ពលរដ្ឋ ខេត្តព្រះវិហារ បារម្ភ ពីវិនាសកម្ម ព្រៃឈើ ដោយការផ្ដល់ ដីសម្បទាន សេដ្ឋកិច្ច
ក្រុមអង្គការក្រៅរដ្ឋាភិបាលក៏ដូចជាសហគមន៍ការពារព្រៃឈើ និងប្រជាពលរដ្ឋ នៅក្នុងខេត្តព្រះវិហារ កំពុងព្រួយបារម្ភទៅលើបញ្ហាទំនាស់ដីធ្លីដែលមិនមានដំណោះស្រាយ រួមទាំងភាពវិនាសកម្មព្រៃឈើកាន់តែហិនហោចទៅ នៅពេលដែលខេត្តនេះមានក្រុមហ៊ុនកាន់តែច្រើនឡើងៗ ទទួលបានដីសម្បទានសេដ្ឋកិច្ច។
អង្គការក្រៅរដ្ឋាភិបាលដែលកំពុងឃ្លាំមើល និងការពារសិទ្ធិមនុស្ស បានឱ្យដឹងថា ក្នុងចំណោមទំនាស់ដីធ្លីធំៗកំពុងកើតមានក្នុងខេត្តព្រះវិហារ ដូចជានៅ ស្រុកឆែប ស្រុកត្បែងមានជ័យ ស្រុកគូលែន និងស្រុកជ័យសែន ជាដើម។
តំណាងសហគមន៍ជនជាតិភាគតិចកួយ នៅឃុំប្រមេរ ស្រុកត្បែងមានជ័យ គឺអ្នកស្រី នួន ម៉ុន។ អ្នកស្រីបានមានប្រសាសន៍ថា ក្រុមជនជាតិភាគតិចប្រមាណ ១៦០គ្រួសារ នៅភូមិចំនួន៣ កំពុងប្រឹងប្រែងការពារដីដែលក្រុមហ៊ុន ឡាន ហ្វេង កំពុងឈូសឆាយរំលោភបំពាន។ ស្ត្រីដដែលបញ្ជាក់ថា ក្រុមអ្នកភូមិបាននាំគ្នាទៅបោះជំរំ ដើម្បីប្រឆាំងការឈូសឆាយដីនោះទៀតផង៖ «ក្រុមហ៊ុននៅតែឈូសរាល់តែថ្ងៃ ប៉ះដីស្រែ ប៉ះចម្ការបម្រុង សម្រាប់ចម្ការវិលជុំរបស់ជនជាតិដើមភាគតិច។ រំលើង កន្លងមកអស់ច្រើនហិកតារហើយ សល់ពួកខ្ញុំទៅទប់ស្កាត់ព្រឹកមិញ គេថាគេផ្អាកសិន ចាំមើលថ្នាក់លើដោះស្រាយ»។
សង្គមស៊ីវិល រួមនិងសហគមន៍ការពារព្រៃឈើ បានឱ្យដឹងថា ការផ្ដល់ដីសម្បទានសេដ្ឋកិច្ចទៅឱ្យក្រុមហ៊ុនឯកជនជាច្រើននោះ ក្រៅតែពីប៉ះពាល់លើកម្មសិទ្ធិឯកជនរបស់ប្រជាពលរដ្ឋជាច្រើនកន្លែង ក៏នៅមានការប៉ះពាល់ដល់ព្រៃឈើ និងធនធានធម្មជាតិរ៉ែជាច្រើនប្រភេទទៀត។
បណ្ដាញសហគមន៍ការពារព្រៃឈើកំពង់ស្រណោះ នាភូមិកំពង់ស្រឡៅ១ នៃស្រុកឆែប លោក គឿង ផន បានមានប្រសាសន៍ថា ជាច្រើនឆ្នាំមកនេះ អ្នកភូមិរបស់លោកបានទទួលថែរក្សា និងការពារព្រៃទំហំជាង ៣.