ក្រុមប្រឹក្សា សហជីព ស្នើឲ្យ ក្រសួងការងារ ចាត់វិធានការ អ្នកបង្កហិង្សា លើកម្មករ
កងកម្លាំងប្រដាប់អាវុធរដ្ឋាភិបាល ដើរល្បាតតាមផ្លូវវ៉េងស្រេង ក្រោយបាញ់បង្ក្រាបបណ្ដាលឲ្យបាតុករស្លាប់ កាលពីថ្ងៃទី៣ មករា ឆ្នាំ២០១៤។
RFA/Sek Bandith
ប្រធានក្រុមប្រឹក្សាសហជីពជាតិកម្ពុជា លោក សោម អូន បានថ្លែងនៅថ្ងៃទី២២ មករា ថា លោកសុំឲ្យរដ្ឋមន្ត្រីក្រសួងការងារ ចាត់វិធានការតាមច្បាប់ចំពោះមេដឹកនាំសហជីព និងជនដៃដល់ដែលបានប្រព្រឹត្តិអំពើញុះញង់គំរាមកំហែងបង្កហិង្សាមកលើកម្មករ។ លោកបានបញ្ជាក់ថា មេដឹកនាំសហជីពដែលបានប្រព្រឹត្តិញុះញង់កម្មករនោះ គឺមានសហជីពប្រមាណ ៦ ទៅ ៧សហជីព ក្នុងនោះមានដូចជា សហភាពសហជីពកម្ពុជា របស់លោក រ៉ុង ឈុន សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា របស់លោក អាត់ ធន់ សហព័ន្ធសហជីពជាតិនៃឧស្សាហកម្មវាយនភណ្ឌកាត់ដេរកម្ពុជា របស់អ្នកស្រី ម៉ម ញឹម ជាដើម។
ឆ្លើយតបបញ្ហានេះ ប្រធានសហព័ន្ធសហជីពជាតិនៃឧស្សាហកម្មវាយនភណ្ឌកាត់ដេរកម្ពុជា អ្នកស្រី ម៉ម ញឹម បានចាត់ទុកថា ការលើកឡើងដូច្នេះគឺជាការបង្កាច់បង្ខូចសហជីពរបស់អ្នកស្រី។ ហើយអ្នកស្រីមិនខ្លាចចំពោះការចាត់វិធានការផ្លូវច្បាប់ឡើយ។
ក្រៅអំពីការស្នើចាត់វិធានការសហជីពនេះ នៅមានចំណុច ៣ផ្សេងទៀត ដែលក្រុមប្រឹក្សាសហជីពជាតិកម្ពុជា បានដាក់លិខិតទៅរដ្ឋមន្ត្រីក្រសួងការងារ។ ក្រុមប្រឹក្សាសហជីពបានគាំទ្ររដ្ឋាភិបាលក្នុងការបង្កើតគណៈកម្មការសិក្សាស្រាវជ្រាវប្រាក់ឈ្នួលអប្បបរមាសម្រាប់កម្មករនិយោជិក ផ្នែកវាយនភណ្ឌសំលៀកបំពាក់ និងផលិតស្បែកជើង។ ចំណុចមួយទៀត គឺស្នើឲ្យអាជ្ញាធរមានសមត្ថកិច្ចចាត់វិធានការម៉ឺងម៉ាត់ដើម្បីអនុវត្តនីតិវិធីនៃការធ្វើកូដកម្មឲ្យបានត្រឹមត្រូវតាមច្បាប់ការពារសន្តិសុខសង្គម និងការពារកម្មករដែលមានបំណងធ្វើការងារ។ ចំណែកចុងក្រោយសុំឲ្យរដ្ឋមន្ត្រីក្រសួងការងារអន្តរាគមន៍ទប់ស្កាត់អតិផរណាតម្លៃឈ្នួលផ្ទះទឹកភ្លើង ឈ្នួលមធ្យោបាយធ្វើដំណើររបស់កម្មករ និងទំនិញផ្សេងៗ៕
No comments:
Post a Comment