លោក ច័ន្ទ សារុន អតីត រដ្ឋមន្ត្រី កសិកម្ម ខណៈចូលរួមពិធីបុណ្យ ដាលាន នៅខេត្តព្រៃវែង នាពេលកន្លងទៅ
ពិធីបុណ្យ ដាលាន ក្នុងជំនឿ របស់ កសិករជនបទ
(ថ្ងៃទី 2 កុម្ភៈ 2014, ម៉ោង 11:05:AM) | ដោយ: សុផល
ភ្នំពេញ: ប្រជាពលរដ្ឋខ្មែរនៅតំបន់ជនបទភាគច្រើនប្រកបមុខរបរកសិកម្មសំរាប់ចិញ្ចឹមជីវិតដោយការធ្វើស្រែចំការ។ពួកគេតែងធ្វើជារៀងរាល់ឆ្នាំ២ទៅ៣ដងដោយយោងទៅតាមសភាពជាក់ស្តែង។ជារឿយៗសម្រាប់កសិករក្រោយពីការប្រមូលផលរួចគេតែងមូលមតិគ្នាប្រារព្ធនូវពិធីបុណ្យមួយគេអោយឈ្មោះថាបុណ្យដាលាន។បុណ្យនេះគឺជាពិធីជួបជុំគ្នាប្រចាំភូមិជាមួយនឹងការនិមន្តព្រះសង្ឃចំរើនព្រះបរិត្តនិងសំដែងធម៌ទេសនានិងការបង្កើតកម្មវិធីកំសាន្តផង។មានការពន្យល់ថាពិធីនេះក៏មានគោលបំណងសំខាន់បំផុតគឺរំលឹកដល់គុណព្រះធរណីឬគុណព្រះមេ ។
លោកតា ស៊ុំ សុខ វយ័ ៧៨ ឆ្នាំ រស់នៅភូមិ កំរៀង សង្កាត់កន្ទោក ខណ្ឌពោធិ៍សែនជយ័បានឲ្យដឹងថាពិធីនេះគេ បានធ្វើទាំងពីបុរមបុរាណតគ្នារៀងមករហូតដល់ពេលបច្ចុប្បន្ន។តាមការសង្កេឃើញថាពលរដ្ឋដែលធ្វើពិធីបុណ្យខាងលើមានស្ទើរគ្រប់ខេត្ត។នៅពេលដែលពិធីបុណ្យបានចាប់ផ្តើមដំណើរការទៅតាមការដែលបានគ្រោងទុកហើយនោះនៅតាមគេហដ្ឋានពលរដ្ឋទាំងអស់គេបានរៀបចំបោសសំអាតទុកដាក់របស់របរអោយមានសណ្តាប់ធ្នាប់យ៉ាងត្រឹមត្រូវ។កន្លែងប្រារព្ធពិធីគឺបានកំណត់នៅទីតាំងណាមួយដែលពួកអ្នកភូមិស្រុះស្រួលគា្ន។ជាទូទៅតាមភូមិនិមួយៗតែងមានកន្លែងសំរាប់ប្រារព្ធពិធីប្រចាំភូមិ។អ្នកភូមិទាំងអស់មានចំណែកធ្វើម្ហូបអាហារនិងទេយ្យទានរៀងៗសំរាប់យកទៅប្រគេនព្រះសង្ឃនិងជូនគ្នាទៅវិញទៅមក។ម្ហូបសំខាន់សំរាប់ពិធីនេះគឺភាគច្រើននំបញ្ចុក។ប៉ុន្តែនាពេលនេះតាមផ្ទះក្រៅពីនំបញ្ចុកក៏មានការធ្វើម្ហូបផ្សេងៗសំរាប់បរិភោគផងដែរ។
លោកតាបានឲ្យដឹងទៀតថានៅពេលរសៀលមានការនិមន្តព្រះសង្ឃចំរើនព្រះបរិត្តនិងសំដែងធម៌ទេសនា។លុះព្រឹកស្អែកឡើងមានការប្រគេនយាគូដល់ព្រះសង្ឃនិងពេលបន្តមកទៀតគឺការប្រគេនចង្ហាន់ថ្ងៃត្រង់ដល់ព្រះសង្ឃជាកិច្ចបង្ហើយបុណ្យ។លោកតាបានបន្តថា ចង្ហាន់គឺអ្នកភូមិធ្វើរៀងៗខ្លួនរួចសាមគ្គីបញ្ចូលគ្នា។តែអ្វដែលសំខាន់មួយទៀតក្រៅពិចង្ហាន់គេក៏មានពិធីពូនភ្នំស្រូវដែលអ្នកភូមិយកស្រូវមកពូនហើយស្រូវនោះត្រូវបានទុកជាប្រយោជន៍រួមសំរាប់បំរើឲ្យវិស័យមនុស្សធម៌ឬជាស្រូវសង្គហៈក្នុងភូមិ។
លោកតាបានបន្តថានពិធីនេះមិនត្រឹមតែជាការជួបជុំគ្នាឯងនៅក្នុងភូមិប៉ុណ្ណោះទេ។អ្នកភូមិដែលមានសាច់ញាតិនៅទីជិតឆ្ងាយក៏តែងប្រើប្រាស់ឱកាសនេះអញ្ជើញគ្នាមកជួបជុំសប្បាយដែរ។នៅពេលយប់ទីកន្លែងប្រារព្ធពិធីបុណ្យគឺមានពិធីរាំកំសាន្តឬសំដែងសិល្បៈផ្សេងៗទៅតាមការស្រុះស្រួលគ្នា។បច្ចុប្បន្នប្រជាជនយើងក៏បានប្រើប្រាស់ឱកាសនេះសំរាប់ការជួបជុំសប្បាយក្នុងគ្រួសារផងឬក៏នាំគ្នាទៅចូលរួមក្នុងពិធីធំនោះផងក៏បាន។
ជាការកត់សំគាល់ការជួបជុំតាមគ្រួសារឬញាតិក្នុងភូមិក្រៅពីការបរិភោគអាហារដែលបានធ្វើរៀងៗខ្លួនក៏មានការផឹកស៊ីនូវគ្រឿងស្រវឹងផ្សេងៗទៅតាមចំណង់ចំណូលចិត្ត។
លោកតាបានបញ្ជាក់ថាពិធីបុណ្យដាលាននេះត្រូវបានគេមានជំនឿថាជាការអរគុណដល់ម្ចាស់ទឹកម្ចាស់ដីម្ចាស់ពិសេសព្រះធរណីដែលបានអនុគ្រោះឲ្យពួកគេប្រើប្រាស់និងទទួលផលសំរាប់ចិញ្ចឹមជីវិត។ពិធីបុណ្យនេះក៏ជាការបង្កើតនូវភាពសាមគ្គីជួយគ្នាក្នុងភូមិផងដែរ៕
No comments:
Post a Comment