ការទាមទារឲ្យដោះលែងអ្នកទាំង២៣ ដែលសង្គមស៊ីវិលបានធ្វើកន្លងមក ដោយដើរដាក់ញត្តិនៅតាមស្ថានទូតនានា (រូបថត៖ តាត ឧត្តម)
សហជីព និងសង្គមស៊ីវិល គ្រោងធ្វើ យុទ្ធនាការថ្មី និងកូដកម្ម ទ្រង់ទ្រាយធំ ដើម្បីដាក់សម្ពាធតុលាការ ដោះលែងជនទាំង២៣នាក់
ដោយ៖ តាំង វីដា | ថ្ងៃពុធ ទី12 ខែកុម្ភៈ ឆ្នាំ2014
សហជីពធំៗ និងអង្គការសង្គមស៊ីវិល គ្រោងធ្វើយុទ្ធនាការផ្សេងៗ និងកូដកម្មទ្រង់ទ្រាយធំទូទាំងប្រទេសជាថ្មីទៀត ដើម្បីដាក់សម្ពាធប្រព័ន្ធតុលាការ ផ្តល់យុត្តិធម៌ និងដោះលែងជនជាប់ឃុំ ២១នាក់ ព្រមទាំងទម្លាក់បទចោទលើជនទាំង២៣នាក់ ដែលបានចាប់ខ្លួនកាលពីថ្ងៃទី២ និងទី៣ខែមករា។
ការបង្ហាញជំហរនេះ ធ្វើឡើងនេះ បន្ទាប់ពីសាលាឧទ្ធរណ៍ កាលពីថ្ងៃម្សិលមិញ បានបដិសេធបណ្តឹងសុំនៅក្រៅឃុំរបស់អ្នកទាំង២១នាក់ ដោយសម្រេចតម្កល់សេចក្តីសម្រេចរបស់សាលាដំបូងរាជធានីភ្នំពេញ ថាទុកជាបានការ។ ករណីនេះ ត្រូវបានសហជីពបណ្តាញពហុវិស័យ និងអង្គការសង្គមស៊ីវិល ចាត់ទុកថា ប្រព័ន្ធតុលាការ សម្រេចសេចក្តីមិនឯករាជ្យ ស្ថិតក្រោមសម្ពាធនយោបាយ។
ប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា លោក សរ ម៉ូរ៉ា ឲ្យដឹងថា នៅរសៀលថ្ងៃទី១២ ខែកុម្ភៈនេះ សហជីព និងសមាគមធំៗចំនួន១៦ នឹងជួបពិភាក្សា កំណត់ថ្ងៃ និងពេលវេលា ធ្វើកូដកម្មទូទាំងប្រទេសជាថ្មី ក្រោមរូបភាពដាក់គំនាបនានា ដែលមានទ្រង់ទ្រាយធំជាងពេលមុនៗ ហើយមានរយៈពេលវែង ដើម្បីបន្តការទាមទាររកយុត្តិធម៌ដល់សកម្មជនសិទ្ធិមនុស្ស សិទ្ធិការងារ សិទ្ធិដីធ្លី និងកម្មករទាំង២៣នាក់។ លោកថា ការប្តេជ្ញាចិត្ត គឺសហជីព ក៏ដូចជាកម្មករ មិនខ្លាចនូវការបង្ក្រាបរបស់សមត្ថកិច្ចនោះឡើយ «រស់នៅដោយមានការគំរាមកំហែង រស់នៅដោយ គ្មាននូវសេរីភាព ហើយយើងមើលឃើញថា សូម្បីតែជួបជុំគ្នា ក៏មិនឲ្យជួបជុំគ្នា មានអ្វីខុសគ្នាពីរស់នៅក្នុងគុក វាដូចតែនៅក្នុងគុកអញ្ចឹង យើងអត់មានបារម្ភ ក្នុងការគំរាមហ្នឹងទៀតទេ ព្រោះយើងមិនមានជម្រើសទៀតទេ»។
នាយកលេខាធិការដ្ឋាននៃក្រុមការងារពិសេសសិទ្ធិលំនៅដ្ឋាន លោក សៀ ភារម្យ មានប្រសាសន៍ថា អង្គការសង្គមស៊ីវិលជាតិ និងអន្តរជាតិ ដែលរួមគ្នាជាង ១៤០អង្គការ នឹងសាមគ្គីគ្នាបន្តយុទ្ធនាការ គ្រប់រូបភាព នៅពេលឆាប់ៗខាងមុខនេះ ដើម្បីរកអន្តរាគមន៍ ដាក់សម្ពាធទៅរដ្ឋាភិបាល បញ្ឈប់ការដាក់សម្ពាធលើប្រព័ន្ធតុលាការ ដើម្បីផលប្រយោជន៍នយោបាយ ដែលជាទង្វើរំលោភសិទ្ធិមនុស្សធ្ងន់ធ្ងរ «ប្រព័ន្ធតុលាការនៅស្រុកខ្មែរយើងហ្នឹង គាត់មិនហ៊ានធ្វើអ្វីដោយ មិនតាមបញ្ជាពីថ្នាក់លើ របស់គាត់ទេ តាមខ្សែបក្សរបស់គាត់ទេ។ អញ្ចឹងបើមានសម្ពាធពីមជ្ឈដា្ឋនជាតិ ពីប្រជាពលរដ្ឋខ្មែរ កាន់តែច្រើនឡើងៗ ហើយពីសហគមន៍អន្តរជាតិនោះ ការផ្តល់នូវយុត្តិធម៌ នោះនឹងបានប្រសើរ នឹងមានការប្រែប្រួល»។
