ដោយ អ៊ុក សាវបូរី / អាស៊ីសេរី | ២១ កុម្ភៈ ២០១៤
សកម្មភាពរៀបការនាំស្ត្រីខ្មែរទៅរស់នៅប្រទេសចិន កំពុងតែកម្រើកឡើងវិញនៅតំបន់មួយចំនួនក្នុងប្រទេសកម្ពុជា។ ស្រីវ័យក្មេងៗដែលបានចាកចេញពីភូមិកំណើត ទៅរស់នៅប្រទេសចិន ខ្លះក៏រស់នៅសុខសាន្តជាមួយគ្រួសារចិន ខ្លះក៏ត្រូវបានគេយកទៅលក់បន្ត ឬធ្វើបាប។ ក្មេងស្រីមួយចំនួន ដែលរងទារុណកម្មពីសំណាក់គ្រួសារជនជាតិចិន បានទូរស័ព្ទមកប្រាប់ក្រុមគ្រួសារ ឲ្យជួយអន្តរាគមន៍ដើម្បីបានមកស្រុកកំណើតវិញ។
ក្រុមគ្រួសារក្មេងស្រី ២នាក់ ដែលមេខ្យល់យកទៅរៀបការនៅប្រទេសចិន ស្វែងរកអន្តរាគមន៍ពីសមាគមអាដហុក (Adhoc) ខេត្តកំពង់ស្ពឺ ក្រោយពីកូនស្រីបានទូរស័ព្ទមកក្រុមគ្រួសារ ត្អូញពីការធ្វើបាបដោយបង្អត់អាហារ និងបង្ខំឲ្យធ្វើការគ្មានកម្រៃជាដើម។
លោកស្រី មួង វណ្ណា នៅភូមិរកាពក ឃុំទួលអំពិល ស្រុកបរសេដ្ឋ ខេត្តកំពង់ស្ពឺ ថ្លែងថា កូនស្រីគាត់ឈ្មោះ ប៉ាត វណ្ណី អាយុ ២៥ឆ្នាំ ត្រូវបានមេខ្យល់ឈ្មោះ អ៊ុំ វឿន នៅភូមិជាមួយគាត់ដែលមានកូនស្រីទៅរស់នៅប្រទេសចិន យូរឆ្នាំ មកបញ្ចុះបញ្ចូលឲ្យរៀបការចេញទៅប្រទេសចិន។ លោកស្រីថា មេខ្យល់នោះជួយធ្វើលិខិតឆ្លងដែន និងទិញសំបុត្រយន្តហោះ រហូតកូនគាត់បានចេញពីប្រទេសកម្ពុជា មុនបោះឆ្នោត គឺនៅថ្ងៃទី១៤ ខែកក្កដា ឆ្នាំ២០១៣។ ប្រហែល១ខែក្រោយមក មេខ្យល់ឈ្មោះ អ៊ុំ វឿន ឲ្យលុយគាត់ ៤០០ដុល្លារ និង ៣០ម៉ឺនរៀល។ ប្រមាណ ៣ខែក្រោយពីកូនស្រីទៅនៅប្រទេសចិន គាត់ទទួលទូរស័ព្ទពីកូនស្រីដោយយំស្រែក ប្រាប់ថាសាច់ថ្លៃវាយធ្វើបាប មិនឲ្យហូបបាយ និងរស់នៅវេទនាជាងសត្វទៅទៀត ទើបគាត់សុំឲ្យអង្គការសិទ្ធិមនុស្ស ជួយនាំកូនគាត់បានវិលមកប្រទេសកម្ពុជា វិញ៖ «កូនខ្ញុំហ្នឹងទៅចិន ហើយគេធ្វើបាបធ្វើទោស ចង់ដាច់ខ្យល់ដាច់ថ្លើមហើយមួយថ្ងៃៗ គេបង្អត់បាយ បិទទ្វារអត់ឲ្យចេញ យំមួយថ្ងៃៗចង់ងាប់ហើយ»។
