នាយក រដ្ឋមន្ត្រី៖ អ្នកបំផ្លាញ សន្តិសុខសង្គម ត្រូវទទួលខុសត្រូវ ចំពោះមុខច្បាប់
ដោយ៖ ពេជ្រ សុធារី / វីអូឌី | ថ្ងៃចន្ទ ទី17 ខែកុម្ភៈ ឆ្នាំ2014
ប្រមុខរាជរដ្ឋាភិបាលកម្ពុជា លើកឡើងថា ការរក្សាស្ថិរភាពនយោបាយ សន្តិសុខសង្គម ត្រូវធានាតាមរយៈការអនុវត្តច្បាប់ និងការចូលរួមរបស់ប្រជាពលរដ្ឋ ហើយអ្នកដែលបំផ្លាញសណ្តាប់ធ្នាប់សន្តិសុខសង្គម ត្រូវទទួលខុសត្រូវចំពោះមុខច្បាប់។
ថ្លែងក្នុងពិធីប្រគល់សញ្ញាបត្រជ័យលាភីដល់សិស្សមន្ត្រីជាន់ខ្ពស់សាលាភូមិន្ទរដ្ឋបាល នៅថ្ងៃទី១៧ ខែកុម្ភៈ ឆ្នាំ២០១៤ លោកនាយករដ្ឋមន្ត្រី ហ៊ុន សែន មានប្រសាសន៍ថា គ្មានប្រទេសណាមួយអាចអភិវឌ្ឍន៍ទៅមុខរួច នៅពេលដែលប្រទេសនោះជួបនូវស្ថានភាពចលាចល និងអសន្តិសុខក្នុងសង្គមនោះទេ។ លោកថា ការរក្សាស្ថិរភាពនយោបាយ និងសណ្តាប់ធ្នាប់សង្គម គឺជារឿងសំខាន់ ដែលរាជរដ្ឋាភិបាលក្នុងអាណត្តិទី៥នេះ ត្រូវធានានូវភាពសុខសាន្តជូនប្រជាពលរដ្ឋ មិនមែនការស្ទះចរាចរណ៍ដោយសារការធ្វើបាតុកម្ម ឬកូដកម្មនោះទេ។
ការថ្លែងរបស់ប្រមុខរាជរដ្ឋាភិបាល បានធ្វើឡើងបន្ទាប់ពីគណបក្សសង្គ្រោះជាតិ បានធ្វើមហាបាតុកម្ម ទាមទារឲ្យមានកំណែទម្រង់ប្រព័ន្ធបោះឆ្នោត បោះឆ្នោតឡើងវិញ ឬបោះឆ្នោតមុនអាណត្តិ កាលពីចុងឆ្នាំ២០១៣ និងដើមឆ្នាំ២០១៤នេះ និងស្របពេលដែលសហជីព និងកម្មករ បានធ្វើបាតុកម្ម និងគ្រោងធ្វើកូដកម្មទូទាំងប្រទេសទាមទារឲ្យដោះស្រាយបញ្ហាកម្មករ ដំឡើងប្រាក់ឈ្នួល ទាមទារដោះលែងអ្នកជាប់ឃុំ២៣នាក់ ព្រមទាំងការប្រមូលផ្តុំតវ៉ាផ្សេងៗទៀតរបស់ប្រជាពលរដ្ឋសហគមន៍ដីធ្លី៕
No comments:
Post a Comment