 |
| លោកមេធាវី ជូង ជូងី ផ្ដល់បទសម្ភាសន៍នៅខាងមុខតុលាការខេត្តកណ្ដាល នៅថ្ងៃ១៣ កុម្ភៈ ឆ្នាំ២០១២។ RFA/Sok Serey |
មេធាវី ការពារក្ដី ឲ្យមេដឹកនាំ បក្សប្រឆាំង ស្នើពន្យារពេល ឡើងបំភ្លឺ តាមដីកាកោះ
RFA | 12 Jan. 2014
ការដាក់លិខិតស្នើសុំនេះ ត្រូវបាន លោក ជួង ជូងី បញ្ជាក់ថា ដោយសារលោកជាប់រវល់ចំថ្ងៃដែលមេបក្សប្រឆាំងទាំងពីរចូលឆ្លើយ ពាក់ព័ន្ធនឹងបទចោទថា បានញុះញង់ឲ្យប្រព្រឹត្តបទឧក្រិដ្ឋ ឬប្រព្រឹត្តអំពើបង្កឲ្យមានភាពវឹកវរធ្ងន់ធ្ងរដល់សន្តិសុខសង្គម។
មន្ត្រីនាំពាក្យគណបក្សសង្គ្រោះជាតិ បញ្ជាក់ថា មេធាវីការពារក្ដីឲ្យ លោក សម រង្ស៊ី និងលោក កឹម សុខា បានដាក់លិខិតជាផ្លូវការចូលសាលាដំបូងរាជធានីភ្នំពេញ ដើម្បីស្នើសុំពន្យារពេលចូលបំភ្លឺនៅតុលាការតាមដីកាកោះ។
លោក ញ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ មានប្រសាសន៍នៅថ្ងៃទី១១ ខែមករា ថា លោក ជួង ជូងី មេធាវីការពារក្ដីឲ្យ លោក សម រង្ស៊ី និងលោក កឹម សុខា ប្រធាន និងអនុប្រធានគណបក្សសង្គ្រោះជាតិ បានដាក់លិខិតស្នើសុំពន្យារពេលឡើងឆ្លើយបំភ្លឺ តាមដីកាកោះរបស់តំណាងអយ្យការអមសាលាដំបូងរាជធានីភ្នំពេញរួចហើយ កាលពីថ្ងៃទី១០ ខែមករា។ លោកបន្តថា ការស្នើសុំពន្យារពេលនេះ ហេតុផលពុំមែនជាជម្រើសរបស់ លោក សម រង្ស៊ី និងលោក កឹម សុខា ទេ ក៏ប៉ុន្តែជាភារកិច្ចផ្ទាល់របស់ លោក ជួង ជូងី។
លោក ជួង ជូងី ដែលជាមេធាវីការពារក្ដីឲ្យមេដឹកនាំគណបក្សសង្គ្រោះជាតិ ពុំបានលើកទូរស័ព្ទម្ដងជាពីរដង ដើម្បីឆ្លើយសំណួររបស់វិទ្យុអាស៊ីសេរី ទេ ដោយអ្នកស្និតនឹង លោក ជួង ជូងី ឆ្លើយថា លោកមិនចូលចិត្តផ្ដល់ព័ត៌មានឲ្យប្រព័ន្ធផ្សព្វផ្សាយឡើយ។
បើទោះជាបែបណា លិខិតស្នើសុំពន្យារពេលឆ្លើយបំភ្លឺចុះថ្ងៃទី១០ មករា របស់ លោក ជួង ជូងី បានសរសេរថា ចាប់ពីថ្ងៃទី១៤ រហូតដល់ថ្ងៃទី១៦ មករា លោក ជួង ជូងី ត្រូវចូលរួមនីតិវិធីដេញដោលកូនក្តីរបស់ខ្លួនចំនួន ៣នាក់ នៅចំពោះមុខតំណាងអយ្យការអមសាលាដំបូងខេត្តតាកែវ។ លិខិតបន្តថា ដូចនេះលោកពុំអាចចូលការពារសិទ្ធិឲ្យ លោក សម រង្ស៊ី និងលោក កឹម សុខា នៅចំពោះមុខតំណាងអយ្យការអមសាលាដំបូងរាជធានីភ្នំពេញបានទេ។
វិទ្យុអាស៊ីសេរី ពុំអាចស្នើសុំការបំភ្លឺជុំវិញបញ្ហានេះពី លោក ហៀង សុភ័ក្ត្រ ព្រះរាជអាជ្ញាអមសាលាដំបូងរាជធានីភ្នំពេញ ដែលទទួលបន្ទុកក្នុងសំណុំរឿងនេះបានទេ ដោយទូរស័ព្ទពុំមានអ្នកទទួលនៅថ្ងៃទី១១ មករា។
ចំណែកមន្ត្រីអង្គការសង្គមស៊ីវិល ដែលឃ្លាំការរំលោភសិទ្ធិមនុស្ស ចាត់ទុកថា តំណាងអយ្យការអមសាលាដំបូងរាជធានីភ្នំពេញ គប្បីចាត់វិធានការប្រឆាំងអ្នកប្រើហិង្សា និងអ្នកនៅពីក្រោយខ្នងនៃការបង្ក្រាបក្រុមបាតុករផងដែរ។
បើទោះជាបែបណាក្ដី លោក កឹម សុខា អនុប្រធានគណបក្សសង្គ្រោះជាតិ បញ្ជាក់ជំហរថា រូបលោក និងលោក សម រង្ស៊ី នឹងនៅតែចូលបំភ្លឺតាមដីកាកោះរបស់តុលាការ នៅថ្ងៃទី១៤ ខែមករា ខាងមុខ។ លោក កឹម សុខា ដែលនៅពេលនេះ កំពុងចុះតាមខេត្តជាមួយ លោក សម រង្ស៊ី បន្តថា លោកនឹងរកមេធាវីផ្សេងទៀតក្រៅពី លោក ជួង ជូងី ដើម្បីការពារនៅថ្ងៃចូលបំភ្លឺនោះ។
លោក សម រង្ស៊ី និងលោក កឹម សុខា ប្រធាន និងអនុប្រធានគណបក្សសង្គ្រោះជាតិ ត្រូវបានអយ្យការអមសាលាដំបូងរាជធានីភ្នំពេញ ចេញដីកាកោះឲ្យចូលខ្លួនឆ្លើយបំភ្លឺនៅព្រឹកថ្ងៃទី១៤ ខែមករា។ ដីកាកោះឲ្យចូលខ្លួនឆ្លើយបំភ្លឺដែលខុសត្រូវគ្នាមួយម៉ោងម្នាក់ មេដឹកនាំរបស់ប្រឆាំងត្រូវជាប់សង្ស័យពីបទថា បានញុះញង់ឲ្យប្រព្រឹត្តបទឧក្រិដ្ឋ ឬប្រព្រឹត្តអំពើបង្កឲ្យមានភាពវឹកវរធ្ងន់ធ្ងរដល់សន្តិសុខសង្គម៕
No comments:
Post a Comment