ជនពាក់ព័ន្ធកាប់ឈើក្នុងព្រៃសហគមន៍ឡៅកា ក្រុងសែនមនោរម្យ ខេត្តមណ្ឌលគិរី ចាប់បានកាលពីថ្ងៃទី១៥ ខែកុម្ភៈ ឆ្នាំ២០១៤។
Adhoc Photo
ពលរដ្ឋ ដាក់ពាក្យប្ដឹង ឲ្យតុលាការ ផ្ដន្ទាទោស អ្នកកាប់ឈើ ក្នុងតំបន់ ព្រៃអភិរក្ស
ដោយ រដ្ឋា វិសាល / អាស៊ីសេរី | ១៧ កុម្ភៈ ២០១៤
សហគមន៍ជនជាតិដើមភាគតិចការពារព្រៃឈើខេត្តមណ្ឌលគិរី រាយការណ៍ថា សកម្មភាពលួចកាប់ឈើប្រណិតធ្វើអាជីវកម្មខុសច្បាប់កើតមានកាន់តែច្រើននៅក្នុងព្រៃសហគមន៍អភិរក្ស។ ចំណែកសមត្ថកិច្ចជំនាញពាក់ព័ន្ធមិនបានយកចិត្តទុកដាក់ជួយទប់ស្កាត់ករណីនេះទេ ថែមទាំងដោះលែងជនពាក់ព័ន្ធដែលសហគមន៍ចាប់បញ្ជូនទៅឲ្យមន្ត្រីជំនាញកសាងសំណុំរឿងទៅតុលាការដើម្បីផ្ដន្ទាទោសទៀតផង។
ប្រជាពលរដ្ឋសមាជិកសហគមន៍ការពារព្រៃឈើឡៅកា ខេត្តមណ្ឌលគិរី បានដាក់ពាក្យប្ដឹងទៅតុលាការខេត្តឲ្យផ្ដន្ទាទោសអ្នកកាប់ឈើក្នុងតំបន់ព្រៃសហគមន៍អភិរក្ស ក្រោយពេលអាជ្ញាធរធ្វើមិនដឹងមិនឮក្នុងការបង្ក្រាបបទល្មើសកាប់ឈើ។
កាលពីថ្ងៃទី១៦ កុម្ភៈ កន្លងទៅ សមាជិកការពារព្រៃសហគមន៍បាននាំគ្នាអមដំណើររថយន្តមួយគ្រឿងផ្ទុកដោយឈើប្រណិតមានឈើធ្នង់ និងបេង ចំនួន ៤៣ដុំ មកប្រគល់ជូនមន្ទីរបរិស្ថានខេត្តមណ្ឌលគិរី ដើម្បីរក្សាទុកជាវត្ថុតាងនៃបទល្មើសព្រៃឈើសហគមន៍បង្ក្រាបបាន។
តំណាងសហគមន៍អ្នកស្រី ក្វើង ទុំ មានប្រសាសន៍បញ្ជាក់ថា សហគមន៍មានការលំបាកណាស់ ក្រោយការបង្ក្រាបនេះ ពីព្រោះសមត្ថកិច្ចជំនាញដែនជម្រកសត្វព្រៃនៅតំបន់នោះ មិនបានសហការល្អទាក់ទិនការបង្ក្រាបនេះទេ ថែមទាំងបានដោះលែងជនពាក់ព័ន្ធដឹកជញ្ជូនឈើ និងមិនបានរក្សាទុកវត្ថុតាងបានត្រឹមត្រូវឡើយ។
អ្នកស្រីបន្តថា ក្រុមសហគមន៍បានលើកគ្នាហែហមរថយន្តនិងឈើចេញពីព្រៃមកប្រគល់ជូនមន្ត្រីមន្ទីរបរិស្ថាន ប៉ុន្តែមិនមានមន្ត្រីណាយកចិត្តទុកដាក់ធ្វើកំណត់ហេតុទទួលវត្ថុតាងនោះទេ ហេតុនេះ សហគមន៍សម្រេចរៀបចំពាក្យប្ដឹងតាមផ្លូវតុលាការដោយខ្លួនឯង ដើម្បីសុំឲ្យស្ថាប័នយុត្តិធម៌នេះស្វែងរកជនពាក់ព័ន្ធ និងអ្នកឃុបឃិតមកផ្ដន្ទាទោសតាមច្បាប់។
អ្នកស្រី ក្វើង ទុំ៖ «ទូរស័ព្ទទៅកន្លែងមេព្រៃក៏គេអត់ទទួល ទូរស័ព្ទទៅកន្លែងតុលាការ ក៏អត់ទទួល ទម្រាំគេទទួលថ្ងៃ ចាប់បានហ្នឹងពិបាកចង់ងាប់ ទូរស័ព្ទទៅគេបិទៗ។ ចង់ឲ្យគេជួយអត់ឃើញគេជួយសោះ យូរបានមកពួកបរិស្ថានបីនាក់ ពួកខ្ញុំអង្គុយចាំក្នុងព្រៃហ្នឹងយូរមែនទែន។ អ្នកប្រព្រឹត្តបទល្មើសឆ្លៀតទៀត គំរាមពួកខ្ញុំទៀត»។
