អាកាសយានិកខ្មែរ លោក ម៉ក់ សំអុល(ធ្វេង) និងអាកាសយានិក លោក ដេត មឿន(រូបថតសហការី)
អាកាសយានិក ខ្មែរ មានឱកាស បើកយន្តហោះ ទៅប្រទេសជប៉ុន ជាលើកដំបូង
ដោយ៖ ស៊ុន ណារិន / វីអូឌី | ថ្ងៃសុក្រ ទី21 ខែកុម្ភៈ ឆ្នាំ2014
អាជ្ញាធរជប៉ុន បានសម្រេចអនុញ្ញាតឲ្យអាកាសយានិកខ្មែរ(Pilot) អាចបញ្ជាយន្តហោះចូលទឹកដីរបស់ខ្លួនបាន ដែលនេះជាលើកដំបូងហើយសម្រាប់អ្នកបើកយន្តខ្មែរក្នុងការបង្កើនទំនុកចិត្តដល់ប្រទេសជប៉ុន។
អាកាសយានិក ដែលជាCapitainយន្តហោះ លោក ម៉ក់ សំអុល មានប្រសាសន៍ថា ជាទូទៅអាជ្ញាធរជប៉ុន មានភាពតឹងរ៉ឹងចំពោះអ្នកបើកយន្តហោះ ដែលអាចបញ្ជាចូលទឹករបស់ខ្លួនបាន។ លោកបន្តថា ពេលនេះ អ្នកបើកយន្តហោះខ្មែរ ត្រូវបានអនុញ្ញាតឲ្យបើកបរបានទៅប្រទេសជប៉ុន ដែលនេះជាមោទនភាពរបស់ខ្មែរ។លោក ម៉ក់ សំអុល បញ្ជាក់ថា«នេះជាមោទនភាពមួយ ដោយសារវិនិយោគិនជប៉ុន មានទំនុកចិត្តលើខ្មែយើង ព្រោះក្នុងពិភពលោក គេមិនសូវទុកចិត្តលើPilotខ្មែរទេ តែនេះជាឱកាសល្អ»។
លោក ម៉ក់ សំអុល ឲ្យដឹងទៀតថា អ្នកបើកយន្តហោះខ្មែរ នៅសល់តែ១៩រូបទេ រហូតមកដល់ពេលនេះ ដែលសុទ្ធតែអ្នកបើកបរជើងចាស់ និងត្រូវបានរដ្ឋាភិបាលខ្មែរក្នុងសម័យរដ្ឋកម្ពុជា ផ្តល់ឱកាសឲ្យទៅសិក្សានៅប្រទេសសូវៀត។ តែលោក សម្តែងការព្រួយបារម្ភពីការបាត់បង់អ្នកបើកយន្តហោះខ្មែរ ដោយសារតែមិនមានអ្នកជំនាន់ក្រោយ ទទួលការបណ្តុះបណ្តាលផ្នែកនេះនៅឡើយទេ។ លោកស្នើឲ្យរដ្ឋាភិបាល បញ្ជូនកូនខ្មែរទៅរៀនផ្នែកបើកបរយន្តហោះនេះ ដើម្បីស្នងអ្នកបើកបរចាស់ៗទៅថ្ងៃខាងមុខ។
លោក ម៉ក់ សំអុល ឲ្យដឹងថា ការទទួលវគ្គបណ្តុះបណ្តាលលើការបើកបរយន្តហោះ អាចចំណាយប្រាក់ជិត២០ម៉ឺនដុល្លារ និងរយៈពេលប្រហែលជា២ឆ្នាំកន្លះ។ អ្នកអាចរៀនបើកបរយន្តហោះបាន ត្រូវតែពូកែខាងគណិតវិទ្យា សុខភាពល្អ(លេខ១) និងកម្ពស់ចាប់ពី១.៦០ឡើងទៅ។ អាកាសយានិកមួយរូប អាចបន្តការងារបើកបរយន្តហោះ បានរហូតដល់អាយុ៦៥ឆ្នាំ៕
No comments:
Post a Comment