ពលរដ្ឋ អះអាង ថា មានការកាប់ឈើ នៅដែនជម្រកសត្វព្រៃ ភ្នំឱរ៉ាល់
បទល្មើសព្រៃឈើនៅដែនជម្រកសត្វព្រៃភ្នំឱរ៉ាល់ និងដែនអភិរក្សបរិស្ថាន ស្ថិតនៅក្នុងទឹកដីស្រុកទឹកផុស ខេត្តកំពង់ឆ្នាំង កំពុងតែទទួលរងនូវការកាប់បំផ្លាញធ្ងន់ធ្ងរ។
ដោយ ជិន ជេដ្ឋា / ០២ កុម្ភៈ ២០១៤
ប្រជាពលរដ្ឋរស់នៅឃុំជៀប ស្រុកទឹកផុស ជាច្រើននាក់ បញ្ជាក់ថា ចាប់តាំងពីក្រោយការបោះឆ្នោតជ្រើសតាំងតំណាងរាស្ត្រនីតិកាលទី៥មក សកម្មភាពកាប់បំផ្លាញព្រៃឈើនៅតំបន់ទាំងពីរនេះ បានកើតមានកាន់តែច្រើនឡើង ដោយក្នុង១ថ្ងៃគេឃើញមានរទេះគោយន្តដឹកឈើចាប់ពី ៥០ ទៅ ១០០គ្រឿង។
តំណាង និងប្រជាពលរដ្ឋមួយចំនួនរស់នៅឃុំជៀប ស្រុកទឹកផុស ឲ្យដឹងនៅថ្ងៃទី២ ខែកុម្ភៈ ថា ដែនជម្រកសត្វព្រៃភ្នំឱរ៉ាល់ និងដែនរដ្ឋបាលព្រៃឈើ ស្ថិតនៅក្នុងទឹកដីស្រុកទឹកផុស នឹងត្រូវវិនាសហិនហោចក្នុងពេលឆាប់ៗខាងមុខ ប្រសិនបើអាជ្ញាធរ និងមន្ត្រីជំនាញនៅតែបណ្ដែតបណ្ដោយឲ្យកើតមានបទល្មើសបន្តទៅទៀតនោះ។
ប្រជាពលរដ្ឋម្នាក់រស់នៅឃុំជៀប ដែលថ្លែងក្នុងលក្ខខណ្ឌសុំមិនបញ្ចេញឈ្មោះឲ្យដឹងថា ឈើជាច្រើនប្រភេទត្រូវបានគេសម្រុកកាប់ និងដឹកតាមរទេះគោយន្តចេញពីប៉ែកខាងជើងនៃឃុំជៀប ដូចជានៅចំណុចចម្ការម៉ុច ស្ថិតនៅភូមិកោះខ្ទុម ដើម្បីយកទៅលក់ឲ្យឈ្មួញនៅស្រុកសាមគ្គីមានជ័យ និងបន្តបែងចែកទៅតាមដេប៉ូឈើមួយចំនួនទៀត ដូចជានៅផ្សារសាលាលេខប្រាំ ក្រុងកំពង់ឆ្នាំង និងទៅរាជធានីភ្នំពេញ ជាដើម។
ពលរដ្ឋ៖ «រាល់ថ្ងៃមានតែពីរតំបន់ទេ ដែលត្រូវដឹកចេញនោះវាមានដែនជម្រក និងដីដែលវាអត់មាននៅក្នុងដែនជម្រក។ ព្រលឹមឡើងចាប់ផ្ដើមចេញពីម៉ោង ៤ រហូតដល់ម៉ោង ១២ (ព្រឹក) អាហ្នឹងចេញ ហើយដល់ពេលចុះមកវិញ គឺចាប់ពីម៉ោង ១២មករហូតទៅទល់ម៉ោង១ ឬម៉ោង ២យប់។ ខ្ញុំជម្រាបប្រភេទដែលត្រូវដឹកហ្នឹង គឺកូនឈើដំសំបក និងអុសស្ដែរ (អុសគីប) ឡធ្យូង រ៉ឺម៉កក៏មានអីក៏មានថាសព្វគ្រប់បែបយ៉ាងទាំងអស់។ ឈើប្រណីតឥឡូវហ្នឹងវាស្កកបន្តិចហើយ ឈើប្រណីតតាមខ្ញុំដឹងអត់សូវដឹកថ្ងៃទេ គេដឹកតែយប់ៗទេឥឡូវនោះ»។
