គណបក្ស សង្គ្រោះជាតិ ចោទអាជ្ញាធរ យកមនុស្ស ញៀនថ្នាំ មកវាយបំបែក ក្រុមបាតុករ
ដោយ៖ ជន ស្រីណុច / វិទ្យុ វីអូឌី | ថ្ងៃអង្គារ៍ ទី7 ខែមករា ឆ្នាំ2014
ក្រុមជនស៊ីវិល និងកងសន្តិសុខខណ្ឌ បានដើរបំបែកហ្វូងបាតុករទាំងនៅទីលានប្រជាធិបតេយ្យ និងនៅតាមដងផ្លូវជិតទីលានប្រជាធិបតេយ្យផងដែរ (រូបថតដោយ តាំង វីដា)
អនុប្រធានគណបក្សសង្គ្រោះជាតិ លោក កឹម សុខា ចោទថា អាជ្ញាធរបានយកក្រុមមនុស្សចេញពីមណ្ឌលកែប្រែគ្រឿងញៀន ខេត្ដបន្ទាយមានជ័យ មកដេញវាយបំបែកប្រជាពលរដ្ឋ អ្នកសារព័ត៌មាន និងអ្នកការពារសិទ្ធិមនុស្ស នៅទីលានប្រជាធិបតេយ្យ កាលពីថ្ងៃសៅរ៍សប្តាហ៍មុន។
លោក កឹម សុខា បានថ្លែងទៅកាន់វិទ្យុអាស៊ីសេរីកាលពីយប់ថ្ងៃចន្ទថា លោកមានការសោកស្តាយយ៉ាងខ្លាំង ដែលអាជ្ញាធរប្រើល្បិចយកមនុស្សសេពគ្រឿងញឿន មកវាយបំបែកក្រុមបាតុកររបស់លោក ដែលតវ៉ាដោយអហិង្សា។ លោកបន្តថា គណបក្សសង្គ្រោះជាតិ សំណូមពរឲ្យប្រជាពលរដ្ឋបំបែកគ្នាចេញនោះ ដោយសារតែក្រុមអាជ្ញាធរ មានសុទ្ធតែកាំភ្លើង ដោយឡែកប្រជាពលរដ្ឋមានតែដៃទទេ <<ប្រសិនជាទៅប្រឈរឲ្យប្រជាពលរដ្ឋតទល់ជាមួយកាំភ្លើងភ្លាមនោះ គឺស្លាប់ប្រជាពលរដ្ឋច្រើន គណបក្សសង្គ្រោះជាតិប្រជុំអចិន្ត្រៃណ៍សម្រេចភ្លាម ស្នើសុំឲ្យប្រជាពលរដ្ឋដកថយសិន ពីព្រោះយើងស្គាល់ចរិតរបស់សមត្ថកិច្ច គឺគេប្រើមនុស្ស ប្រើក្រុមដែលគ្រឿងញៀន ដែលយកមកពីបន្ទាយមានជ័យនោះ មកពាក់ដៃក្រហម ដើរវ៉ៃ។ នេះហើយយើងដឹង យើងក្តាប់បញ្ហាបាន ទាំងអស់ យើងដឹងការរៀបចំ របស់សមត្ថកិច្ចគេបម្រុងធ្វើអ្វី គឺយើងដឹង។ គេបម្រុងមកនេះ គេប្រើមនុស្សមកវ៉ៃតប់ ប្រជារាស្ត្រ ហើយយើងក្នុងនាមជាអ្នកដឹកនាំ យើងត្រូវគេចពីអ្វីដែលធ្វើឲ្យប្រជារាស្ត្រស្តាប់។ យើងខំគេចឲ្យអស់លទ្ធភាព>>។
