រូបសណ្ឋាននៃទង់ជាតិកម្ពុជា ដែលមានចែងក្នុងរដ្ឋធម្មនុញ្ញ
មន្ដ្រីរាជការ និងពលរដ្ឋ នៅសៀមរាប ស្នើឲ្យ ស្ថាប័ន្ធពាក់ព័ន្ធ ពិនិត្យសញ្ញាទង់ជាតិខ្មែរ
ដោយ៖ បូ សាវី / វីអូឌី | ថ្ងៃចន្ទ ទី17 ខែកុម្ភៈ ឆ្នាំ2014
មន្ដ្រីរាជការ និងប្រជាពលរដ្ឋមួយចំនួន នៅខេត្ដសៀមរាប ស្នើឲ្យក្រុមប្រឹក្សារដ្ឋធម្មនុញ្ញ និងសា្ថប័ន្ធពាក់ព័ន្ធ ត្រួតពិនិត្យទង់ជាតិខ្មែរ ដើម្បីឲ្យពលរដ្ឋខ្លួនស្គាល់ច្បាស់ ពីសញ្ញាអត្ដសញ្ញាណជាតិ ពិតប្រាកដ ដែលពួកគេអះអាងថា អ្នកប្រើប្រាស់ទង់ជាតិខ្លះ ខុសពីនៅក្នុងច្បាប់រដ្ឋធម្មនុញ្ញ។
នៅក្នុងសៀវភៅច្បាប់រដ្ឋធម្មនុញ្ញ ត្រង់ឧបសម្ព័ន្ធទី១ បង្ហាញថា ទង់ជាតិខ្មែរ រចនាដោយមានកាំជណ្ដើរអង្គរវត្ដបីជួរ ដែលបញ្ជាក់ថា ជាទង់ជាតិសម្រាប់ប្រើជាផ្លូវការ និងជានិមិត្តសញ្ញាឲ្យប្រទេសកម្ពុជា។ ក៏ប៉ុន្ដែប្រភេទទង់ជាតិ ដែលគេយកមកប្រើប្រាស់បច្ចុប្បន្ន មានពីរប្រភេទ គឺមួយមានកាំជណ្ដើរ និងមួយទៀតអត់កាំជណ្ដើរ។
តើសញ្ញទង់ជាតិទាំងពីរប្រភេទនេះ មួយណាសម្រាប់សម្គាល់ជាតិខ្មែរពិតប្រាកដ?
គ្រូបង្រៀនថ្នាក់ទី១២ នៃវិទ្យាល័យ១០មករា ខេត្ដសៀមរាប លោក ជា សាវី ថ្លែងថា ការប្រើប្រាស់ទង់ជាតិ ដោយមិនបានពិនិត្យត្រឹមត្រូវ និងមិនច្បាស់លាស់នោះ អាចធ្វើឲ្យប៉ះពាល់ដល់ដួងព្រលឹងជាតិ និមិត្ដសញ្ញាជាតិ និងធ្វើឲ្យបរទេសយល់ច្រឡំ។ លោកទទូចឲ្យស្ថាប័នពាក់ព័ន្ធ ពិសេសក្រុមប្រឹក្សាធម្មនុញ្ញត្រួតពិនិត្យ និងកំណត់ឲ្យយកទង់ជាតិទម្រង់មួយណាពិតប្រាកដ ជៀសវាងពលរដ្ឋខ្មែរមានការភ័នច្រឡំ «ដល់ពេលឃើញចឹងទៅ ខ្លះគេចាប់អារម្មណ៍ ខ្លះទៅគេមិនចាប់អារម្មណ៍ ហើយក៏មិនមួយណាពិតប្រកដ វាច្រឡំរៀងៗខ្លួន កាលណាច្រឡំរៀងៗខ្លួន មានការប្រកែកតវ៉ាគ្នា រឺក៏មានការជជែកគ្នាជាពិសេស ធ្វើឲ្យខ្លួនយើង និងកំណត់ខ្លួនឯងមិនបាន កាលណាកំណត់ខ្លួនឯងមិនបានគឺថា វប្បធម៌រលត់ ជាតិរលាយ»។
VOD មិនទាន់អាចទាក់ទងក្រុមប្រឹក្សាធម្មនុញ្ញបាននៅឡើយទេ។ ប្រធានមជ្ឈមណ្ឌលវប្បធម៌ជាតិ និងសីលធម៌សង្គម លោក ប៉ូ សំណាង មានប្រសាសន៍ថា បញ្ហានេះ ជាកំហុសឆ្គងរបស់រដ្ឋាភិបាល និងស្ថាប័នពាក់ព័ន្ធ ដែលបណ្ដោយឲ្យរោងពុម្ព បោះពុម្ពដោយមិនបានត្រួតពិនិត្យឲ្យបានច្បាស់។ លោកបន្ដថា រដ្ឋាភិបាលត្រូវចាត់វិធានការចំពោះអ្នកបោះពុម្ព និងត្រួតពិនិត្យឡើងវិញ ជាបន្ទាន់ «បណ្តាលរដ្ដមន្ត្រីចេញបទបញ្ជារមួយ សូមឲ្យមានការទទួលខុសត្រូវចំពោះអ្នកដែរធ្វើការងារគ្រប់គ្រងខាងនិង ព្រោះថាចំពោះរឿងនេះយើងមិនដែលទទួលការផ្សព្វផ្សាយ ក៏ដូចជាក្រសួងសាសនាទេ គឺយើងឃើញថា តាំងពីឆ្នាំ១៩៩៣ រហូត ក្រសួងមិនដែលចេញបទបញ្ញាតិពីរឿងហ្នឹងទេ ហើយអ្នកដែលជាអ្នកបោះពុម្ភគាត់មិននិងដឹងថា ទង់ជាតិមានជណ្តើរប៉ុន្មានកាំ មានបាវចនារបៀបមិច ហើយទង់ជាតិនិងមានក្បាច់ក្បូរយ៉ាងមិច គាត់អត់…»។
បញ្ហាទង់ជាតិខ្មែរមានពីរប្រភេទខុសគ្នានេះ ត្រូវបានបណ្ដាញសង្គមលើកយកមកពីភាក្សាជាងមួយឆ្នាំមកហើយ ប៉ុន្តែមិនទាន់ឃើញស្ថាប័នជាតិចេញមកបកស្រាយឲ្យសាធារណជនអស់ចម្ងល់នោះទេ៕
No comments:
Post a Comment