ដោយ៖ ឡាយ សាមាន និងតាំង វីដា / វិទ្យុ វីអូឌី | ថ្ងៃពុធ ទី22 ខែមករា ឆ្នាំ2014
ក្រុមប្រឹក្សាសហជីពជាតិកម្ពុជា នៅថ្ងៃពុធនេះ ស្នើឲ្យរដ្ឋមន្ត្រីក្រសួងការងារ ចាត់វិធានការផ្លូវច្បាប់លើសហជីពមួយចំនួនដោយមិនបញ្ចេញឈ្មោះ ដែលសហជីពនេះ ចោទថា បានធ្វើកុប្បកម្ម ហិង្សាខុសច្បាប់ គំរាមដល់សមាជិកផ្សេងទៀត ដែលកំពុងធ្វើការងារ។
លិខិតផ្ញើជូនលោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ហត្ថលេខាដោយប្រធានសហជីពជាង ៦០ ចុះថ្ងៃទី២២ ខែមករានេះ ឲ្យដឹងថា បន្ទាប់ពីគណៈកម្មការប្រឹក្សាការងារចេញសេចក្តីសម្រេចថ្ងៃទី២៤ ខែធ្នូ ឆ្នាំ២០១៣ ពាក់ព័ន្ធនឹងការដំឡើងប្រាក់ឈ្នួលអប្បបរមារួចមក សហជីពមួយចំនួន បានញុះញង់គំរាមកំហែងដល់កម្មករនិយោជិត និងសមាជិកខ្លួន បង្កភាពវឹកវរ ចលាចលស្ទើរគ្រប់ទីកន្លែង បណ្តាលឲ្យមានអំពើកុប្បកម្ម ហិង្សាបំផ្លិចបំផ្លាញទ្រព្យសម្បត្តិសាធារណៈ និងឯកជន។
ក្នុងលិខិតនេះ អះអាងថា កម្មករនិយោជិតភាគច្រើន គឺឯកភាពទទួលយកការដំឡើងប្រាក់ឈ្នួលគោលអប្បបរមា ១០០ដុល្លារ ហើយស្នើឲ្យក្រសួងមានសមត្ថកិច្ច អនុវត្តច្បាប់ម៉ឺងម៉ាត់ចំពោះនីតិវិធីធ្វើកូដកម្ម បាតុកម្មករ ដើម្បីការពារសុវត្ថិភាព និងសណ្តាប់ធ្នាប់សង្គម ព្រមទាំង ចាត់វិធានការផ្លូវច្បាប់ចំពោះមេដឹកនាំ និងជនដៃដល់ ដែលបានញុះញង់ គំរាមកំហែងកម្មករ ប្រជាពលរដ្ឋស្លូតត្រង់ អំឡុងពេលធ្វើកូដកម្ម បាតុកម្មហិង្សា មកផ្តន្ទាទោសតាមច្បាប់។
អ្នកនាំពាក្យក្រសួងការងារ លោក ហេង សួរ ឲ្យដឹងថា ក្រសួងអាចនឹងចាត់វិធានការតាមការស្នើនេះ លុះណាមានភស្តុតាងគ្រប់គ្រាន់ និងផ្អែកលើការស្រាវជ្រាវរបស់សមត្ថកិច្ច។ ប៉ុន្តែ លោកទទួលស្គាល់ថា ទង្វើញុះញង់កម្មករធ្វើបាតុកម្ម គឺពិតជាកើតមានពិតមែនកន្លងមកនេះ «ជាទូទៅក្រសួងទទួលយកគ្រប់នូវឯកសារផ្លូវការ របស់អង្គការ សហជីព ទាំងអស់ ហើយអ្វីដែលមាននៅក្នុងខ្លឹមសារ នៃសេចក្តីអំពាវនាវនេះ វាអាស្រ័យទៅលើភាពជាក់ស្តែង ហើយវាក៏អាស្រ័យទៅលើរោងចក្រសហគ្រាស ដែលលោកទទួលរងផលប៉ះពាល់ ដោយសារការធ្វើកូដកម្ម បាតុកម្មនាពេលកន្លងនេះ ប្រសិនជាគាត់មានភស្តុតាងណាមួយច្បាស់លាស់ ថាមានជនណាមួយ ឬមួយក៏អង្គការសហជីពណាមួយ បានប្រព្រឹត្តខុសច្បាប់»។
