មេធាវី ទទួលព័ត៌មាន ក្រៅផ្លូវការថា លោក វន់ ពៅ ជាប់ឃុំ នៅពន្ធនាគារ ត្រពាំងថ្លុង ខេត្តកំពង់ចាម
ដោយ៖ ឡាយ សាមាន / វិទ្យុ វីអូឌី | ថ្ងៃចន្ទ ទី6 ខែមករា ឆ្នាំ2014
មេធាវីការពារ លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ឲ្យដឹងនៅរសៀលថ្ងៃចន្ទនេះថា លោកបានទទួលព័ត៌មានក្រៅផ្លូវការថា កូនក្តីរបស់លោកកំពុងជាប់ឃុំ នៅមណ្ឌលអប់រំកែប្រែទី៣ ឬពន្ធនាគារត្រពាំងថ្លុង ក្នុងខេត្តកំពង់ចាម។
លោក វន់ ពៅ និងសកម្មជនសហជីពកម្មករចំនួន៩នាក់ផ្សេងទៀត ត្រូវបានសមត្ថកិច្ចចាប់ខ្លួន កាលពីថ្ងៃទី២ ខែមករា អំទ្បុងបាតុកម្មទាមទារដំទ្បើងប្រាក់ឈ្នួលអប្បបរមារបស់កម្មករ និងប្រាក់បៀវត្សរ៍មន្ត្រីរាជការ។ អយ្យការអមសាលាដំបូងរាជធានីភ្នំពេញ បានចោទលោក និងសកម្មជនសហជីពកម្មករទាំង៩នាក់ ពីបទហិង្សាដោយចេតនា និងបំផ្លិចបំផ្លាញទ្រព្យសម្បត្តិអ្នកដទៃ។
លោកមេធាវី ជូង ជូងី ឲ្យដឹងថា លោកកំពុងស្វែងរកព័ត៌មានផ្លូវការ មុននឹងដាក់លិខិតទៅក្រសួងមហាផ្ទៃ ដើម្បីទៅជួបកូនក្តីសួរពីស្ថានភាពរបស់កូនក្តី និងមានចំណាត់ការផ្លូវច្បាប់ជុំវិញការឃុំខ្លួនកូនក្តីលោក។
អគ្គនាយកនៃអគ្គនាយកដ្ឋានពន្ធនាគារក្រសួងមហាផ្ទៃ លោក គុយ ប៊ុនសន ប្រាប់VODថា លោកមិនស្គាល់លោក វន់ ពៅទេ។ លោក ថា ទាល់តែលោកបើកបញ្ជីអ្នកជាប់ឃុំ ទើបលោកអាចដឹងពីរឿងនេះ៕
No comments:
Post a Comment