លោក ស ខេង ជួបជាមួយ មន្ត្រីទូត ប្រចាំកម្ពុជា
ដោយ៖ តាំង វីដា / វិទ្យុ វីអូឌី | ថ្ងៃចន្ទ ទី6 ខែមករា ឆ្នាំ2014
លោក ស ខេង រដ្ឋមន្ត្រីក្រសួងមហាផ្ទៃ (រូបភាពដោយ តាត ឧត្តម)
រដ្ឋមន្ត្រីក្រសួងមហាផ្ទៃ លោក ស ខេង នៅល្ងាចម៉ោង៥ ថ្ងៃចន្ទនេះ បានជួបជាមួយមន្ត្រីទូតប្រចាំនៅប្រទេសកម្ពុជាមួយចំនួន នៅឯក្រសួងមហាផ្ទៃ។
កិច្ចប្រជុំនេះ អ្នកសារព័ត៌មាន មិនត្រូវបានអនុញ្ញាតឲ្យចូលរួមទេ លើកលែងតែទូរទស្សន៍ជាតិកម្ពុជាតែប៉ុណ្ណោះ។អ្នកសារព័ត៌មាន ត្រូវបានអ្នកយាម ប្រាប់ឲ្យទៅវិញ និងថាមិនមានសន្និសីទសារព័ត៌មានជាផ្លូវការទេ។រថយន្តមន្ត្រីទូតសំខាន់ បានចតនៅក្រសួងមហាផ្ទៃ ដូចជាទូតអាមេរិក បារាំង ជប៉ុន ចិន វៀតណាម ឥណ្ឌា ប៉ាគីស្ថាន អាល្លឺម៉ង់ និងថៃជាដើម។
មិនទាន់មានសេចក្តីរាយការណ៍ថាតើកិច្ចប្រជុំនោះ នឹងលើកយកពីបញ្ហាអ្វីនោះ តែបញ្ហាថ្មីៗដែលកំពុងកើតឡើងនៅកម្ពុជា គឺអំពើហិង្សា និងការបង្ក្រាបរបស់កម្លាំងសមត្ថកិច្ចទៅលើកម្មកររោងចក្រនៅផ្លូវវ៉េងស្រេង ដែលបណ្តាលឲ្យមនុស្សយ៉ាងតិច៥នាក់ស្លាប់ និងការបង្ក្រាបបាតុកររបស់គណបក្សសង្គ្រោះជាតិ កាលពីថ្ងៃទី០៤ខែមករា។
ចំណែកអ្នកនាំពាក្យរងនៃក្រសួងការបរទេសសហរដ្ឋអាមេរិក លោកស្រី Marie Harf មានប្រសាសន៍កាលពីសប្តាហ៍មុនថា សហរដ្ឋអាមេរិក សោកស្តាយយ៉ាងខ្លាំងចំពោះការបាត់បង់ជីវិត មនុស្សនៅក្នុងប្រទេសកម្ពុជា អំឡុងពេលការប៉ះទង្គិចគ្នាដោយហិង្សារវាងបាតុករ និងកងកម្លាំងសន្តិសុខរបស់រដ្ឋាភិបាល។លោកស្រីបញ្ជាក់ថា«យើងថ្កោលទោសចំពោះការប្រើប្រាស់ហិង្សាយកមកធ្វើជាមធ្យោបាយក្នុង ការសម្រេចនូវគោលដៅនយោបាយឬអ្វីៗផ្សេងទៀត ហើយទទូចឲ្យគ្រប់ភាគីទាំងអស់ខិតខំអត់ធ្មត់ ជាអតិបរិមានិង បង្ហាញនូវការគោរពច្បាប់»៕
I hope that MR MARKINTOS The US Ambassador will not take communist doctrine from busted SAR KHENG to AMERICA when he leave cambodia.
ReplyDelete