ការិយាល័យ សិទ្ធិមនុស្ស អង្គការ សហប្រជាជាតិ ជំរុញ ឲ្យមាន ការស៊ើបអង្កេត យ៉ាងហ្មត់ចត់ លើករណី ស្លាប់កម្មករ នៅផ្លូវវ៉េងស្រេង
ដោយ៖ ស៊ុន ណារិន / វិទ្យុ វីអូឌី | ថ្ងៃពុធ ទី8 ខែមករា ឆ្នាំ2014
អ្នកនាំពាក្យឧត្តមស្នងជាន់ខ្ពស់ការទទួលបន្ទុកសិទ្ធិមនុស្សរបស់អង្គការសហប្រជាជាតិ លោក Rupert Colville/រូបភាពពីwww.un.org
ការិយាល័យ សិទ្ធិមនុស្ស អង្គការ សហប្រជាជាតិ កាលពីថ្ងៃអង្គារ សម្តែងការព្រួយបារម្ភ យ៉ាងខ្លាំង ពីអ្វីដែល ហៅថាការប្រើប្រាស់ មិនសមរម្យ នៃកម្លាំង ពីសំណាក់មន្ត្រីអនុវត្តច្បាប់ ដោយជំរុញ ឲ្យអាជ្ញាធរ និងកម្លាំង សន្តិសុខ ប្រើការអត់ធ្មត់ដល់កម្រិត។
តាមការដកស្រង់សម្តីនៅលើគេហទំព័រwww.un.org អ្នកនាំពាក្យឧត្តមស្នងជាន់ខ្ពស់ការទទួលបន្ទុកសិទ្ធិមនុស្សរបស់អង្គការសហប្រជាជាតិ លោក Rupert Colvilleមានប្រសាសន៍ថា អង្គការសហប្រជាជាតិ ស្នើឲ្យអាជ្ញាធរកម្ពុជា ចាប់ផ្តើមការជំរុញ និងការស៊ើបអង្កេតយ៉ាងស៊ីជម្រៅ ដើម្បីធានាការទទួលខុសត្រូវយ៉ាងពេញលេញនៃសមាជិកកងកម្លាំងសន្តិសុខ ដែលត្រូវបានរកឃើញថាប្រើប្រាស់កម្លាំងមិនសមរម្យ និងលើសលប់។
កាលពីថ្ងៃទី០៣ខែមករា មនុស្ស៥នាក់ បានស្លាប់ និងរាប់សិបនាក់ទៀតរងរបួស ដោយសារការប៉ះទង្គិចជាមួយកម្លាំងសមត្ថកិច្ចនៅលើផ្លូវវ៉េងស្រេង ខាងមុខសួនឧស្សាហកម្មកាណាឌីយ៉ា។
ការិយាល័យសិទ្ធិមនុស្សអង្គការសហប្រជាជាតិ ក៏បានជំរុញឲ្យអាជ្ញាធរកម្ពុជា ក្នុងការអនុញ្ញាតឲ្យអ្នកដែលមិនអាចទាក់ទងគ្រួសារបាន ឲ្យមានការជួបគ្រួសារ តំណាងអ្នកច្បាប់ និងប្រសិនបើត្រូវការ ឲ្យអ្នកទាំងនោះ ទទួលបានសេរវាថែរក្សាសុខភាព។ ការិយាល័យសិទ្ធិមនុស្សអង្គការសហប្រជាជាតិ ក៏បានជំរុញឲ្យមានការដោះលែងជាបន្ទាន់ ប្រសិនបើត្រូវបានរកឃើញថាមិនប្រព្រឹត្តខុសច្បាប់៕
No comments:
Post a Comment