ទាក់ទងនឹងបញ្ហានេះ នាយផ្នែករដ្ឋបាលព្រៃឈើខេត្តកំពង់ឆ្នាំង លោក ស៊ិន កុសល បានឆ្លើយតបយ៉ាងខ្លីថា បទល្មើសព្រៃឈើអាចកើតមាននៅដែនអភិរក្សបរិស្ថាន ស្ថិតនៅក្រោមការគ្រប់គ្រងរបស់មេព្រៃ ឬនៅដែនរដ្ឋបាលព្រៃឈើ ក៏ប៉ុន្តែសម្រាប់ដែនរដ្ឋបាលព្រៃឈើ ខាងលោកកំពុងតែចាត់វិធានការហើយ។
យ៉ាងណាអភិបាលស្រុកទឹកផុស លោក សោម វឺន មានប្រសាសន៍ថា ការកាប់អុសពិតជាកើតមានមែននៅក្នុងដែនជម្រកសត្វព្រៃភ្នំឱរ៉ាល់ ក៏ប៉ុន្តែអុសទាំងនោះគឺជាប្រភេទអុសក្រាក់ ឬដើមឈើងាប់ៗប៉ុណ្ណោះ ហើយក៏ពុំមានសកម្មភាពដឹកជញ្ជូនច្រើនដូចការចោទប្រកាន់នោះដែរ៖ «បាទ! អត់មានទេ មានតែគោយន្តបន្តិចបន្តួច អ្នកស្រុកគាត់កាប់អុសកាប់អីហ្នឹងណា។ នៅកាប់ក្បាលស្រែគាត់នៅអែបដែនជម្រក ហើយនិងក្រាក់ដែលវារលំៗហ្នឹង គាត់ទៅសុំគេនៅក្នុងដែនជម្រកហ្នឹងយកមកធ្វើអុស»។
ប្រធានគម្រោងនៃអង្គការបង្កើនសមត្ថភាពសហគមន៍ដើម្បីអភិវឌ្ឍន៍ (CCD) អ្នកស្រី សេង គឹមស្រ៊ឺ ថ្លែងថា តំណាងនិងប្រជាពលរដ្ឋតែងតែទទួលរងនូវការគំរាមកំហែងពីអាជ្ញាធរ និងមន្ត្រីជំនាញនៅពេលណាដែលពួកគាត់ហ៊ានចេញមុខ ឬរាយការណ៍ពីបទល្មើសផ្សេងៗទៅអង្គការក្រៅរដ្ឋាភិបាល និងបណ្ដាញផ្សព្វផ្សាយព័ត៌មាននានា៖ «ប្រសិទ្ធភាពនៃការបង្ក្រាបឃើញរយៈពេលទើបឆ្នាំ២០១២ ឆ្នាំ២០១៣ ហ្នឹង ហាក់ដូចជាវាលែងមានប្រសិទ្ធភាពទៅវិញ។ គិតថាទី១ ទាក់ទងនឹងកត្តាការគំរាមកំហែងរបស់សហគមន៍ពេលដែលគាត់រាយការណ៍ទៅ អាការអន្តរាគមន៍ហ្នឹងវាយឺតយ៉ាវធ្វើឲ្យសហគមន៍បាក់ទឹកចិត្ត អ៊ីចឹងការចូលរួមរបស់ពួកគាត់ហ្នឹងលែងមានការចូលរួម។ ហើយមួយទៀត បន្ទាប់ពីគាត់បាក់ទឹកចិត្ត គាត់ចាប់ផ្ដើមទិញឧបករណ៍បំផ្លាញ ដូចរណារដូចអីហ្នឹង គាត់គិតថាបើគាត់មិនរកគាត់នៅតែអត់ អ៊ីចឹងគាត់ចាប់ផ្ដើមទិញអាឧបករណ៍ហ្នឹងឡើងវិញទៅជាគាត់ហ្នឹងបំផ្លាញខ្លួនឯងវិញ»។
បណ្ដាញសហគមន៍ព្រៃឈើនៅស្រុកសាមគ្គីមានជ័យ និងស្រុកទឹកផុស សរុបប្រមាណជា ៧០នាក់ មានគម្រោងជួបប្រជុំគ្នានៅថ្ងៃទី៦ ខែកុម្ភៈ ឆ្នាំ២០១៤ នៅភូមិតានៃ ឃុំជៀប ដើម្បីពិភាក្សារកដំណោះស្រាយ និងចាត់វិធានការការពារព្រៃឈើនៅតាមមូលដ្ឋានរបស់ពួកគាត់ ដែលប្រឈមនឹងការបាត់បង់ស្ទើរទាំងស្រុងទៅហើយនោះ៕
No comments:
Post a Comment