លោក ម៉ម សូណង់ដូ ប្រធានវិទ្យុសម្បុកឃ្មុំ ក្នុងសន្និសីទសារព័ត៌មាននាពេលកន្លងមក (រូបថតដោយ ណាត សុភាព)
ប្រធាន វិទ្យុសំបុកឃ្មុំ នឹងដាក់លិខិត ទៅក្រសួងព័ត៌មាន សុំបង្កើត ហ្វ្រេកង់ទូរទស្សន៍ និងដំឡើង កម្លាំងផ្សាយវិទ្យុ នៅដើមសប្តាហ៍ក្រោយ
ដោយ៖ ណាត សុភាព / វីអូឌី | ថ្ងៃសុក្រ ទី7 ខែកុម្ភៈ ឆ្នាំ2014
ប្រធានវិទ្យុសំបុកឃ្មុំលោក ម៉ម សូណង់ដូ ឲ្យដឹងថា លោកគ្រោងដាក់លិខិតជាថ្មីទៀត ទៅក្រសួងព័ត៌មាននៅថ្ងៃចន្ទ សប្តាហ៍ក្រោយ ដើម្បីសុំជួបជជែកពីការបង្កើតហ្វ្រេកង់ទូរទស្សន៍ ដំឡើងកម្លាំងផ្សាយវិទ្យុ ឡើងវិញ និងបញ្ហាពាក់ព័ន្ធមួយចំនួនទៀត។
លោក ម៉ម សូណង់ដូ មានប្រសាសន៍នៅថ្ងៃទី០៧ខែកុម្ភៈនេះថា មូលហេតុដែលនាំឲ្យលោកគ្រោងដាក់លិខិតទៅរដ្ឋមន្ត្រីក្រសួងព័ត៌មាន សុំជួប លោក ខៀវ កាញារីទ្ធ នៅដើមសប្តាហ៍ក្រោយ ដោយសារតែ លោក ខៀវ កាញារីទ្ធ ធ្លាប់មានប្រសាសន៍ថា វិទ្យុសំបុកឃ្មុំ នៅជំពាក់ថ្លៃសេវាសោតទស្សន៍ ជាវិទ្យុនយោបាយបម្រើផលប្រយោជន៍គណបក្សប្រឆាំង ហើយក្រសួងបានផ្តល់កម្លាំងផ្សាយវិទ្យុសំបុកឃ្មុំ ១០គីឡូវ៉ាត់ (KW) ជាដើម។ លោកបន្តថា នៅក្នុងការដាក់លិខិតនោះ លោកសង្ឃឹមនឹងបានជួបរដ្ឋមន្ត្រីក្រសួងព័ត៌មាន ឬមន្ត្រីជាន់ខ្ពស់ក្រសួងនេះ ដើម្បីបំភ្លឺនូវអ្វីដែលរដ្ឋមន្ត្រីក្រសួងព័ត៌មាន ធ្លាប់បានចោទលោក។
កាលពីថ្ងៃចន្ទ ទី២៧ ខែមករា កន្លងទៅនេះ លោក ម៉ម សូណង់ដូ ប្រធានវិទ្យុសំបុកឃ្មុំ បានដឹកនាំពលរដ្ឋប្រមាណ៣០០០នាក់ហែក្បួន ចេញពីស្ពាននាគ ក្បែរទីលានប្រជាធិបតេយ្យ ទៅកាន់ក្រសួងព័ត៌មាន ក្នុងគោលបំណងទាមទារបង្កើតហ្វ្រេកង់ ទូរទស្សន៍ និងដំឡើងកម្លាំងផ្សាយវិទ្យុសំបុកឃ្មុំបន្តទៅតាមខេត្ត ប៉ុន្តែកម្លាំងសមត្ថកិច្ចប្រមាណជា ៥០០នាក់ បានប្រើប្រាស់គ្រាប់បែកផ្សែង បាញ់ទៅលើក្រុមបាតុករ ដើម្បីបំបែកការតវ៉ារបស់ពួកគេនៅមុខក្រសួងព័ត៌មាន ធ្វើឲ្យពលរដ្ឋជាច្រើននាក់ ដែលរងរបួសធ្ងន់ និងស្រាល៕
No comments:
Post a Comment