អ្នកជំងឺ មួយចំនួន ខកចិត្ត ចំពោះមន្ទីរពេទ្យរុស៊្សី ដែលប្រកាស ព្យាបាល ជំងឺភ្នែក
ដោយ៖ ឡាយ សាមាន | ថ្ងៃចន្ទ ទី3 ខែកុម្ភៈ ឆ្នាំ2014
អ្នកជម្ងឺមួយចំនួនមកពីបណ្តាលខេត្តនានា សម្តែងការខកចិត្តចំពោះមន្ទីរពេទ្យរស្ស៊ី នៅថ្ងៃចន្ទនេះដែលប្រកាសថា មានគ្រូពេទ្យបរទេស មកព្យាបាលជំងឺភ្នែក ដោយឥតគិតថ្លៃ នៅមន្ទីរពេទ្យមិត្តភាពខ្មែរ-សូវៀត ចាប់ពីថ្ងៃទី ៣ ដល់ថ្ងសទី ៧ ខែកុម្ភៈនេះ។
ព្រះសង្ឃមកពីស្រុកបារាយណ៍ ខេត្តកំពង់ធំ ព្រះនាម ច្រឹក វុទ្ធី ឲ្យVODដឹងថា ព្រះអង្គមានជំងឺហៀរទឹកភ្នែក និងស្រវាំងភ្នែកយូរមកហើយ តែមិនមានថវិកា គ្រប់គ្រាន់ដើម្បីវះកាត់។ ប៉ុន្តែនៅពេលដឹងថាមាន គ្រូពេទ្យមកពីបរទេសព្យាបាលដោយឥតគិតថ្លៃ នៅមន្ទីរពេទ្យរុស្ស៊ីព្រះអង្គក៏និមន្តមក ប៉ុន្តែពេលមកដល់មន្ទីពេទ្យ បែរជាមិនបានទទួលការវះកាត់ទៅវិញ «អាត្មាលឺសូរតាមវិទ្យុនោះ ពេទ្យមកពីសូវៀត និងអូស្ត្រាលី ប៉ុន្តែបាននិមន្តមកដល់ មិនឃើញដូចគេផ្សព្វផ្សាយផង គ្រាន់តែថតរួចឲ្យមកទិញថ្នាំខាងក្រៅ ធម្មតា»។
ប្រធានអគារផ្នែកជំងឺភ្នែកនៃមន្ទីរពេទ្យមិត្តភាពខ្មែរ-សូវៀត លោកស្រី ឱ ធីតា មានប្រសាសន៍ ពលរដ្ឋមានការភាន់ច្រលំប៉ុណ្ណោះ។ លោកស្រីបញ្ជាក់ថា ឥឡូវនេះគ្រូពេទ្យមកពីសិង្ហបុរីចាប់ផ្តើមព្យាបាលហើយ ប៉ុន្តែមូលហេតុដែលគ្រូពេទ្យមិនវះកាត់ភ្នែកឲ្យនោះ ដោយសារតែជំងឺពួកគេមិនត្រូវវះកាត់ «ជម្រាបអញ្ចេះថា ប្រសិនអ្នកជំងឺគ្រប់រូប ប្រសិនគេមកពិនិត្យ ប្រសិនជាមើលទៅឃើញថា ត្រូវតែវះកាត់ ឬបកឬយ៉ាងម៉េច គេជម្រាបតាមហ្នឹងហើយ។ តែបើជំងឺនោះ មិនត្រូវបក មិនត្រូវវះ អត់ត្រូវធ្វើការវះកាត់នោះទេ គេឲ្យប្រើថ្នាំ»។
លោកស្រី ឱ ធីតា បន្តថា នៅថ្ងៃទី ១០ ខែកុម្ភះ នឹងមានការពិនត្យ ព្យាបាល ចំពោះអ្នកជំងឺបាតភ្នែក ដែលបណ្តាលមកពីទឹកនោមប្រៃ នៅមន្ទីរពេទ្យមិត្តភាពខ្មែរ-សូវៀត ផងដែរ។ លោកស្រី ឲ្យដឹងទៀតថានេះជាយុទ្ធនាការទី ៦ ក្នុងការព្យាបាលភ្នែកដោយឥតគិតថ្លៃលើកនេះ ដែលមន្ទីរពេទ្យមិត្តភាពខ្មែរ-សូវៀត សហការជាមួយក្រុមគ្រូពេទ្យនៃមូលនិធិក្រុមគ្រូពេទ្យអូស្ត្រាលីហៅកាត់ថា ហ្វ្រេដហាឡួស៍ (Fred Hallows Foundation) និងមានការចូលរួមរបស់ក្រុមគ្រូពេទ្យពីប្រទេសសិង្ហបុរីផងដែរ៕
No comments:
Post a Comment