កាលពីថ្ងៃទី៣០ ខែធ្នូ ឆ្នាំ២០១៣ ក្រសួងការងារ និងបណ្តុះបណ្តាលវិជ្ជាជីវៈ បានចេញសេចក្តីជូនដំណឹង ព្រមានចាត់វិធានការផ្លូវច្បាប់ទៅលើថ្នាក់ដឹកនាំសហជីពចំនួន៥ និងសមាគម១ ដោយចោទថា បានញុះញង់ដឹកនាំកម្មករធ្វើបាតុកម្មប្រឆាំងសេចក្តីសម្រេចរបស់ក្រសួង និងបានគំរាមកំហែង បំផ្លិចបំផ្លាញទ្រព្យសម្បត្តិរបស់ក្រុមហ៊ុនជាដើម។
ប្រធានសម្ព័ន្ធសហជីពប្រជាធិបតេយ្យកម្មករកាត់ដេរ លោក អាត់ ធន់ ដែលធ្លាប់ត្រូវបានរាយឈ្មោះ ក្នុងលិខិតព្រមានរបស់ក្រសួងការងារ យល់ថា ការស្នើសុំរបស់ក្រុមប្រឹក្សាសហជីពជាតិកម្ពុជា ដែលដឹកនាំដោយលោក សោម អូន និងលោក ជួន មុំថុល គឺធ្វើឡើងដើម្បីបំបាក់ស្មារតីកម្មករ ធ្វើបាតុកម្មតែប៉ុណ្ណោះ ព្រោះថ្នាក់ដឹកនាំសហជីពទាំងនេះ មានតួនាទីក្នុងជួររដ្ឋាភិបាល និងមាននិន្នាការបម្រើប្រយោជន៍និយោជក ជាជាងកម្មករ «ចឹងអ្វីដែលចេញលិខិតមកនេះ គឺទាប់ស្កាត់ឫក៏មិនចង់ឲ្យសហជីពយើងបន្ដការទាមទារឲ្យកម្មករទៅទៀត ចឹងមានន័យថា មិនចង់ទាមទារឲ្យកម្មករបានច្រើនមានតែខ្លះខាត់ អ្នកណាខ្លាចខាតមានតែនយោជក ព្រោះនិយោជកខ្លាចខាត ចឹងមានន័យថា គាត់ទាំងអស់ហ្នឹងនៅក្រោមនិយោជក ចឹងមានន័យថា គាត់ហ្នឹងជាសហជីពបម្រើនិយោជក »។
ប្រធានសមាគមគ្រូបង្រៀនកម្ពុជា និងជាប្រធានសហភាពសហជីពកម្ពុជា ដែលធ្លាប់រងបទចោទពីបទ ករណីញុះញង់ឲ្យប្រព្រឹត្តបទឧក្រិដ្ឋ ឬអំពើបង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ក្រោយបាតុកម្ម កាលពីថ្ងៃទី២ និងទី៣ ខែមករា លោក រ៉ុង ឈុន ថ្លែងថា លោកមិនខ្វល់នឹងការស្នើនេះឡើយ។ លោកយល់ថា កម្មករមានសមត្ថកិច្ចពេញលេញ យល់ដឹងអ្វីខុសអ្វីត្រូវដោយខ្លួនឯង។
បើទោះបីជាបញ្ហាទាមទារប្រាក់ឈ្នួល ១៦០ដុល្លារ មិនទាន់ត្រូវបានដោះស្រាយរួចរាល់ក្តី រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ លោក សាទ សាមុត ឲ្យដឹងថា ក្រសួងការងារ គ្រោងនឹងកោះប្រជុំឡើងវិញ កម្រិតថ្នាក់ជាតិលើកដំបូង ស្តីពីការរៀបចំកម្មវិធីជួបប្រជុំស្តីពីការដំឡើងប្រាក់ឈ្នួលគោល ដល់កម្មករ ជាមួយភាគីពាក់ព័ន្ធ នៅថ្ងៃទី៥ ខែកុម្ភៈ ឆ្នាំ២០១៤នេះ៕
No comments:
Post a Comment