ខ្លឹមសារពាក្យបណ្ដឹងរបស់សហគមន៍ដាក់ជូនស្ថាប័នអយ្យការតុលាការខេត្តនៅថ្ងៃទី១៧ ខែកុម្ភៈ សហគមន៍បានប្ដឹងក្រុមអ្នកដឹកជញ្ជូនឈើចំនួន ៤នាក់ រួមមានឈ្មោះ សុង វិបុល ឈ្មោះ តក់ ឌីណា ឈួន ចាន និងឈ្មោះ សាយ ធឿន។
វិទ្យុអាស៊ីសេរី នៅថ្ងៃទី១៧ ខែកុម្ភៈ មិនអាចទាក់ទងប្រធានមន្ទីរបរិស្ថានខេត្តមណ្ឌលគិរី លោក ឈិត សុផល សុំអធិប្បាយបញ្ហានេះបានទេ។ ក៏ប៉ុន្តែយោងកំណត់ហេតុធ្វើឡើងដោយប្រធានសហគមន៍ លោក គិ ង៉េវ និងមានមន្ត្រីបរិស្ថាននុរក្ស លោក រ័ត្ន សារេត ចុះហត្ថលេខាឲ្យដឹងកាលពីវេលាម៉ោង ១០ និង ៣០នាទីព្រឹកថ្ងៃទី១៥ ខែកុម្ភៈ នៅចំណុច ឈីង សីអាង សហគមន៍ឡៅកា ១៩នាក់ បានជួបជន់ល្មើសចំនួន ៤នាក់កំពុងដឹកឈើប្រណិតមួយរថយន្តចំណុះ ៤ម៉ែត្រគូប។ ក្រុមសហគមន៍បានឃាត់រថយន្ត និងប្រគល់ជូនមន្ត្រីបរិស្ថាននុរក្សបីនាក់រក្សាទុកជាបណ្ដោះអាសន្ន។
ទាក់ទិនករណីនេះដែរ មន្ត្រីសម្របសម្រួលសមាគមអាដហុក ខេត្តមណ្ឌលគិរី លោក សុខ រដ្ឋា កត់សម្គាល់ថា កន្លងទៅនេះសហគមន៍ឡៅកា បានផ្ដល់ព័ត៌មានជាច្រើនមកសមាគមលោកទាក់ទិនសកម្មភាពលួចកាប់ឈើប្រណិតឈើមានតម្លៃក្នុងព្រៃសហគមន៍។
លោកបន្តថា នេះគឺជាការទទួលខុសត្រូវរបស់មន្ត្រីបរិស្ថាននុរក្សដែលបោះទីតាំងអភិរក្សព្រៃតំបន់នោះ ប៉ុន្តែបែរជាមានបទល្មើសព្រៃឈើកាន់តែច្រើនកើតមានឡើងមិនមានការទប់ស្កាត់៖ «ឡានហ្នឹងប្រជាពលរដ្ឋបានដង្ហែមកចូលក្នុងមន្ទីររួចទៅហើយ។ អ៊ីចឹងពួកគាត់ដាក់ក្នុងមន្ទីរបរិស្ថានខេត្ត។ចំណុចដែលខ្វះខាតឃើញថា មន្ត្រីបរិស្ថានមានគ្នា ៥នាក់ គាត់អត់ធ្វើកំណត់ហេតុទទួលវត្ថុតាងបទល្មើសព្រៃឈើពីប្រជាពលរដ្ឋទេ។ គាត់បែរជាយកលេសថា ប្រធាននិងអនុប្រធានមិននៅវិញ»។
ក្រុមសហគមន៍ឡៅកា កាលពីខែមករា កន្លងទៅបានដាក់ពាក្យប្ដឹងពីរករណីទៅស្ថាប័នតុលាការ ទី១ ប្ដឹងម្ចាស់កសិដ្ឋានចម្ការកៅស៊ូមានឋានៈជាអភិបាលរងខេត្តមណ្ឌលគិរី ទៅស្ថាប័នតុលាការក្នុងបទចោទថា ម្ចាស់កសិដ្ឋាននេះបានឈូសឆាយព្រៃសហគមន៍យកដី និងកាប់យកឈើផលិតជ័រទឹករបស់សហគមន៍លក់ទៅអ្នកជំនួញឈើ គឺឧកញ៉ា លឹម ប៊ុនណា និងទី២ ប្ដឹងជនពាក់ព័ន្ធលួចកាប់ឈើក្នុងព្រៃសហគមន៍ ៤នាក់ទៀត ហើយរហូតបច្ចុប្បន្នមិនទាន់ឃើញមន្ត្រីតុលាការចាត់វិធានការបែបណានៅឡើយ៕
No comments:
Post a Comment