លោក សម រង្ស៊ី គំរាម ផ្ទុះការតវ៉ាទូទាំងប្រទេស ប្រសិនបើ មេដឹកនាំ សហជីពណាមួយ ត្រូវបាន ចាប់ខ្លួន
ដោយ៖ នួន បូរិន / វិទ្យុ វីអូឌី | ថ្ងៃព្រហស្បតិ៍ ទី2 ខែមករា ឆ្នាំ2014
លោក សម រង្ស៊ី ប្រធានគណបក្សសង្គ្រោះជាតិ នៅទីលានប្រជាធិបតេយ្យ (រូបភាពដោយ តាត ឧត្ដម)
ប្រធាន គណបក្ស ប្រឆាំង ធំជាងគេ នៅកម្ពុជា គំរាមថា នឹងមាន ការផ្ទុះ ការតវ៉ាទូទាំងប្រទេស ប្រសិនបើ មេដឹកនាំ សហជីព ណាមួយ ត្រូវបាន ចាប់ខ្លួន ក្នុង ករណី ជួយការពារ ផលប្រយោជន៍កម្មករ ក្នុងតវ៉ា ឲ្យមានការដំឡើងប្រាក់ឈ្នួល ការងារ ១៦០ដុល្លារអាមេរិក។
លោក សម រង្ស៊ី ប្រធានគណបក្សសង្គ្រោះជាតិ បានធ្វើការព្រមានដូចនេះ នៅក្នុងឱកាសលោកថ្លែងសារនយោបាយ ទៅកាន់អ្នកគាំទ្រលោកជាច្រើនពាន់នាក់ ដែលមកប្រមូលផ្ដុំស្ដាប់លោក នៅទីលានប្រជាធិបតេយ្យ កាលពីយប់ថ្ងៃទី១ ខែមករា ឆ្នាំ២០១៤។
លោក សម រង្ស៊ី បានបញ្ជាក់ថា ការចាប់ខ្លួនមេដឹកនាំសហជីព គឺជាការធ្វើឲ្យកម្មករមានកំហឹង ហើយបើកម្មករមានកំហឹង ពួកគាត់នឹងចេញធ្វើការតវ៉ាជួយមេដឹកនាំរបស់ខ្លួន គឺជាគ្រោះថ្នាក់ លើវិស័យការងាររោងចក្រនៅកម្ពុជា។
ការគំរាមរបស់លោក សម រង្ស៊ី បានធ្វើឡើងបន្ទាប់ពីក្រសួងមហាផ្ទៃ កាលពីថ្ងៃពុធ បានព្រមានថានឹងដកហូតសិទ្ធិរបស់ លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ និងគំរាមមេដឹកនាំសហជីពចំនួន៦ទៀតថា អាចនឹងកោះហៅចូលតុលាការ ដោយសារលោកបានដឹកនាំ កម្មករផ្ទុះការតវ៉ា តាំងពីថ្ងៃទី២៥ ខែធ្នូ ឆ្នាំ២០១៣ ទាមទារដំឡើងប្រាក់ឈ្នួល ១៦០ដុល្លារ ហើយបានប៉ះពាល់យ៉ាងធ្ងន់ធ្ងរសង្វាក់ផលិតកម្មរបស់រោងចក្រ៕
No comments:
Post a Comment