 |
|
កម្មករ ដែលរងរបួស ដោយកម្លាំង ចម្រុះប្រើហិង្សា បង្ក្រាបពេល
ផ្ទុះហិង្សា នៅតាមបណ្ដោយផ្លូវ វ៉េងស្រេង
សម្រាកព្យាបាល ក្នុងមន្ទីរពេទ្យ មិត្តភាពសូវៀត ហៅមន្ទីរពេ ទ្យរុស្ស៊ី
កាលពីថ្ងៃ ទី៣ ខែមករា ឆ្នាំ២០១៤។
RFA/Tep Soravy
|
ពលរដ្ឋខ្មែរ អាមេរិកាំង ជំរុញ ឲ្យអាមេរិក បញ្ឈប់ការរំលោភ សិទ្ធិមនុស្ស នៅកម្ពុជា
RFA | 12 Jan. 2014
ពលរដ្ឋខ្មែរ-អាមេរិកាំង ក្នុងរដ្ឋ មួយចំនួន នៅសហរដ្ឋអាមេរិក ប្រតិកម្ម យ៉ាងខ្លាំង ចំពោះ ទង្វើអមនុស្សធម៌ និងព្រៃផ្សៃ របស់ ក្រុមអាជ្ញាធរចម្រុះ រដ្ឋាភិបាល ដែលបានបាញ់រះ លើក្រុមកម្មករ កាលពីថ្ងៃទី២ និងទី៣ ខែមករា បណ្ដាល ឲ្យមនុស្សយ៉ាងតិច ៤នាក់ស្លាប់ រងរបួស ប្រមាណ៤០នាក់ ព្រមទាំង ចាប់ខ្លួនកម្មករ និងសកម្មជន សិទ្ធិមនុស្ស ជាង២០នាក់ទៀត ដាក់ពន្ធនាគារ។
ពួកគេ បានជំរុញឱ្យសហគមន៍អន្តរជាតិ ជាពិសេសសហរដ្ឋអាមេរិក ត្រូវធ្វើអន្តរាគមន៍ជាបន្ទាន់ ដើម្បីបញ្ឈប់ការរំលោភសិទ្ធិមនុស្សធ្ងន់ធ្ងរនៅកម្ពុជានេះ។ បន្ថែមពីនេះ ពលរដ្ឋខ្មែរ-អាមេរិកាំងទាំងនោះ បានធ្វើបាតុកម្មតវ៉ាជាបន្តបន្ទាប់ និងព្យាយាមទាក់ទងជាមួយថ្នាក់ដឹកនាំក្នុងរដ្ឋរបស់ខ្លួន រួមមានសមាជិកព្រឹទ្ធសភា តំណាងរាស្ត្រ និងអភិបាលរដ្ឋជាដើម ដើម្បីឲ្យគេបានដឹងពីស្ថានភាពលំបាកវេទនារបស់ប្រជាពលរដ្ឋខ្មែរ ក្រីក្រដែលតវ៉ាបញ្ហារំលោភដីធ្លី និងការទាមទារដំឡើងប្រាក់ឈ្នួលរបស់កម្មករ កម្មការិនី ឲ្យបាន ១៦០ដុល្លារក្នុងមួយខែ។
ពលរដ្ឋខ្មែរ-អាមេរិកាំងម្នាក់រស់នៅក្នុងរដ្ឋវឺជីនៀ (Virginia) អ្នកស្រី ជា ម៉ារី ដែលបានតាមដានព្រឹត្តិការណ៍នៅកម្ពុជា បានថ្លែងថា អ្នកស្រីមិនត្រឹមតែធ្វើបុណ្យឧទ្ទិសកុសលដល់កម្មករស្លាប់កាលពី ថ្ងៃសៅរ៍ ទី១១ ខែមករា នៅវត្តធម្មរង្សី ឬវត្តកម្ពុជាក្រោម ប៉ុណ្ណោះទេ ក្រុមអ្នកស្រីក៏បានរៃអង្គាសប្រាក់យកទៅជួយឧបត្ថម្ភដល់ក្រុម គ្រួសារអ្នកស្លាប់ និងអ្នករងរបួសដែលកំពុងព្យាបាលនៅមន្ទីរពេទ្យផងដែរ។
