 |
| Photo: Internet |
ពលរដ្ឋ នៅខេត្តសៀមរាប បារម្ភ ពីបញ្ហាបរិស្ថាន បណ្ដាលមក ពីរោងម៉ាស៊ីន អគ្គិសនី
RFA | 18 Jan. 2014
ក្រុមប្រជាពលរដ្ឋ ជាច្រើនគ្រួសារ នៅភូមិដូនស្វា ឃុំចារឈូក ស្រុកអង្គរជុំ កំពុងសម្ដែង ការព្រួយបារម្ភ ចំពោះ សុខភាព ដោយសារតែ គេ អះអាងថា ជារៀងរាល់ថ្ងៃ រោងម៉ាស៊ីនអគ្គិសនី មួយកន្លែង ដែលដើរ ដោយថា មពលដុតអង្កាម តែងបង្ហុយផេះ ឱ្យអណ្ដែត ពាសពេញ, ព្រមទាំង បញ្ចេញចោល ចំហាយឧស្ម័ន ធ្វើឱ្យប៉ះពាល់ ដល់អ្នករស់នៅ ជុំវិញ។
អ្នកភូមិខ្លះបានឱ្យដឹងថា គេបានតវ៉ាប្រឆាំងនឹងបញ្ហានេះជាច្រើនលើកមកហើយ ក៏ប៉ុន្តែវានៅតែមិនមានដំណោះស្រាយអ្វីឱ្យប្រសើរទេ។
បុរសអ្នកភូមិដូនស្វា នៃឃុំចារឈូក ម្នាក់ក្នុងចំណោមជាច្រើនទៀតដែលកំពុងទទួលរងការប៉ះពាល់នោះ គឺលោក តឿ វឿត។ លោកបានបញ្ជាក់ថា ចាប់តាំងពីមានផេះ និងឧស្ម័នហុយចេញពីរោងម៉ាស៊ីនអគ្គិសនីមក គឺអ្នកភូមិរបស់គាត់ខ្លះមានសុខភាពមិនល្អទេ៖ «មានអារម្មណ៍ ប៉ះពាល់ថាសម្រាកវាមិនបាន ទី១ វាថ្លង់ម៉ាស៊ីន។ ទី២ ផេះវាហុយមកលើផ្ទះលើអី ប្រជាពលរដ្ឋនៅជុំវិញនោះ ហើយធុំក្លិនចំហាយជះទាំងយប់ទាំងថ្ងៃ បើខ្យល់បក់មកអ៊ីចេះ មិនដែលសម្រាកបានទេ។ រស់នៅក្បែរជុំវិញនោះ វាមានបញ្ហា អ្នកខ្លះវិលមុខ អ្នកខ្លះក៏ឈឺគ្រុនទៅ។ អូ! បញ្ហានោះយូរគ្រាន់ ហើយដល់តវ៉ាទៅចៅហ្វាយស្រុកគាត់ថា ចាំសម្របសម្រួលដល់ពេលសម្របសម្រួលទៅ គេថាចាំគេធ្វើឱ្យបាត់ធុំក្លិន បានឮសំឡេងឮអ្វីទៅ ក៏ប្រជាពលរដ្ឋរំខានសម្រាកពួនមិនបានអ៊ីចឹងទៅ។»
កាលពីថ្ងៃទី១៧ ខែមករា តំណាងអ្នកភូមិចំនួន ៣នាក់ បាននាំគ្នាមកទីរួមខេត្តសៀមរាប ដើម្បីសុំឱ្យអង្គការក្រៅរដ្ឋាភិបាលជួយធ្វើពាក្យបណ្ដឹង និងជួយបង្ហាញពីមធ្យោបាយខ្លះៗ ក្នុងការដោះស្រាយទៅលើការប៉ះពាល់ ដែលបណ្ដាលមកពីរោងម៉ាស៊ីនអគ្គិសនីនោះ។
