ប្រជាពលរដ្ឋ រាប់រយនាក់ តវ៉ា នៅមុខស្នាក់ការ អង្គការ សហប្រជាជាតិ ប្រឆាំង រដ្ឋាភិបាលកម្ពុជា
ដោយ៖ ពៅ មេត្តា | ថ្ងៃអង្គារ ទី4 ខែកុម្ភៈ ឆ្នាំ2014
ប្រជាពលរដ្ឋខ្មែររស់នៅសហរដ្ឋអាមេរិក និងកាណាដា លើកបដាតវ៉ានិងរដ្ឋាភិបាលកម្ពុជា នៅមុខទីស្នាក់ការ អសប (រូបភាពពីបណ្តាយសង្គម)
ប្រជាពលរដ្ឋខ្មែរ នៅអាមេរិកាំងរាប់រយនាក់មកពីរដ្ឋនានារួមគ្នាជាមួយ នឹងពលរដ្ឋខ្មែរមកពីប្រទេសកាណាដា បានមកធ្វើបាតុកម្មតវ៉ានៅខាងមុខទីស្នាក់ការអង្គការសហប្រជាជាតិ ដើម្បីទាមទារឱ្យមានការបោះឆ្នោតឡើងវិញ នៅកម្ពុជានិងឱ្យបញ្ឈប់ការបង្ក្រាបលើបាតុករ។
តាមខ្សែវីដេអូក្លីបដែលបង្ហោះក្នុងបណ្តាញសង្គមហ្វេសប៊ុកបង្ហាញថា ប្រជាពលរដ្ឋខ្មែរសហរដ្ឋអាមេរិក និងប្រទេសកាណាដារាប់រយនាក់ បានប្រមូលផ្តុំនៅមុខស្នាក់ការអង្គការសហប្រជាជាតិជាតិនៅទីញូយ៉ក នៅថ្ងៃចន្ទម្សិលមិញ។
ប្រជាពលរដ្ឋដែលតវ៉ានោះបានលើកបដាមួយចំនួន មានសរសេរអក្សរថា យើងត្រូវការយុត្តិធម៌ ត្រូវការបោះឆ្នោតឡើងវិញ បញ្ឈប់ការប្រើយោធាបាញ់សម្លាប់ប្រជាពលរដ្ឋ បញ្ឈប់ការប្រើហិង្សាលើបាតុកម្មអហិង្សា លោក ហ៊ុន សែន ត្រូវចុះចេញ តុលាការព្រហ្មទណ្ឌអន្តរជាតិគួរស៊ើបអង្កេតនៅកម្ពុជាជាដើម។
ក្នុងពេលបាតុកម្មនោះក៏មានបង្ហាញពីរូបថតសន្លឹក និងរូបភាពខ្សែវីដេអូ ពីសកម្មភាពហិង្សា ដែលយោធាបាញ់បង្ក្រាបលើកម្មករ នៅថ្ងៃទី២ និងទី៣ នៅតំបន់សេដ្ឋកិច្ចពិសេសភ្នំពេញ និងនៅតាមបណ្តោយផ្លូវវ៉េងស្រេង រួមទាំងសកម្មភាពបង្ក្រាបលើបាតុកររបស់គណបក្សសង្គ្រោះជាតិ នៅទីលានប្រជាធិបតេយ្យនៅថ្ងៃទី៤ ខែមករា ផងដែរ៕
No comments:
Post a Comment