អ្នកស្រីក៏បានអំពាវនាវសុំឲ្យពលរដ្ឋខ្មែរនៅក្រៅប្រទេសទាំង អស់សាមគ្គីគ្នា ដើម្បីគាំទ្រដល់ខ្មែរនៅក្នុងប្រទេសដែលកំពុងរងការគាបសង្កត់ធ្វើ បាបគ្រប់បែបយ៉ាងពីសំណាក់អាជ្ញាធរលោក ហ៊ុន សែន៖ «សូមឲ្យ តំណាងរាស្ត្រនិងព្រឹទ្ធសភានៅអាមេរិក ជួយខ្មែរផងកុំឲ្យខ្មែរហូរឈាមតទៅទៀត។ យើងទាំងអស់គ្នាមានសង្ឃឹមទៅលើសហរដ្ឋអាមេរិក ដែលជាបិតាប្រជាធិបតេយ្យ។ ដូច្នេះយើងសង្ឃឹមហើយសង្ឃឹមទៀត។ ស.រ.អា សូម្បីតែសត្វក៏គេឲ្យតម្លៃដែរ ទម្រាំដល់ខ្មែរដែលជាមនុស្សជាតិ ត្រូវប្រមាថមើលងាយ ខ្ញុំសូមអង្វរ សុំឲ្យអាមេរិកជួយឲ្យខ្មែរបានសុខ។ សូមអ្នកនៅវ៉ាស៊ីនតោន ឌីស៊ី យើងនេះ ផ្ញើសំបុត្រទៅព្រឹទ្ធសភានិងសភា សូមឲ្យខ្មែរយើងក្រោកទាំងអស់គ្នា ទាំងប្រុសទាំងស្រី ទាំងចាស់ទាំងក្មេង។ ទី២ សូមឲ្យអ្នកនៅខាងក្នុងមានការកក់ក្តៅថា យើងនៅខាងក្រៅក៏នៅមិនសុខដែរ យើងឈឺចាប់ជាទីបំផុត។»
ចំពោះការប្រើប្រាស់កម្លាំងហួសហេតុរបស់កងកម្លាំងអាជ្ញាធរកម្ពុជា ទៅលើក្រុមបាតុករកាលពីដើមខែមករានេះ ពលរដ្ឋខ្មែរគ្រប់ស្រទាប់វណ្ណៈ អង្គការសង្គមស៊ីវិលជាតិ អន្តរជាតិ និងមេដឹកនាំប្រទេសមួយចំនួន បានចេញសេចក្ដីថ្លែងការណ៍ជាបន្តបន្ទាប់ រិះគន់ថា ជាការរំលោភលើសិទ្ធិសេរីភាពក្នុងការជួបប្រជុំដោយសន្តិវិធី និងកំពុងធ្វើឲ្យស្ថានភាពសិទ្ធិមនុស្សនៅកម្ពុជា ធ្លាក់ដុនដាប។ ប៉ុន្តែអាជ្ញាធរកម្ពុជា អះអាងមកវិញថា សកម្មភាពទាំងនេះ គឺជាការរក្សាសន្តិសុខនិងសណ្ដាប់ធ្នាប់សង្គម។
នៅទន្ទឹមនេះ អ្នករាយការណ៍ពិសេសនៃឧត្ដមស្នងការអង្គការសហប្រជាជាតិ (អ.ស.ប.) ទទួលបន្ទុកសិទ្ធិមនុស្សប្រចាំកម្ពុជា លោក សុរិយា ស៊ូប៊ែឌី (Surya P. Subedi) ក៏គ្រោងនឹងធ្វើដំណើរមកដល់កម្ពុជា នៅសប្ដាហ៍នេះ ដើម្បីបំពេញបេសកកម្មរយៈពេល ៦ថ្ងៃ របស់លោក ក្នុងការស្វែងរកការពិត និងវាយតម្លៃស្ថានការណ៍សិទ្ធិមនុស្សនៅកម្ពុជា។
ក្នុងសេចក្ដីប្រកាសព័ត៌មានរបស់ឧត្ដមស្នងការអង្គការសហប្រជាជាតិ ទទួលបន្ទុកសិទ្ធិមនុស្សកាលពីថ្ងៃទី៧ មករា ក៏បានរិះគន់ការបាញ់សម្លាប់ក្រុមបាតុករដោយកងកម្លាំងប្រដាប់អាវុធ រដ្ឋាភិបាលនោះដែរ។
អនុប្រធានសភាខ្មែរ អន្តរជាតិនៅរដ្ឋមីនីសូតា (Minnesota) លោក ហឿន ហាច មានប្រសាសន៍ថា លោកមានការអាណិតអាសូរដល់ពលរដ្ឋខ្មែរ និងឈឺចាប់ជាទីបំផុត នៅពេលឃើញសកម្មភាពបាញ់ប្រហារ និងវាយដំធ្វើបាបកម្មករ ដោយគ្រាន់តែទាមទារដំឡើងប្រាក់ខែដើម្បីឲ្យបានរស់សមរម្យ។
