អ្នកបឹងកក់ ត្រូវបានសមត្ថកិច្ចហាមមិនឲ្យលក់ផ្កានៅមុខសាលារាជធានី (រូបថត៖ ណាត សុភាព)
សមត្ថកិច្ចចម្រុះ បណ្តេញ អ្នកបឹងកក់ មិនឲ្យលក់ផ្កា នៅមុខសាលារាជធានីភ្នំពេញ
ដោយ៖ ណាត សុភាព | ថ្ងៃសុក្រ ទី14 ខែកុម្ភៈ ឆ្នាំ2014
សមត្ថកិច្ចចម្រុះប្រមាណ ៤០នាក់ បណ្តេញសកម្មជនបឹងកក់មិនឲ្យលក់ផ្កានៅមុខសាលារាជធានីភ្នំពេញ ដោយថា ធ្វើឲ្យប៉ះពាល់សណ្តាប់ធ្នាប់។
នៅម៉ោងជិត១០ព្រឹកនេះ ក្រុមសន្តិសុខ និងកម្លាំងសមត្ថកិច្ចជាច្រើននាក់ បានស្នើឲ្យសកម្មជនបឹងកក់ បញ្ឈប់ការលក់ផ្កានៅមុខសាលារាជធានីភ្នំពេញ ដោយថាកន្លងមក អាជ្ញាធរមិនដែលអនុញ្ញាតឲ្យប្រជាពលរដ្ឋណាម្នាក់លក់ផ្កានៅទីនោះទេ។
ជាមួយគ្នានោះដែរ ប្រធានក្រុមសន្តិសុខសាលារាជធានីភ្នំពេញ ឈ្មោះ ជៀម រដ្ឋា បានជួយទិញផ្កាអ្នកបឹងកក់ ចំនួន ១០ទង ហើយបានប្រាប់ឲ្យពួកគេចាកចេញពីមុខសាលារាជធានីភ្នំពេញ និងស្នើឲ្យបញ្ឈប់ការប្រមូលផ្តុំលក់ផ្កានេះ។ បន្ទាប់ពីការបណ្តេញចេញពីមុខសាលារាជធានីភ្នំពេញ សកម្មជនដីធ្លីនៅតំបន់បឹងកក់ជាង ១០នាក់ បានដឹកផ្កាទាំងនោះទៅលក់នៅផ្សារចាស់ និងផ្សារអូរស្សី ប៉ុន្តែត្រូវបានសមត្ថកិច្ចចម្រុះប្រមាណ ៤០នាក់នោះ ជិះរថយន្តតាមពីក្រោយ។
អ្នកស្រី បូ ស្រីពៅ សកម្មជនដីធ្លីបឹងកក់ បានឲ្យដឹងថា ពួកគាត់គ្រាន់តែសុំលក់ផ្កា៣០០ដើមនៅថ្ងៃទិវានៃក្តីស្រលាញ់នេះ ឲ្យអស់តែប៉ុណ្ណោះ ដោយយកថវិកាជួយទ្រទ្រង់សហគមន៍បឹងកក់ ក្នុងយុទ្ធនាការរកយុត្តិធម៌សម្រាប់អ្នកជាប់ឃុំទាំង២១នាក់។ អ្នកស្រី បានចាត់ទុកការតាមឃ្លាំមើលរបស់ក្រុមសមត្ថកិច្ចទាំងនោះ ថាជាការគំរាមកំហែង និងបិទសិទ្ធិសេរីភាពក្នុងការដើរហើររបស់ពួកគាត់៕
No comments:
Post a Comment