សម្រាប់ ប្រធានបណ្តាញព្រះសង្ឃឯករាជ្យ ដើម្បីយុត្តិធម៌សង្គម ព្រះតេជគុណ ប៊ុត ប៊ុនតេញ មានសង្ឃដីកាថា ក្នុងយុទ្ធនាការទាមទារយុត្តិធម៌ដល់អ្នកទាំង២៣នាក់ ព្រះអង្គ នឹងបន្តការតស៊ូធម្មយាត្រា ធម្មទេសនាផ្សេងៗ ដើម្បីពន្យល់ដល់មនុស្សលោកយល់ច្បាស់ពីសច្ចៈភាព និងតថភាពសង្គម ដើម្បីសេចក្តីសុខដល់ខ្មែរទាំងពួង។ ព្រះតេជគុណ មានសង្ឃដីកាជូនដំណឹងថា នៅថ្ងៃទី១៧ ខែកុម្ភៈខាងមុខនេះ ព្រះអង្គ នឹងចាប់ផ្តើមយុទ្ធនាការទាំងនេះ នៅសហគមន៍បឹងកក់ វេលាម៉ោង៩ព្រឹក។
ជុំវិញករណីនេះ អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍សំណូមពរដល់ប្រជាពលរដ្ឋ សហគមន៍ជាតិ និងអន្តរជាតិ ជៀសវាងការប្រមូលផ្តុំ ឬធ្វើបាតុកម្មនានា។ លោកថា អាជ្ញាធរ នឹងបន្តអនុវត្តបម្រាប បំបែករាល់ការប្រមូលផ្តុំនានា ដោយសារស្ថានការណ៍កម្ពុជា នៅមិនទាន់វិលទៅរកប្រក្រតីភាពពេញលេញនៅឡើយ «បាតុកម្មតវ៉ានេះ តវ៉ានោះអី ស្នើសុំមតិជាតិ អន្តរជាតិ មេត្តាយោគយល់ និងអធ្យាស្រ័យ ព្រោះថាសភាពការណ៍នេះ បច្ចុប្បន្ននេះ មិនទាន់អាចសុំផ្អាកប្រជាពលរដ្ឋសិន រង់ចាំសភាពការណ៍វិលមករកភាពប្រក្រតី ហើយសេចក្តីប្រកាសព័ត៌មាននេះ នៅជាផ្លូវការនៅឡើយទេ»។
កន្លងមក ប្រជាសហគមន៍ដីធ្លី សកម្មជនសិទ្ធិមនុស្ស សហជីព និងអង្គការសង្គមស៊ីវិលជាតិ-អន្តរជាតិ បានធ្វើយុទ្ធនាការនានា និងបានដាក់ញត្តិទៅស្ថានទូតបរទេសប្រចាំប្រទេសកម្ពុជា ដើម្បីទាមទារឲ្យដោះលែងអ្នកជាប់ឃុំទាំង២១នាក់ និងទម្លាក់បទចោទទៅលើអ្នកទាំង២៣នាក់ ដោយឥតលក្ខខណ្ឌ។ តែទោះយ៉ាងណា កាលពីថ្ងៃអង្គារម្សិលមិញ សាលាឧទ្ធរណ៍ បានសម្រេចបដិសេធបណ្តឹងសុំនៅក្រៅឃុំរបស់ពួកគេ ហើយក្រោយការប្រកាសសេចក្តីរបស់សាលាឧទ្ធរណ៍ ក្រុមមេធាវី១០រូបរបស់អង្គការសង្គមស៊ីវិល និងសហជីព បានដាក់បណ្តឹងសារទុក្ខទៅតុលាការកំពូល នៅម៉ោង៣រសៀលថ្ងៃដដែល ដោយបញ្ជាក់ថា ការសម្រេចរបស់សាលាឧទ្ធរណ៍ ទៅលើបណ្តឹងសុំនៅក្រៅឃុំរបស់អ្នកទាំង២១នាក់នោះ មិនមានលក្ខណៈត្រឹមត្រូវទៅតាមមាត្រាច្បាប់ ក្នុងការសំអាងហេតុ៕
No comments:
Post a Comment