រថយន្តពេទ្យសង្គ្រោះបន្ទាន់ ត្រូវបានវាយកម្ទេចក្នុងព្រឹត្តិការណ៍ប៉ះទង្គិចគ្នានៅស្ពានក្បាលថ្នល់ កាលពីយប់ថ្ងៃទី១៥ កញ្ញា ឆ្នាំ២០១៣។
RFA/Leng Maly
តុលាការ នឹងប្រកាស សាលក្រម សំណុំរឿង ប៉ះទង្គិច នៅក្បាលថ្នល់ នៅថ្ងៃ២១ កុម្ភៈ
ដោយ ទេព សុរ៉ាវី / អាស៊ីសេរី | ១៧ កុម្ភៈ ២០១៤
នៅព្រឹកថ្ងៃទី១៧ ខែកុម្ភៈ សាលាដំបូងរាជធានីភ្នំពេញ បានបើកសវនាការជំនុំជម្រះក្តីបុរស ៦នាក់ ដែលជាប់ចោទក្នុងព្រឹត្តិការណ៍ប៉ះទង្គិចគ្នាដោយហិង្សារវាងពលរដ្ឋជាមួយសមត្ថកិច្ចនៅក្បែរស្ពានអាកាសក្បាលថ្នល់ កាលពីយប់ថ្ងៃទី១៥ ខែកញ្ញា ឆ្នាំ២០១៣។
ក្រោយពីចំណាយពេលជាង ៤ម៉ោងក្នុងការសួរដេញដោលជនជាប់ចោទ ៦នាក់ ដើមបណ្ដឹងនិងសាក្សីរួចមក ចៅក្រមជំនុំជម្រះ លោក សេង នាង សម្រេចពន្យារពេលប្រកាសសាលក្រមនេះ ដោយគ្រោងនឹងប្រកាសនៅព្រឹកថ្ងៃសុក្រ ទី២១ ខែកុម្ភៈ។
លោក ឡាញ់ មឿន ប្រាប់ចៅក្រមក្នុងបន្ទប់សវនាការថា លោកបានទៅតាមរកប្អូនប្រុសដែលគ្រោះថ្នាក់ចរាចរណ៍នៅក្បែរស្ពានអាកាសក្បាលថ្នល់។ ប៉ុន្តែស្ទះផ្លូវមិនអាចធ្វើដំណើរបាន ក៏សុំអាជ្ញាធរមានសមត្ថកិច្ចឆ្លងស្ពានក្បាលថ្នល់មករកប្អូន។ លោកបន្តថា អាជ្ញាធរមានសមត្ថកិច្ចបានបង្គាប់ឲ្យលោក និងមិត្តភក្តិម្នាក់ទៀត ឈ្មោះ វ៉ា នឿន ដាក់ដៃទាំងពីរអោបលើក្បាលជាថ្នូរអនុញ្ញាតឲ្យឆ្លងស្ពាននោះទៅរកប្អូន។ ប៉ុន្តែពេលមកដល់ក្រោមស្ពានអាកាស ស្រាប់តែកម្លាំងអាជ្ញាធរមានសមត្ថកិច្ចចាប់ឃាត់ខ្លួនពួកគេទាំងពីរនាក់។
យុវជន តាំង ជុងស៊ែង ជនជាប់ចោទម្នាក់ទៀត ប្រាប់តុលាការថា ពេលកើតហេតុនោះលោកបានឃើញកម្លាំងអាជ្ញាធរមានសមត្ថកិច្ចបាញ់គ្រាប់បែកផ្សែងជាច្រើនបំបែកក្រុមបាតុករដែលស្រែឡូឡា ហើយគេមិនបានយកដុំថ្មគប់ទៅលើអាជ្ញាធរមានសមត្ថកិច្ចដូចការចោទប្រកាន់ទេ។
ជនជាប់ចោទ ឯក ចាន់នូ ប្រាប់នៅក្រៅបន្ទប់សវនាការដោយសំណូមពរឲ្យតុលាការលើកលែងការចោទប្រកាន់ទៅលើពួកគេ ហើយថា ការចោទប្រកាន់របស់តុលាការនោះគឺផ្ទុយពីការពិតទាំងស្រុង។
កាលពីថ្ងៃទី១៥ កញ្ញា ឆ្នាំ២០១៣ ក្រុមអាជ្ញាធរមានសមត្ថកិច្ចចម្រុះរបស់រដ្ឋាភិបាលបានបាញ់រះសំដៅទៅក្រុមបាតុករ និងប្រើប្រាស់គ្រាប់បែកផ្សែងជាច្រើនគ្រាប់។ ក្នុងព្រឹត្តិការណ៍នោះ បុរសម្នាក់បានស្លាប់ភ្លាមៗនៅកន្លែងកើតហេតុ ដោយត្រូវគ្រាប់ចំក្បាល និងមនុស្ស ១៥នាក់រងរបួស ហើយមានការចាប់ និងឃុំខ្លួនមនុស្ស ៦នាក់ ក្រោមបទហិង្សា ដោយចេតនាមានស្ថានទម្ងន់ទោស និងបទធ្វើឲ្យខូចខាតដោយចេតនាមានស្ថានទម្ងន់ទោស។