តំណាងអ្នកភូមិដូនស្វា គឺលោក ធាង ថៃ បានមានប្រសាសន៍ថា កាលពីថ្ងៃទី៤ ខែមករា កន្លងទៅ លោកធ្លាប់ដាក់ពាក្យបណ្ដឹងទៅសាលាស្រុកអង្គរជុំ ដើម្បីឱ្យជួយដោះស្រាយការប៉ះពាល់នោះម្ដងមកហើយ ក៏ប៉ុន្តែសាលាស្រុកមិនមានការឆ្លើយតបអ្វីទេ ទើបលោកសម្រេចចិត្តឡើងមកសុំជំនួយផ្នែកច្បាប់ និងពិគ្រោះយោបល់ជាមួយអង្គការក្រៅរដ្ឋាភិបាលវិញ៖ «ដែលខ្ញុំឡើង មកនេះ គឺដាក់ពាក្យបណ្ដឹងមកខាងអង្គការឱ្យអង្គការជួយដោះស្រាយឱ្យ ប្រជាជន។ ដោយដោះស្រាយនៅឯសាលាស្រុកមិនចេញ ខ្ញុំចេះតែស្រាវជ្រាវរកថា ក្រែងលោខាងអង្គការជួយដោះស្រាយឱ្យប្រជាជនបាន។»
ទោះយ៉ាងណា វិទ្យុអាស៊ីសេរី មិនអាចទាក់ទងអ្នកគ្រប់គ្រងរោងម៉ាស៊ីនអគ្គិសនីនៅស្រុកអង្គរជុំ ដើម្បីសុំការពន្យល់ជុំវិញការចោទប្រកាន់របស់ប្រជាពលរដ្ឋបានយ៉ាង ណានៅឡើយទេ។
ចំណែកអាជ្ញាធរមូលដ្ឋានទាំងថ្នាក់ឃុំ និងស្រុក បានទទួលស្គាល់ថា គេបានដឹងអំពីការប៉ះពាល់នេះកើតមានរយៈពេលប្រហែល ២ឆ្នាំមកហើយ ក៏ប៉ុន្តែគេមិនដឹងថានឹងត្រូវដោះស្រាយយ៉ាងណា?
ជំទប់ទី២ ឃុំចារឈូក លោក ហ៊ាន សៀ បានមានប្រសាសន៍ថា មានប្រជាពលរដ្ឋប្រមាណជាង ៤០គ្រួសារ ដែលរស់នៅជុំវិញរោងម៉ាស៊ីនអគ្គិសនីនោះ គឺជាអ្នកទទួលរងការប៉ះពាល់ជាប្រចាំថ្ងៃ។ ទោះយ៉ាងណា លោកជំទប់ទី២បានបញ្ជាក់ថា សាលាឃុំមិនទាន់ដែលបានដោះស្រាយរឿងនោះទេ ដោយសារតែមិនដែលបានទទួលពាក្យបណ្ដឹងពីប្រជាពលរដ្ឋ៖ «វាធុំក្លិន មកបងប្អូនប្រជាពលរដ្ឋ។ គិតទៅវាប៉ះពាល់ច្រើនណាស់ម៉ាចំរ៉ាក់ដងថ្នល់។ អគ្គិសនីនេះ កាលពីដើមមិញ វាប្រើម៉ាស៊ីនចាក់ម៉ាស៊ូតចាក់អី។ ដល់ថ្ងៃនេះ ម៉ាស៊ីនគេមកប្រើដុតអង្កាមបានវាធុំក្លិន។ បើនិយាយទៅ មិនដែលបានប្ដឹងដល់ឃុំទេ បានជាឃុំមិនដឹងថាដោះស្រាយថា យ៉ាងម៉េច។ បើតាមខ្ញុំស្ដាប់តាមកាលពីវេទិកាសេរីនៅក្នុងស្រុក ឃើញបងប្អូនគាត់ឡើងមានវេទិកាសេរីទៅសាលាស្រុក ក៏មិនដឹងដោះស្រាយយ៉ាងណា បានជាខ្ញុំមិនដឹងនិយាយដូចម្ដេច?»
