 |
| លោក សម រង្ស៊ី និងលោក កឹម សុខា មេដឹកនាំ គណបក្សសង្គ្រោះជាតិ
ចាប់ដៃគ្នា លើកឡើង ជាកិច្ចស្វាគមន៍ នៅចំពោះមុខសកម្មជន
និងអ្នកគាំទ្រ គណបក្សសង្គ្រោះជាតិ នាខេត្ត បន្ទាយមានជ័យ នៅថ្ងៃទី១១
ខែមករា ឆ្នាំ២០១៤។
RFA/Soun Sophalmony
|
មេដឹកនាំ បក្សប្រឆាំង ប្រកាស បន្តជួបអ្នកគាំទ្រ តាមបណ្ដាខេត្ត ជាច្រើនទៀត
RFI Khmer | 12 Jan. 2014មេដឹកនាំ បក្សប្រឆាំង ប្រកាស បន្តបេសកកម្ម ចុះជួបប្រជាពលរដ្ឋ នៅតាមបណ្ដាខេត្ត ជាច្រើនទៀត ដើម្បី បញ្ជាក់ជូនប្រជាពលរដ្ឋ ឲ្យបានដឹង កាន់តែច្បាស់ អំពីជំហរ របស់ គណបក្សសង្គ្រោះជាតិ ថា, នៅតែ គោរពឆន្ទៈ របស់ ប្រជាពលរដ្ឋ ជាម្ចាស់ឆ្នោត។ លោក សម រង្ស៊ី និងលោក កឹម សុខា អះអាងថា, លោក នឹងបន្តដឹកនាំ ប្រជាពលរដ្ឋ ធ្វើបាតុកម្ម ជាថ្មី ដោយអហិង្សា ដើម្បី ទាមទារ ឲ្យមាន ការបោះឆ្នោត ឡើងវិញ។
សកម្មជន និងអ្នកគាំទ្រគណបក្សប្រឆាំង បានស្នើឲ្យមេដឹកនាំគណបក្សសង្គ្រោះជាតិ រក្សាជំហរក្នុងការគោរពឆន្ទៈប្រជាពលរដ្ឋជាម្ចាស់ឆ្នោត ដែលបានទាមទារឲ្យមានការបោះឆ្នោតវិញ។ ពួកគាត់ព្រមានថា បើពុំដូច្នេះទេ មេដឹកនាំគណបក្សប្រឆាំងទាំងពីររូប គឺលោក សម រង្ស៊ី និងលោក កឹម សុខា នឹងប្រឈមទៅនឹងការបាត់បង់ប្រជាប្រិយភាពរបស់ខ្លួន។
ការទាមទារនេះ គឺកើតមានឡើងក្នុងពិធីជួបជុំគ្នាមួយ រវាងមេដឹកនាំគណបក្សប្រឆាំង និងសកម្មជន រួមទាំងអ្នកគាំទ្រគណបក្សសង្គ្រោះជាតិ ជាច្រើនរយនាក់ កាលពីថ្ងៃទី១១ ខែធ្នូ ឆ្នាំ២០១៤ នៅទីរួមខេត្តបន្ទាយមានជ័យ៖ «ដូច្នេះ សូមទាមទារយកសន្លឹកឆ្នោតមកវិញ តើដោះស្រាយបានឬមិនបាន? សុំឲ្យលោកជួយដោះស្រាយ បើដោះស្រាយមិនបានទេ ប្រជាពលរដ្ឋមិនជឿជាក់ទៅលើ លោក សម រង្ស៊ី និង កឹម សុខា ទេ ព្រោះថា ប្រជាពលរដ្ឋសង្ឃឹមជឿជាក់ទៅលើមេដឹកនាំទាំងពីរហើយ។»
ទន្ទឹមគ្នានេះ អ្នកគាំទ្រទាំងនោះបានលើកឡើងនូវអំពើអយុត្តិធម៌ជាច្រើន ដែលកំពុងកើតមាននៅក្នុងសង្គមកម្ពុជា ក្រោយពីកងកម្លាំងសមត្ថកិច្ចរបស់រដ្ឋាភិបាល ប្រើកាំភ្លើងបាញ់បង្ក្រាបទៅក្រុមបាតុកររោងចក្រកាត់ដេរ និងការវាយបំបែកហ្វូងបាតុកររបស់គណបក្សសង្គ្រោះជាតិ ចេញពីទីលានប្រជាធិបតេយ្យ។
លោកស្រី ស្វាត វ៉ារី ជំទប់ទី២ ឃុំស្រះរាំង ស្រុកមង្គលបុរី ខេត្តបន្ទាយមានជ័យ ថ្លែងថា មានអំពើអយុត្តិធម៌ និងភាពមិនប្រក្រតីជាច្រើនកើតមាននៅក្នុងសង្គមកម្ពុជា។ បញ្ហាទាំងនេះ លោកស្រីជំរុញឲ្យគណបក្សសង្គ្រោះជាតិ ទាមទាររកយុត្តិធម៌មកវិញ៖ «ខ្ញុំចង់ឲ្យគណបក្សសង្គ្រោះជាតិ ប្រឹងប្រែងឡើង ទាមទាររកយុត្តិធម៌សន្លឹកឆ្នោតដែលប្រជាពលរដ្ឋគេបានផ្ញើសេចក្ដីទុក ចិត្តដល់គណបក្សសង្គ្រោះជាតិ ទាមទារយកមកវិញឲ្យខាងតែបាន។ ពួកខ្ញុំចង់បានឲ្យមានការបោះឆ្នោតឡើងវិញក្នុងពេលឆាប់ៗនេះ មិនបាច់ចាំរហូតដល់ ៥ឆ្នាំ ដូចគណបក្សប្រជាជន គាត់ថាបានមានការបោះឆ្នោតឡើងវិញ។ ពួកខ្ញុំអត់ចង់បានទេ គឺចង់បានបោះឆ្នោតក្នុងពេលឆាប់ៗនេះ។»
