អាងទឹកកំពីងពួយ នាខេត្តបាត់ដំបង។ រូបថតថ្ងៃទី១១ ឧសភា ឆ្នាំ២០១៣
កម្មករ សង់ប្រព័ន្ធទំនប់ បង្ហូរទឹកចូលអាងកំពីងពួយ មិនទាន់ បើកប្រាក់ឈ្នួល ៤ខែ
ដោយ សួន សុផលមុន្នី / អាស៊ីសេរី | ២២ កុម្ភៈ ២០១៤
អ្នកម៉ៅការសំណង់ ប្រព័ន្ធទំនប់បង្ហូរទឹកមួយកន្លែង នៅក្នុងខេត្តបាត់ដំបង ខកខាន ពុំបានបើកប្រាក់ឈ្នួល ជាច្រើនខែ ទៅឲ្យកម្មករ ជាច្រើននាក់។ ភាពយឺតយ៉ាវនេះ បានធ្វើឲ្យ ក្រុមកម្មករទាំងនោះ ត្អូញត្អែរ ហើយអំពាវនាវ ឲ្យសមត្ថកិច្ចពាក់ព័ន្ធ ជួយអន្តរាគមន៍ ដើម្បីឲ្យ មេការសំណង់នោះ បើកលុយ ឲ្យពួកគាត់ ឲ្យបានគ្រប់ចំនួន។
កម្មករបូមទឹក និងអ្នកបច្ចេកទេសសំណង់ចំនួន ៧នាក់ បានទាមទារឲ្យអ្នកម៉ៅការសាងសង់ប្រព័ន្ធទំនប់បង្ហូរទឹកចូលអាងកំពីងពួយ ក្នុងខេត្តបាត់ដំបង បើកប្រាក់ឈ្នួលឲ្យពួកគាត់ឲ្យឆាប់ និងគ្រប់ចំនួន។ អ្នកម៉ៅការខកខានពុំបើកប្រាក់ឈ្នួលឲ្យកម្មកររយៈពេល ៤ខែជាប់គ្នា ដែលមានទឹកប្រាក់សរុបជិត ១ម៉ឺនដុល្លារ។
កម្មករបច្ចេកទេសសំណង់ឈ្មោះ ទីន សុខគា ថ្លែងថា ប្រាក់ឈ្នួលរបស់គាត់ម្នាក់ឯងដែលមេការឈ្មោះ ធី ឡូ មិនទាន់បានបើកឲ្យគាត់ មានចំនួនជាង ៨០០ដុល្លារ៖ «គាត់ជាអ្នកបញ្ឈប់ខ្ញុំ ព្រោះអីខ្ញុំសុំច្បាប់គាត់ទៅផ្ទះ ប្រហែលជាគាត់ខឹងខ្ញុំ បញ្ឈប់ខ្ញុំពីការងារ គាត់ថា គិតគូរលុយឲ្យខ្ញុំ តែរយៈពេលជិត ៣ខែមកហើយ គាត់អត់បានគិតគូរឲ្យខ្ញុំ។ គាត់ថា គិតគូរឲ្យដែរតែខ្ញុំចាំរយៈពេល ១ខែពីរខែ ខ្ញុំចង់បានប្រាក់ខែរបស់ខ្ញុំ ព្រោះអីវាជាកម្លាំងញើសឈាមរបស់ខ្ញុំ»។
ចំណែកកម្មករ និងអ្នកបច្ចេកទេសផ្សេងទៀត ដែលមេការឈ្មោះ ធី ឡូ មិនទាន់បើកអោយនោះ ខ្លះមានជាង ៧ពាន់ដុល្លារ ខ្លះ ៥០០ដុល្លារ ៤០០ដុល្លារ និង ៣០០ដុល្លារ។ ទាក់ទិនបញ្ហានេះ មេការឈ្មោះ ធី ឡូ បានបដិសេធថា ចំនួនកម្មករដែលលោកត្រូវបិទបញ្ជីនោះ មានចំនួនតែពីរនាក់ មិនមែន ៧នាក់ដូចការលើកឡើងនោះទេ។
កន្លងទៅនេះ លោកថាមានការបើកប្រាក់ឈ្នួលឲ្យកម្មករទាំងនោះខ្លះដែរ ប៉ុន្តែប្រាក់ឈ្នួលដែលពួកគេទទួលបាននោះ ពុំមានការចុះបញ្ជីនោះឡើយ។ យ៉ាងណាក៏ដោយ លោកថា ប្រាក់ឈ្នួលទាំងនោះលោកនឹងទូទាត់នៅដើមខែមីនា៖ «ថ្ងៃ៥ និងថ្ងៃ៧ ខែមីនា ខ្ញុំត្រូវបិទបញ្ជី ត្រូវហៅគាត់មកជម្រះ ព្រោះចន្លោះបីថ្ងៃហ្នឹង ខ្ញុំត្រូវទូទាត់លុយហើយអ៊ីចឹង បញ្ជីហ្នឹងត្រូវធ្វើមុនហ្នឹងមួយថ្ងៃពីរថ្ងៃ បានអាច បើនិយាយអត់ត្រូវទូទាត់អត់បាន»។
ប៉ុន្តែ ក្រុមកម្មករ និងអ្នកបច្ចេកទេសសំណង់ទាំងនោះលើកឡើងថា ពួកគាត់ទាំង ៧នាក់ បានដឹងពីចំនួនទឹកប្រាក់ដែលត្រូវទទួលបានយ៉ាងច្បាស់ តាមរយៈពេលវេលាធ្វើការឲ្យឈ្មោះ ធី ឡូ ដែលជាមេការ។ កម្មករទាំងនោះចោទប្រកាន់មេការរូបនេះមានចេតនាអាក្រក់ ចង់កិបកេងកម្លាំងញើសឈាមរបស់ពួកគាត់។ ទន្ទឹមគ្នានេះ ក្រុមកម្មករទាំង ៧នាក់ ក៏បានដាក់ពាក្យបណ្ដឹងពីករណីមេការឈ្មោះ ធី ឡូ មិនបើកប្រាក់ឈ្នួលឲ្យពួកគាត់នេះ ទៅអាជ្ញាធរមូលដ្ឋានឲ្យជួយអន្តរាគមន៍ដូចគ្នាដែរ៕
No comments:
Post a Comment