គណបក្ស សង្គ្រោះជាតិ ប្រកាសធ្វើ មហាបាតុកម្ម និងហែក្បួន រាល់ថ្ងៃ ចាប់ពីដើមសប្តាហ៍ក្រោយទៅ
ដោយ៖ ពេជ្រ សុធារី / វិទ្យុវីអូឌី | ថ្ងៃសុក្រ ទី3 ខែមករា ឆ្នាំ2014
បាតុកម្មរបស់គណបក្សសង្គ្រោះជាតិ នៅទីលានប្រជាធិបតេយ្យនាពេលកន្លងមក (រូបថត ពេជ្រ សុធារី)
គណបក្សសង្គ្រោះជាតិ ប្រកាសធ្វើមហាបាតុកម្មអហិង្សានៅទីលានប្រជាធិបតេយ្យ និងហែក្បួនបាតុកម្មដោយសន្តិវិធីជារៀងរាល់ថ្ងៃ ចាប់ពីថ្ងៃទី០៦ខែមករាតទៅ ដើម្បីទាមទារកំណែទម្រង់ការបោះឆ្នោត និងរៀបចំការបោះឆ្នោតឡើងវិញ។
នៅក្នុងលិខិតរបស់តំណាងរាស្ត្រគណបក្សសង្គ្រោះជាតិ ផ្ញើជូនអភិបាលសាលារាជធានីភ្នំពេញ ស្តីពីការជូនដំណឹងពីការបន្តធ្វើមហាបាតុកម្ម និងការហែក្បួនដោយសន្តិវិធី ចុះថ្ងៃទី០៣ខែមករាឆ្នាំ២០១៣ បានឲ្យដឹងថា មហាបាតុកម្មអហិង្សានេះ នឹងចាប់ផ្តើមនៅម៉ោង៧ព្រឹកជារៀងរាល់ថ្ងៃ ចាប់ពីថ្ងៃទី០៦ខែមករាតទៅ នៅទីលានប្រជាធិបតេយ្យ ក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ ដោយមានការសម្តែងមតិរបស់បាតុករ ការសម្តែងសិល្បៈ ចម្រៀង ការបញ្ចាំងខ្សែភាពយន្តឯកសារ និងការដង្ហែក្បួនបាតុកម្មដោយសន្តិវិធី នៅតាមដងផ្លូវនានាក្នុងរាជធានីភ្នំពេញ។
លិខិតដដែលបន្តថា មហាបាតុកម្មនេះ ដឹកនាំដោយលោកសម រង្ស៊ី និងលោកកឹម សុខា ប្រធាននិងអនុប្រធានគណបក្សសង្គ្រោះជាតិ ព្រមទាំងថ្នាក់ដឹកនាំគណបក្សសង្គ្រោះជាតិ ដោយមានបាតុកររាប់ម៉ឺននាក់ចូលរួម។
គណបក្សសង្គ្រោះជាតិ រំពឹងថា សាលារាជធានីភ្នំពេញនឹងជួយសម្រួលទីតាំងមួយចំនួនជុំវិញបរិវេណទីលានប្រជាធិបតេយ្យ និងជួយបង្កលក្ខណៈងាយស្រួល ដើម្បីធានាការពារសន្តិសុខ និងសុវត្ថិភាព ជូនបាតុករដែលចូលរួមក្នុងមហាបាតុកម្មអហិង្សានេះ។
កាលពីថ្ងៃទី២៩ ខែធ្នូ ឆ្នាំ២០១៣ គណបក្សសង្គ្រោះជាតិ បានប្រកាសផ្អាកការដង្ហែក្បួនបាតុកម្ម នៅរាជធានីភ្នំពេញ រយៈពេលមួយសប្តាហ៍ ដោយគ្រាន់ជួបជុំបាតុករសម្តែងមតិដូចសព្វដង៕
No comments:
Post a Comment