នាយការិយាល័យប្រឆាំងការជួញដូរមនុស្សឆ្លងដែន នៃក្រសួងមហាផ្ទៃ លោក សូ វណ្ណឌី ថ្លែងថា គ្រាន់តែទទួលបានព័ត៌មានពីការិយាល័យប្រឆាំងការជួញដូរមនុស្សខេត្តកំពង់ស្ពឺ ភ្លាម លោកនាំកម្លាំងចម្រុះទៅចាប់ខ្លួនមេខ្យល់ឈ្មោះ អ៊ុំ វឿន និងបញ្ជូនទៅពន្ធនាគារខេត្តហើយ។ លោកបាននាំក្រុមគ្រួសារក្មេងស្រី ២នាក់ ទៅប្ដឹងនៅក្រសួងការបរទេស ឲ្យទាក់ទងស្ថានទូតខ្មែរប្រចាំប្រទេសចិន ឲ្យជួយស្វែងរកក្មេងស្រីទាំង ២នាក់នោះ៖ «យើងពិនិត្យឃើញថា កន្លែងកើតហេតុ និងសិទ្ធិមនុស្សនៅខាងខេត្តកំពង់ស្ពឺ យើងទៅសួរដំណឹងគាត់ហើយ យើងបានយកសំណុំរឿងរបស់គាត់ទៅសុំសហការជាមួយស្នងការនគរបាលខេត្តកំពង់ស្ពឺ ហើយយើងក៏បានទំនាក់ទំនងជាមួយព្រះរាជអាជ្ញាខេត្ត រួចអនុវត្តតាមនីតិវិធីក៏ឈានទៅដល់ការឃាត់ខ្លួនមេខ្យល់តែម្តង»។
មន្ត្រីសម្របសម្រួលសមាគមអាដហុក ខេត្តកំពង់ស្ពឺ អ្នកស្រី អ៊ូច បូរ បានឲ្យដឹងថា នៅឆ្នាំ២០១៣ មានឪពុកម្តាយក្មេងស្រីដែលត្រូវបានគេជួញដូរទៅប្រទេសចិន មកប្ដឹង ២ករណី សុំឲ្យជួយនាំកូនស្រីមកប្រទេសកម្ពុជា វិញ។ ឯនៅដើមឆ្នាំ២០១៤ ទើបមាន១ករណីទេ។
ករណីជួញដូរមនុស្សស្រីវ័យក្មេងតាមវិធីរៀបការជាមួយជនជាតិចិន នោះដែរ ប្រជាពលរដ្ឋឃុំក្រាំងលាវ ស្រុកបាទី ខេត្តតាកែវ សុំមិនបញ្ចេញឈ្មោះបានផ្តល់ដំណឹងថា ក្នុងសប្ដាហ៍នេះ មានជនជាតិចិន និងខ្មែរ ជិះឡានជាក្រុម បានដើរជ្រើសរើសក្មេងស្រីក្នុងភូមិអាយុចន្លោះពី ១៤ ទៅ ១៧ឆ្នាំ ដើម្បីរៀបការ ដោយផ្តល់កម្រៃតាមរូបសម្រស់ចាប់ពី ៥០០ដុល្លារ ទៅ ៣.០០០ដុល្លារ៖ «មេខ្យល់ជនជាតិចិន និងខ្មែរ ហើយនិងជនជាតិខ្មែរមកនាំទៅចិន វគ្គទី១ គេឲ្យ ៥០០ដុល្លារ។ វគ្គមុនកើតប្រហែលជាខ្ទង់ ៣ខែចុះ ដល់ពេលហើយ អាជ្ញាធរគាត់អត់មានធ្វើដឹងធ្វើឮ ហើយក៏មានជនជាតិចិន មក។ ដល់ពេលឥឡូវ គេដើរក្នុងភូមិតែម្តង ឥឡូវគេឲ្យដល់ ៣.០០០ដុល្លារ ឲ្យតែស្អាត»។
ពាក់ព័ន្ធអំពើរត់ពន្ធមនុស្សឆ្លងដែនតាមការបញ្ចុះបញ្ចូលពីមេខ្យល់ រដ្ឋលេខាធិការក្រសួងមហាផ្ទៃ និងជាអគ្គលេខាធិការនៃគណៈកម្មាធិការជាតិ ដឹកនាំការបង្ក្រាបការជួញដូរ និងរត់ពន្ធមនុស្ស ការកេងប្រវ័ញ្ចកម្លាំងពលកម្ម និងការកេងប្រវ័ញ្ចផ្លូវភេទលើស្ត្រី និងកុមារ អ្នកស្រី ជូ ប៊ុនអេង ថ្លែងថា អ្នកស្រីបញ្ជូនជំនាញឲ្យតាមស៊ើបករណីនេះនៅខេត្តតាកែវ ហើយ៕
No comments:
Post a Comment