មេដឹកនាំគណបក្សសង្គ្រោះជាតិ ចាត់ទុកថា នេះជាសារដាស់តឿនមួយរបស់ម្ចាស់ឆ្នោតដែលសុំគណបក្សសង្គ្រោះជាតិ គោរពឆន្ទៈម្ចាស់ឆ្នោត។ នៅចំពោះសកម្មជនគាំទ្រគណបក្សរបស់ខ្លួន លោក កឹម សុខា ជាអនុប្រធានគណបក្សសង្គ្រោះជាតិ ថ្លែងថា គណបក្សប្រឆាំងនៅតែរក្សាជំហររបស់ខ្លួន ក្នុងការទាមទារឲ្យមានការបោះឆ្នោតឡើងវិញ។ គណបក្សនេះក៏មានគម្រោងកែនកម្លាំងធ្វើបាតុកម្ម ដើម្បីទាមទារអោយរដ្ឋាភិបាលដោះលែងសកម្មជនសិទ្ធិមនុស្ស និងកម្មកររោងចក្រដែលកំពុងជាប់ឃុំនៅក្នុងពន្ធនាគារដូចគ្នាដែរ៖ «ខ្ញុំ យល់ឃើញថា ប្រជាពលរដ្ឋនៅតែមានការចាប់អារម្មណ៍មកលើគណបក្សសង្គ្រោះជាតិ។ ប្រជាពលរដ្ឋសង្ឃឹមថា គណបក្សសង្គ្រោះជាតិ នឹងបន្តតស៊ូទៀតដោយមិនព្រមចុះចូលជាមួយគណបក្សប្រជាជន នេះជាការសម្ដែងរបស់គាត់។ អ៊ីចឹងហើយជាលទ្ធផលធ្វើឲ្យមេដឹកនាំគណបក្សសង្គ្រោះជាតិ ដែលស្ដាប់ឮសំឡេងប្រជារាស្ត្រហើយនេះ គឺត្រូវតែមានជំហររឹងប៉ឹង តើប្រជារាស្ត្រចង់បានអី ប្រជារាស្ត្រអត់ចង់ឲ្យយើងខ្លាចចុះចាញ់ចុះចូលទេ។ អ៊ីចឹងរឿងនេះ យើងខ្ញុំនឹងយកទៅដាក់ជូនថ្នាក់ដឹកនាំ ដើម្បីមានជំហរមួយត្រូវ។»
រីឯប្រធានគណបក្សសង្គ្រោះជាតិ លោក សម រង្ស៊ី នៅក្រោយការបញ្ចប់ការថ្លែងសារនយោបាយទៅកាន់អ្នកគាំទ្ររបស់ខ្លួន រួចមក នៅចំពោះអ្នកសារព័ត៌មានជាតិ និងអន្តរជាតិ លោកអះអាងថា គណបក្សសង្គ្រោះជាតិ នៅតែមានគម្រោងដឹកនាំធ្វើបាតុកម្មប្រឆាំងទៅលទ្ធផលឆ្នោតនោះដដែល។ ពេលនេះ ថ្នាក់ដឹកនាំគណបក្សសង្គ្រោះជាតិ នឹងធ្វើដំណើរទៅខេត្តក្រុងជាច្រើនទៀតនៅភាគឦសានក្នុងពេលខាងមុខ ដើម្បីបញ្ជាក់ជំហរជូនប្រជាពលរដ្ឋជាម្ចាស់ឆ្នោត៖ «គម្រោងរបស់ យើង ប្រជាពលរដ្ឋខ្មែរនៅទីណាចង់សម្ដែងមតិ មិនមែនតែអ្នកភ្នំពេញទេ នៅតាមខេត្តក៏គេចង់សម្ដែងមតិដែរ ដូចអស់លោកសារព័ត៌មានបានឃើញមិញ ទឹកចិត្តរបស់ប្រជាពលរដ្ឋខេត្តបន្ទាយមានជ័យ មិនខុសពីទឹកចិត្តរបស់ប្រជាពលរដ្ឋនៅភ្នំពេញ យើងធ្វើនៅភ្នំពេញបាន យើងត្រូវធ្វើនៅតាមបណ្ដាលខេត្តនានាក៏អ៊ីចឹងដែរ។»
នេះជាសារនយោបាយថ្មីថែមទៀតរបស់មេដឹកនាំបក្សប្រឆាំង ផ្ញើទៅអ្នកគាំទ្ររបស់ខ្លួន បន្ទាប់ពីរដ្ឋាភិបាលប្រើកងកម្លាំងសមត្ថកិច្ចបង្ក្រាបការដឹកនាំ ធ្វើបាតុកម្មប្រឆាំងនឹងលទ្ធផលបោះឆ្នោតរួចមក។ បន្ទាប់ពីខេត្តសៀមរាប ខេត្តបន្ទាយមានជ័យ និងខេត្តបាត់ដំបង មេដឹកនាំគណបក្សសង្គ្រោះជាតិ លោក សម រង្ស៊ី និងលោក កឹម សុខា គ្រោងបន្តបេសកកម្មចុះទៅកាន់ខេត្តគោលដៅមួយចំនួនទៀតនៅភាគឦសាន។ ក្នុងនោះ មានខេត្តមណ្ឌលគិរី ខេត្តរតនគិរី ខេត្តស្ទឹងត្រែង និងខេត្តព្រះវិហារ ជាដើម៕
No comments:
Post a Comment