១០០ហិកតារ។ អ្នកភូមិជាច្រើនតែងចូលព្រៃរករបរចិញ្ចឹមជីវិត ក៏ប៉ុន្តែលោកកំពុងព្រួយបារម្ភខ្លាចបាត់បង់ព្រៃសហគមន៍នេះនៅពេលដែលមានក្រុមហ៊ុនដីសម្បទានកាន់តែច្រើនឡើងៗចូលទៅជិតៗតំបន់នោះ៖ «ចេះតែកង្វល់ហើយ ពីព្រោះវាខ្លាចអត់កន្លែងរកស៊ី ពិសេសខាងអនុផលព្រៃឈើហ្នឹងហើយ។ បើវារក្សាព្រៃសហគមន៍បាន គឺយើងល្អ តែបើថាយើងរក្សាមិនបានទៀត ខ្លាចគេប្រគល់ឱ្យក្រុមហ៊ុន ព្រោះថ្ងៃដែលគេប្រគល់ដីឱ្យសហគមន៍ហ្នឹង ចៅហ្វាយខេត្តលើកឡើងថា ពិតមែនតែប្រគល់ ប៉ុន្តែបើរដ្ឋត្រូវការ គេចង់យកវិញថ្ងៃណាក៏បាន។ ហ្នឹងហើយបានថា ចេះតែព្រួយបារម្ភអារឿងហ្នឹង»។
លោក ប៉ិក សោភ័ណ មន្ត្រីផ្នែកតស៊ូមតិរបស់អង្គការពន្លកខ្មែរ បានមានប្រសាសន៍ថា បច្ចុប្បន្ន ដីសម្បទានសេដ្ឋកិច្ចក្នុងខេត្តព្រះវិហារ គឺមាននៅជាច្រើនស្រុក ដូចជារវៀង ស្រុកជ័យសែន ស្រុកឆែប ស្រុកសង្គមថ្មី ស្រុកគូលែន និងត្បែងមានជ័យ។ លោក ប៉ិក សោភ័ណ បានបញ្ជាក់ថា ដីសម្បទានជាច្រើនកន្លែងក្រៅតែពីប៉ះពាល់លើកម្មសិទ្ធិប្រជាពលរដ្ឋ បណ្ដាលឱ្យកើតជាជម្លោះ ពិបាកដោះស្រាយ ក៏បានបំផ្លាញដល់ធនធានធម្មជាតិជាច្រើនទៀត៖ «កាលណាក្រុមហ៊ុនឆាយដីទាំងអស់ហ្នឹង គឺវាប៉ះពាល់នឹងព្រៃឈើ។ នៅក្រុមហ៊ុន ឡាន ហ្វេង រួយ ហ្វេង យើងបានចូលទៅដល់ គឺគំនរឈើគរទុកយ៉ាងច្រើនសន្ធឹកសន្ធាប់ ហើយដូចខាងនៅស្រុករវៀង នេះ គឺសុទ្ធប៉ះពាល់នឹងព្រៃសហគមន៍ទៀតតែម្ដង។ នៅខាងដីរ៉ែ នេះវាប៉ះពាល់ទៅលើប្រពៃណីជនជាតិភាគតិច ប៉ះពាល់មុខរបររបស់គាត់»។
មន្ត្រីរដ្ឋាភិបាលបានផ្ដោតលើសុទិដ្ឋិនិយមថា ការផ្ដល់ដីសម្បទានសេដ្ឋកិច្ចទៅឱ្យក្រុមហ៊ុនឯកជនវិនិយោគ គឺបានផលចំណេញ ដូចជាបានចំណូលដែលបង់ពន្ធមកក្នុងថវិការដ្ឋ និងបានបង្កើតមុខរបរឱ្យប្រជាពលរដ្ឋនៅតាមតំបន់មានការងារធ្វើជាដើម។ ក៏ប៉ុន្តែ ក្រុមអង្គការក្រៅរដ្ឋាភិបាលបានរកឃើញថា ការផ្ដល់ដីសម្បទានសេដ្ឋកិច្ចទៅឱ្យក្រុមហ៊ុនឯកជនវិនិយោគ ភាគច្រើន គឺមិនបានសិក្សាឱ្យដិតដល់អំពីផលប៉ះពាល់ទៅដល់ធនធានធម្មជាតិរបស់ប្រទេសទេ។