បើតាមតុលាការ រឿងក្តីនេះមានក្រុមតម្រួតបទបញ្ជា ៤៨នាក់ គឺជាដើមបណ្តឹង និងជាជនរងគ្រោះផង។ ប៉ុន្តែមានក្រុមតម្រួតបទបញ្ជា ៤២នាក់ ដែលមានវត្តមាន និងអង្គុយត្រៀបត្រាក្នុងបន្ទប់សវនាការកាលពីព្រឹកថ្ងៃទី១៧ កុម្ភៈ។
តម្រួតបទបញ្ជាទាំងនោះ ត្រូវបានចៅក្រមហៅសាកសួរពីការទាមទារសំណងជំងឺចិត្ត នៅពេលដែលពួកគេអះអាងថា ត្រូវរបួសដោយការគប់ដុំថ្មពីក្រុមមនុស្សមួយក្រុមដែលអះអាងថា ជាក្រុមអនាធិបតេយ្យ។ ពួកគេបានបដិសេធទាមទារសំណងពីជនជាប់ចោទ។
ប្រធានអង្គភាពតម្រួតបទបញ្ជា លោក សុខ ខេមរិន្ទ និងជាតំណាងដើមបណ្ដឹងប្រាប់ចៅក្រមថា លោកមិនអាចកំណត់ថា ជនជាប់ចោទទាំង ៦នាក់នោះ ជាជនដៃដល់គប់ដុំថ្មទៅលើសមត្ថកិច្ចទេ ដោយសារតែពេលនោះមានមនុស្សប្រហែល ១០០នាក់ បានគប់ដុំថ្មប្រសាចទៅលើកម្លាំងសមត្ថកិច្ច ហើយពួកគេទាំងនោះក៏ក្រុមលោកមិនបានចាប់ខ្លួនដែរ។
អ្នកស្រី សាន សុគន្ធា មេធាវីការពារក្តីឲ្យជនជាប់ចោទ ៦នាក់ មកពីអង្គការលីកាដូ (Licadho) បានស្នើសុំឲ្យតុលាការលើកលែងការចោទប្រកាន់លើកូនក្តីរបស់ខ្លួនទាំងអស់ ដោយសំអាងថា ពួកគេមិនបានប្រព្រឹត្តដូចការចោទប្រកាន់។
មន្ត្រីស៊ើបអង្កេតជាន់ខ្ពស់អង្គការលីកាដូ លោក អំ សំអាត ប្រាប់ថា តាមការជជែកសួរដេញដោលរបស់តុលាការនេះ និងការអះអាងរបស់អាជ្ញាធរមានសមត្ថកិច្ចនិងសាក្សី និងចម្លើយសារភាពរបស់ជនជាប់ចោទបញ្ជាក់ថា ជនជាប់ចោទទាំង ៦នាក់ មិនជាប់ពាក់ព័ន្ធនឹងការចោទប្រកាន់ទេ ហើយពួកគេសុទ្ធតែជាអ្នកដំណើរដែលឆ្លងកាន់កន្លែងកើតហេតុដោយចៃដន្យ។
ជនជាប់ចោទទាំង ៦នាក់នោះ ត្រូវបានចោទប្រកាន់ពីបទបង្កហិង្សាដោយចេតនាមានស្ថានទម្ងន់ទោស និងបទធ្វើឲ្យខូចខាតដោយចេតនាមានស្ថានទម្ងន់ទោស។ ក្នុងចំណោមពួកគេមាន ៥នាក់ ត្រូវបានតុលាការអនុញ្ញាតឲ្យនៅក្រៅឃុំបណ្ដោះអាសន្ន។ ដោយឡែកម្នាក់ទៀត ជាជនជាតិវៀតណាម ឈ្មោះ ង្វៀន ធីដុក កំពុងជាប់ឃុំនៅពន្ធនាគារព្រៃសនៅឡើយ។ ចៅក្រមសម្រេចប្រកាសសាលក្រមសុំឲ្យជនជាតិវៀតណាម រូបនេះ នៅក្រៅឃុំបណ្ដោះអាសន្ន តាមការស្នើសុំរបស់មេធាវីនៅថ្ងៃទី២១ កុម្ភៈ គឺប្រកាសព្រមគ្នានឹងសាលក្រមជំនុំជម្រះប្រឆាំងជនជាប់ចោទទាំង ៦នាក់នោះ៕
No comments:
Post a Comment