អ្នកនាំពាក្យកងរាជអាវុធហត្ថលើផ្ទៃប្រទេស លោក ខេង ទីតូ មានប្រសាសន៍ថា សមត្ថកិច្ចមិនខ្វល់នឹងការយល់ឃើញរបស់អនុប្រធានគណបក្សសង្គ្រោះជាតិ ហើយបដិសេធចំពោះការចោទប្រកាន់នោះ ដោយលើកឡើងថា អ្នកដែលចុះបង្ក្រាបទាំងអស់នោះ ជាកម្លាំងសមត្ថកិច្ច <<ស្រេចតែគាត់ គាត់ចោទថាយ៉ាងម៉េច ក៏ចោទទៅ ជាសិទ្ធិរបស់គាត់ ក៏ប៉ុន្តែគ្រាន់តែថា កម្លាំងដែលគេប្រើ គឺសុទ្ធតែជាមានសមត្ថកិច្ចទាំងអស់។ បាទ! ជាកម្លាំងសមត្ថកិច្ច>>។
អ្នកគ្រប់គ្រងបច្ចេកទេសឃ្លាំមើល ការរំលោភសិទ្ធិមនុស្សនៃអង្គការលីកាដូ លោក អំ សំអាត ដែលបានតាមដានព្រឹត្តិការណ៍នោះ យល់ថា ក្រុមមនុស្សដែលស្លៀកពាក់ស៊ីវិល ហើយដើរដេញវាយប្រជាពលរដ្ឋ អ្នកសារព័ត៌មាន និងអ្នកឃ្លាំមើលសិទ្ធិមនុស្សនៅថ្ងៃនោះ គឺមនុស្សដែលអាជ្ញាធររៀបចំឡើង ដើម្បីបំភ័ន្តភ្នែកសាធារណជនថាខ្លួនមិនបានប្រើប្រាស់ហិង្សា ឬប្រើអាវុធតែប៉ុណ្ណោះ។ លោករិះគន់អាជ្ញាធរមានសមត្ថកិច្ច ដែលមានតួនាទីការពារប្រជាពលរដ្ឋ តែឈរមើលជនស៊ីវិល ដេញវាយប្រជាពលរដ្ឋ <<នេះជារឿងរំលោភសិទ្ធិមនុស្សមួយយ៉ាងធ្ងន់ធ្ងរ ជាទីបំផុត។ ជាពិសេសកងកម្លាំងដែលមានកាតព្វកិច្ច ក្នុងការការពារសុវត្ថិភាព និងសន្តិសុខជូនពលរដ្ឋ នៅពេលដែលឃើញគេប្រព្រឹត្ត បទល្មើស ហើយយើងមិនចាត់ការតាមផ្លូវច្បាប់។ នេះគឺជារឿងមួយដែលគេរៀបចំទុក ដោយគេថា បើប្រើប្រាស់កងកម្លាំងដែលមានឯកសណ្ឋានទៅ គឺវាអាក្រក់មើលពេក ហើយគេចោទប្រកាន់។ អញ្ជឹងជាឈុតមួយដែលរៀបចំ ឲ្យមានជនស៊ីវិល ហើយមានក្រុមសន្តិសុខ ដែលនៅក្រៅក្របខណ្ឌរបស់រដ្ឋនោះ ដើរដេញវ៉ៃគេ>>។
បន្ទាប់ពីការបង្ក្រាបបាតុករនៅទីលានប្រជាធិបតេយ្យ សាលារាជធានីភ្នំពេញ បានប្រកាសមិនឲ្យគណបក្សសង្គ្រោះជាតិ បន្តការធ្វើបាតុកម្មនៅទីលានប្រជាធិបតេយ្យ និងដង្ហែនៅតាមផ្លូវរាជធានីភ្នំពេញ ចាប់ពីថ្ងៃទី៤ខែមករាឆ្នាំ២០១៤ រហូតសណ្តាប់ធ្នាប់នៅកម្ពុជា មានភាពប្រសើរឡើងវិញ ដោយមិនមានពេលកំណត់។លិខិតរបស់សាលារាជធានី បានហៅសកម្មភាពបាតុកម្មថា ជាសកម្មភាពអុចអាលញុះញង់ឈានដល់បង្កឲ្យមានអំពើហិង្សា បាត់បង់អាយុជីវិតមនុស្ស និងបំផ្លិចបំផ្លាញទ្រព្យសម្បត្តិ ឯកជន និងសាធារណ:៕
No comments:
Post a Comment