លោកបន្តថា ខ្មែរនៅរដ្ឋមីនីសូតា មិននៅស្ងៀមទេ គឺព្យាយាមជួបតំណាងក្នុងរដ្ឋរបស់ខ្លួន ដើម្បីស្វះស្វែងរកមធ្យោបាយដោយសន្តិវិធី ស្ដារស្ថានភាពនៅកម្ពុជាឡើងវិញ៖ «ខ្ញុំនិងប្រធានកំពុងរក មធ្យោបាយជួយ មិនមែនបង្កហេតុ ឬបង្កបញ្ហាទេ។ យើងរកមធ្យោបាយជួបនឹងសភាអាមេរិកាំង ដើម្បីរកសន្តិភាពតាមសន្តិវិធី។ តើរកច្បាប់អ្វីដើម្បីជួយស្រុកខ្មែរ? យើងអត់ទៅប្រឆាំងនឹងអាវុធ ឬធ្វើសង្គ្រាមទេ តែរកមធ្យោបាយតាមច្បាប់។ ចំពោះមតិរបស់ខ្ញុំ ដែលឃើញទិដ្ឋភាពទាំងប៉ុន្មាន គឺជាអំពើហិង្សាបំផុត ប៉ះពាល់នឹងសិទ្ធិមនុស្ស។ ពលរដ្ឋខ្មែរគ្មានអាវុធ ហើយទាមទាររកសិទ្ធិសេរីភាព ត្រូវកងកម្លាំងប្រដាប់អាវុធបាញ់ប្រហារ វាយដំទាំងបាសកនិងព្រះសង្ឃ។ ការវាយដំនេះ ហួសនិស្ស័យ ដូចជំនាន់ ប៉ុល ពត អ៊ីចឹង។»
លោក ហឿន ហាច បន្តថា សភាខ្មែរអន្តរជាតិ (International Khmer Assembly) កំពុងប្រមូលស្នាមមេដៃរបស់ពលរដ្ឋខ្មែរទាំងអស់នៅក្នុងរដ្ឋទាំង ៥០ នៅសហរដ្ឋអាមេរិក ដើម្បីរៀបចំដាក់ពាក្យបណ្ដឹងរួមទៅសភា និងព្រឹទ្ធសភាអាមេរិក ឲ្យជួយដោះស្រាយតាមនីតិវិធីច្បាប់ អំពីស្ថានការណ៍រំលោភសិទ្ធិមនុស្ស និងការជិះជាន់ធ្វើបាបពលរដ្ឋខ្មែរនៅក្នុងប្រទេសកម្ពុជានេះ។
ចំណែកលោក ខឹម ពត អតីតទាហានសម័យសាធារណរដ្ឋ លន់ នល់ វិញ ដែលបានភៀសខ្លួនមករស់នៅក្នុងរដ្ឋកាលីហ្វ័រញ៉ា (California) សហរដ្ឋអាមេរិក កាលពីដើមឆ្នាំ១៩៨១ នៅពេលបានឃើញហេតុការណ៍បង្ក្រាបហិង្សារបស់ក្រុមអាជ្ញាធរចម្រុះតាម វីដេអូ បានសំដែងក្តីហួសចិត្តថា សម័យនេះហើយនៅមានការធ្វើបាបដូចជារបបខ្មែរក្រហមទៀត។
លោកថា ពលរដ្ឋខ្មែរនៅរដ្ឋកាលីហ្វ័រញ៉ា បាននាំគ្នាធ្វើបាតុកម្មតវ៉ាកាលពីចុងសប្ដាហ៍នេះ ប្រឆាំងនឹងការរំលោភបំពានសិទ្ធិពលរដ្ឋពីសំណាក់អាជ្ញាធរចម្រុះរបស់ រដ្ឋាភិបាល៖ «ខ្ញុំតាមដានដែរ ខ្ញុំឃើញថា ធ្វើហ្នឹងវាហួសហេតុពេក ខ្មែរយើងដែលហែបាតុកម្ម មានតែដៃទទេទាំងអស់គ្នា ដើម្បីទាមទារយកសេរីភាព ហើយអ្នកដែលធ្វើហ្នឹង បាញ់មកលើមកលើពលរដ្ឋ និងធ្វើមិនគប្បីហួសប្រមាណ។ ខ្ញុំបានគិតគូរដែរ ខ្ញុំទូរស័ព្ទទៅ យូ.អ៊ិន ឲ្យគេជួយ ហើយបងប្អូនខ្មែរយើងបានធ្វើបាតុកម្ម ២ថ្ងៃ គឺថ្ងៃសៅរ៍ និងថ្ងៃអាទិត្យនេះ មានមនុស្សច្រើនប្រមាណ ១៥០នាក់។ យើងទាមទារច្រើនណាស់ ចង់បានសេរីភាពទាំងអស់គ្នា ដើម្បីឲ្យខ្មែរបានរស់...។»