អភិបាលស្រុកអង្គរជុំ លោក រ័ត្ន ជុំ បានទទួលស្គាល់ថា ប្រជាពលរដ្ឋធ្លាប់បានដាក់ពាក្យប្ដឹងមកសាលាស្រុកចំនួន ២-៣លើកមកហើយ ជុំវិញការប៉ះពាល់ ដោយសាររោងម៉ាស៊ីនអគ្គិសនីនេះ ហើយលោកក៏បានរាយការណ៍បន្តទៅសាលាខេត្តសៀមរាប។ លោក រ័ត្ន ជុំ បញ្ជាក់ថា មន្ត្រីសាលាខេត្តសៀមរាប និងមន្ទីរជំនាញពាក់ព័ន្ធ ក៏ធ្លាប់ចុះមកពិនិត្យម្ដងមកហើយ។ ហេតុដូច្នេះ ទើបសាលាស្រុកអង្គរជុំ នៅរង់ចាំការសម្រេចពីថ្នាក់ខេត្ត ថាតើត្រូវដោះស្រាយយ៉ាងណា?
លោក រ័ត្ន ជុំ៖ «រហូតដល់វេទិកាក្រុមប្រឹក្សាខេត្ត បាននិយាយគ្នារួចទៅហើយ។ ខាងខេត្ត ហើយនិងមន្ទីរពាក់ព័ន្ធ គាត់ចុះមកពិនិត្យ។ គេមកមើលម្ដងហើយ ចំពេលដែលម៉ាស៊ីនខូចទៅអត់ដឹងថាក្លិនយ៉ាងម៉េចអីយ៉ាងម៉េច ប៉ុន្តែគេនឹងពិនិត្យមើលលើកទី២ទៀត។ ទាក់ទងនិយាយគ្នាទាំងអស់គេចុះមកពិនិត្យទីតាំងហើយ បើគេមើលទៅឃើញថាវាមិនអាចបន្តដំណើរការទៀតបាន គឺបញ្ឈប់បណ្ដោយ។»
អង្គការក្រៅរដ្ឋាភិបាលកំពុងចាប់អារម្មណ៍ទៅនឹងក្រុមអ្នកភូមិ ដែលសម្ដែងកង្វល់អំពីការប៉ះពាល់សុខភាព ដោយសារតែរោងម៉ាស៊ីនអគ្គិសនីនោះ ហើយថាគេនឹងជួយជ្រោមជ្រែងដល់អ្នកភូមិ ដើម្បីស្វែងរកដំណោះស្រាយ។
អ្នកស៊ើបអង្កេតរបស់សមាគមការពារសិទ្ធិមនុស្សអាដហុក ខេត្តសៀមរាប លោក សួស ណារិន បានមានប្រសាសន៍ថា អង្គការរបស់លោកកំពុងពិនិត្យមើលទៅលើពាក្យបណ្ដឹងរបស់ប្រជាពលរដ្ឋ ហើយកំពុងរិះរកគំនិតសំខាន់ៗជាច្រើន ដើម្បីធ្វើយ៉ាងណាឱ្យអាចជួយអ្នកភូមិបាន។
អ្នកភូមិដូនស្វា បានឱ្យដឹងថា ជារៀងរាល់ថ្ងៃកម្ទេចផេះដុតអង្កាម និងឧស្ម័នក្លិនអាក្រក់ ដែលភាយចេញពីរោងម៉ាស៊ីនអគ្គិសនីនោះ មិនត្រឹមតែធ្វើឱ្យប៉ះពាល់សុខភាព និងរំខានដល់ប្រជាពលរដ្ឋដែលរស់នៅជុំវិញប៉ុណ្ណោះទេ គឺវាថែមទាំងធ្វើឱ្យប៉ះពាល់ទៅដល់មន្ទីរពេទ្យ និងសាលារៀនដែលនៅជិតគ្នានោះដែរ៕
No comments:
Post a Comment