Photo: John Vink

មេធាវី​ លីកាដូ នឹង​សុំ​ ឲ្យ​មនុស្ស​ ៣​នាក់​ នៅ​ក្រៅ​ឃុំ ករណី​ ចាប់ខ្លួន​ ពេល​កម្លាំង​សមត្ថកិច្ច ប៉ះទង្គិច​ ជាមួយ​ កម្មករ​​

ដោយ៖​ ញឹម សុខន​ / វិទ្យុ វីអូឌី | ថ្ងៃព្រហស្បតិ៍ ទី9 ខែមករា ឆ្នាំ2014

​មេធាវី​មកពី​អង្គការ​លីកាដូ ដែល​កំពុង​ការពារ​ក្តី​ឲ្យ​មនុស្ស​២៣​នាក់ ដែល​ត្រូវបាន​ចាប់ខ្លួន​ពេល​មាន​ការប៉ះទង្គិច​រវាង​កម្លាំង​សមត្ថកិច្ច និង​កម្មករ បាន​ស្នើ​សុំឲ្យ​នៅ​ក្រៅ​ឃុំ មនុស្ស​៣​នាក់ ដែល​កំពុង​ជាប់​ឃុំឃាំង​នៅ​មណ្ឌល​អប់រំ​កែប្រែ​ម​៣​ក្នុង​ខេត្ត​កំពង់ចាម។​

​

លោក​មេធាវី ហម ស៊ុន​រិទ្ធិ ដែល​បាន​ទៅ​ជួប​កូន​ក្តី​នៅ​ពន្ធនាគារ​ក្នុង​ខេត្ត​កំពង់ចាម មានប្រសាសន៍ថា លោក​បាន​ដាក់​ពាក្យ​សុំ​ឲ្យ​លោក វ​ន់ ពៅ នៅ​ក្រៅ​ឃុំ​រួចទៅហើយ ដោយសារ​លក្ខខណ្ឌ​សុខភាព​របស់​លោក មាន​សភាព​មិនល្អ ហើយ​ត្រូវ​យក​ទៅ​ព្យាបាល​បន្ត​នៅ​ប្រទេស​ថៃ​​។​លោក​បន្តថា លោក​នឹង​ដាក់​ពាក្យសុំ​មនុស្ស​២​នាក់​ទៀត​ឲ្យនៅ​ក្រៅ​ឃុំ គឺ​ម្នាក់​ជា​តំណាង​សហគមន៍​បឹងកក់ និង​ម្នាក់​ទៀត គឺ​អ្នក​សម្រប​សម្រួល​នៃ​សម្ព័ន្ធ​សហគមន៍​កសិករ​កម្ពុ​ជា លោក ថេង សាវឿន។​

​

ពេទ្យ​អង្គការ​លីកាដូ បានឲ្យដឹងថា ស្ថានភាព​សុខភាព​របស់​ប្រធាន​សមាគម​ប្រជាធិបតេយ្យ​ឯករាជ្យ​នៃ សេដ្ឋកិច្ច​ក្រៅ​ប្រព័ន្ធ លោក វ​ន់ ពៅ នៅ​មណ្ឌល​អប់រំ​កែប្រែ​ម​៣ បាន​ធូរស្រាល​បន្តិច​កាលពី​ថ្ងៃ​ពុធ​។​

​លោក ខាត់ អាន ពេទ្យ​អង្គការ​លីកាដូ មានប្រសាសន៍ថា របួស​នៅ​លើ​ក្បាល​លោក វ​ន់ ពៅ ដែល​បែក​១០​ថ្នេរ នោះ​បាន​កាត់ចេញ​៣​ថ្នេ​រហើយ​។ លោក ខាត់ អាន ក៏​បានឲ្យដឹង​ទៀត លោក វ​ន់ ពៅ នៅ​មាន​ស្នាមរបួស​មួយចំនួន​ទៀត​នៅ​លើ​ដងខ្លួន​ផងដែរ​។​លោក វ​ន់ ពៅ ក៏​បាន​អំពាវនាវ​អង្គការ​សង្គម​ស៊ីវិល​ធ្វើការ​ពាក់ព័ន្ធ​សិទ្ធិមនុស្ស​ជួយ​អន្តរាគមន៍ ផ្លូវ​ច្បាប់​ជួយ​រូប​លោក​ផង​។​

​លោក ថេង សាវឿន អ្នកសម្របសម្រួល​នៃ​សម្ព័ន្ធ​សហគមន៍​កសិករ​កម្ពុ​ជា ដែល​សមត្ថកិច្ច​ចាប់​ទៅ​ជាមួយ​លោក វ​ន់ ពៅ ដែរនោះ ក៏​មាន​របួស​បែកក្បាល​៧​ថ្នេរ និង​មាន​របួស​នៅលើ​ខ្លួន​មួយចំនួន​ទៀត​ដែរ​។​

​កាលពី​ថ្ងៃ​ទី​២ និង​ទី​៣ ខែ​មករា សមត្ថកិច្ច​បាន​បង្ក្រាប​លើក​ម្មករ ដែល​តវ៉ា​ទាមទារ​ដំឡើង​ប្រាក់​ឈ្នូល​នៅ​តំបន់​សេដ្ឋកិច្ច​ពិសេ​ស​ភ្នំពេញ និង​នៅ​សួន​ឧស្សាហកម្ម​កាណាឌីយ៉ា ដែល​បណ្តាលឲ្យ​កម្មករ​៥​នាក់​ស្លាប់ ​៤០​នាក់​រងរបួស និង​២៣​នាក់​ត្រូវ​ចាប់ខ្លួន​ទៅ​ឃុំ​នៅ​មណ្ឌល​អប់រំ​កែប្រែ​ម​៣ ក្នុង​ខេត្ត​កំពង់ចាម​៕