស្លាប់ ៤នាក់ និងរងរបួស ៣៧នាក់កាលពីថ្ងៃទី២ និងទី៣ ខែមករា កន្លងទៅនេះ»។
យ៉ាងណាក៏ដោយ លោក ឡុង ឌីម៉ង មន្ត្រីនាំពាក្យសាលារាជធានីភ្នំពេញ ថ្លែងថា សំណើធ្វើបាតុកម្មរបស់មេដឹកនាំសហជីពកម្មករនៅថ្ងៃទី២៦ ខែមករា សាលារាជធានីមិនអនុញ្ញាតទេ ព្រោះការជួបជុំនេះមានមនុស្សច្រើនពេក។
ទោះជាបែបណា មេដឹកនាំសមាគម និងសហជីពកម្មករចំនួន ៩ស្ថាប័ន បានអះអាងថា នឹងរក្សាជំហរប្រមូលផ្តុំគ្នាធ្វើមហាបាតុកម្មអហិង្សានៅទីលានប្រជាធិបតេយ្យ នៅព្រឹកថ្ងៃទី២៦ ខែមករា មិនផ្លាស់ប្ដូរទេ ទោះអាជ្ញាធរបានបដិសេធក្តី។
ទាក់ទិននឹងការទាមទារអោយដោះលែងមនុស្ស ២៣នាក់ ពីពន្ធនាគារត្រពាំងផ្លុងនេះ អាជ្ញាធរធ្លាប់ឃាត់ខ្លួនប្រធានស្ដីទីសមាគមប្រជាធិបតេយ្យនៃសេដ្ឋកិច្ចក្រៅប្រព័ន្ធ លោក សុខ ឈុនអឿង ទៅឃុំអស់មួយយប់ កាលពីថ្ងៃទី១៩ មករា។ ចំណែកប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន និងសកម្មជនដីធ្លីចំនួន ១០នាក់ផ្សេងទៀត ក៏ត្រូវឃាត់ខ្លួនជាច្រើនម៉ោងនៅស្នងការដ្ឋាននគរបាលរាជធានីភ្នំពេញ៕
No comments:
Post a Comment