អនុប្រធានផ្នែកស៊ើបអង្កេតរបស់សមាគមការពារសិទ្ធិមនុស្សអាដហុក (Adhoc) លោក ចាន់ សុវ៉េត បានមានប្រសាសន៍ថា នៅតាមបណ្ដាខេត្តជាច្រើននៃប្រទេសកម្ពុជា ទំនាស់ដីធ្លីខ្លះបានកើតមាន និងអូសបន្លាយជាច្រើនឆ្នាំមកហើយ តែមិនទាន់ដោះស្រាយ។ លោក ចាន់ សុវ៉េត បានមានប្រសាសន៍ទៀតថា ខេត្តព្រះវិហារ ដែលមានក្រុមហ៊ុនដីសម្បទានចំនួន៣៤ នោះ ឃើញថានៅតិចជាងខេត្តមួយចំនួនទៀត ដូចជាខេត្តក្រចេះ រតនគិរី កំពង់ធំ និងកំពង់ចាម ជាដើម គឺមានរហូតដល់ទៅជាង ៥០ក្រុមហ៊ុនឯណោះ។ ទោះយ៉ាងណា លោក ចាន់ សុវ៉េត ទទួលស្គាល់ថា ខេត្តព្រះវិហារ ថ្វីត្បិតតែចំនួនក្រុមហ៊ុនដីសម្បទានតិចតួចជាងខេត្តខ្លះក៏ដោយ ក៏ខេត្តនេះជាខេត្តសម្បូរព្រៃឈើទីពីរ បន្ទាប់ពីខេត្តកំពង់ធំ ដែលនៅសេសសល់ចុងក្រោយ។
លោក ចាន់ សុវ៉េត ក៏សម្ដែងការព្រួយបារម្ភអំពីវិនាសកម្មព្រៃឈើនៅខេត្តព្រះវិហារ ដោយសារដីសម្បទានសេដ្ឋកិច្ច៖ «បើសិនជាយើងនិយាយខេត្តព្រះវិហារ មួយ ដែលខ្ញុំធ្លាប់ទៅព្រៃមើលមិនឃើញទេ។ តែឥឡូវ យើងមើលឃើញមេឃល្ហល្ហេវល្វឹងល្វើយតែម្ដង ហើយក៏យើងគិតមើលដែរថា ព្រះវិហារ ជាខេត្តមួយដែលមានព្រៃធំជាងគេ ក្រាស់ជាងគេបន្ទាប់ពីកំពង់ធំ មក។ ឥឡូវខេត្តហ្នឹងក៏ទទួលរងការកាប់បំផ្លាញរុករានព្រៃឈើស្ទើរតែអស់ ដោយសារតែក្រុមហ៊ុនទទួលដីសម្បទានសេដ្ឋកិច្ចនេះ»។
ក្រុមអង្គការក្រៅរដ្ឋាភិបាលមួយចំនួនបានឱ្យដឹងថា គេតែងតែសរសេរនៅក្នុងទស្សនៈទាន ក៏ដូចជានៅក្នុងបទអត្ថាធិប្បាយផ្សេងៗ ឬក៏លើកឡើងនៅតាមវេទិកាសាធារណៈ និងសិក្ខាសាលាផ្សេងៗ ដើម្បីដាក់ជូនទៅរដ្ឋាភិបាលឱ្យដឹងអំពីក្ដីព្រួយបារម្ភរបស់សង្គមស៊ីវិល ជុំវិញការផ្ដល់ដីសម្បទានសេដ្ឋកិច្ច ដែលបានធ្វើឱ្យបាត់បង់ព្រៃឈើ និងធនធានធម្មជាតិជាច្រើននោះ។ កន្លងទៅ សង្គមស៊ីវិល ក៏ធ្លាប់ទាមទារឱ្យរដ្ឋាភិបាលបញ្ឈប់ការផ្ដល់ដីសម្បទានសេដ្ឋកិច្ចទៅឱ្យក្រុមហ៊ុនទៀត។
ប៉ុន្តែ ទន្ទឹមនឹងរដ្ឋាភិបាលបញ្ឈប់ការផ្ដល់ដីសម្បទានសេដ្ឋកិច្ចនោះ គឺវាបានដល់ដំណាក់កាលដែលអស់ដីសេសសល់ទៅហើយ រហូតដល់រដ្ឋាភិបាលកាត់ដីអភិរក្ស កាត់ឧទ្យានជាតិ កាត់ដីព្រៃជម្រកសត្វទៅឱ្យក្រុមហ៊ុនស្ទើរតែអស់មកដល់ពេលនេះ៕
No comments:
Post a Comment