ពាក់ព័ន្ធនឹងហេតុការណ៍បាញ់បង្ក្រាបក្រុមកម្មករតវ៉ាដំឡើងប្រាក់ ខែនេះ អ្នកស្រី ហែម ស៊ីនួន ប្រធានបណ្ដាញសមាគមស្ត្រីខ្មែរនៅរដ្ឋវ៉ាស៊ីនតោន បានសំដែងក្ដីតក់ស្លុតជាខ្លាំងចំពោះសកម្មភាពកាចសាហាវរបស់ក្រុម កម្លាំងរដ្ឋាភិបាល រួមមានកងរាជអាវុធហត្ថ ប៉ូលិស និងទាហានប្រដាប់ដោយកាំភ្លើង ខែល ដំបង និងបំពង់ទីប ដែលបានបាញ់ និងវាយទៅលើកម្មករដែលប្រើដុំថ្មជាអាវុធគប់តបតប្រឆាំងនឹង កម្លាំងអាជ្ញាធរ។
អ្នកស្រីថា ពលរដ្ឋខ្មែរក្នុងរដ្ឋវ៉ាស៊ីនតោន ក៏បានធ្វើបាតុកម្មតវ៉ាកាលពីថ្ងៃព្រហស្បតិ៍ សប្ដាហ៍មុន ទាមទារឲ្យរដ្ឋាភិបាលសហរដ្ឋអាមេរិក យកចិត្តទុកដាក់បន្ថែមជាងនេះទៀត ជាជាងគ្រាន់តែចេញសេចក្ដីថ្លែងការណ៍ថ្កោលទោស។
អ្នកស្រី ហែម ស៊ីនួន ដែលធ្វើការជាអ្នកគ្រប់គ្រងកម្មវិធីយុវជននៃមជ្ឈមណ្ឌលវប្បធម៌តំបន់ អាស៊ីប៉ាស៊ីហ្វិក មានប្រសាសន៍បន្តថា ក្រុមអ្នកស្រីកំពុងប្រាស្រ័យទាក់ទងជាមួយសមាជិកព្រឹទ្ធសភា និងតំណាងរាស្ត្រអាមេរិកាំង ដើម្បីជំរុញឲ្យស្ថានការណ៍នៅកម្ពុជា បានប្រសើរជាងនេះ៖ «ក្នុងនាមជាស្ត្រីម្នាក់មើលឃើញការកាប់ សម្លាប់នេះ គឺសាហាវណាស់ ឃើញតក់ស្លុតណាស់ គួរឲ្យខឹង។ ខ្ញុំបានណាត់ជួបជាមួយសភាអាមេរិកាំង គ្រប់ទាំងអស់ ទាំង US Senators ទាំងCongressនិង State ទៀត ដើម្បីឲ្យពួកគាត់យកចិត្តទុកដាក់ និងផ្ដន្ទាទោសលោក ហ៊ុន សែន និងបក្សពួកគាត់ដែលធ្វើទៅលើកម្មករយ៉ាងព្រៃផ្សៃនេះ។ យើងក៏បានជួបជុំគ្នាធ្វើបាតុកម្មទៀត ជួយតវ៉ាឲ្យក្រុមកម្មករយើង រកខុសរកត្រូវឲ្យពួកគាត់ផង ពីព្រោះការកាប់សម្លាប់នោះ គឺវាអាក្រក់បំផុត ហើយខុសនឹងសិទ្ធិមនុស្សពិតប្រាកដ...។»
ប្រជាពលរដ្ឋខ្មែរ-អាមេរិកាំងទាំងនោះ បានប្រាប់វិទ្យុអាស៊ីសេរី តាមទូរស័ព្ទថា ពួកគេកំពុងទាក់ទងជាមួយតំណាងសហគមន៍ខ្មែរក្នុងរដ្ឋនីមួយៗ ដើម្បីមូលមតិគ្នារៀបចំជាពាក្យបណ្ដឹងរួមប្ដឹងទៅរដ្ឋាភិបាល សហរដ្ឋអាមេរិក សភា និងព្រឹទ្ធសភាអាមេរិកាំង ព្រមទាំងអង្គការសហប្រជាជាតិ ដើម្បីជំរុញ និងធ្វើអន្តរាគមន៍ឲ្យបានឆាប់ៗ ចំពោះការរំលោភសិទ្ធិមនុស្សគ្រប់ទម្រង់រូបភាពលើប្រជាពលរដ្ឋខ្មែរ ក្រីក្រ ក្នុងនោះរួមមានកម្មករជាដើម៕
No comments:
Post a Comment