សិក្ខាសាលាផ្សព្វផ្សាយរបាយការណ៍ស្ដីពីកម្រិតនៃការទទួលបានសៀវភៅគោលរបស់សិស្ស នៅព្រឹកថ្ងៃទី១២ ខែកុម្ភៈ ឆ្នាំ២០១៤។
សង្គមស៊ីវិល៖ ក្រសួងអប់រំ ផ្ដល់សៀវភៅមេរៀន ជូន សិស្សថ្នាក់វិទ្យាល័យ មិនគ្រប់គ្រាន់
ដោយ ដែន អយុធ្យា / អាស៊ីសេរី | ១២ កុម្ភៈ ២០១៤
អង្គការសង្គមស៊ីវិលធ្វើការពាក់ព័ន្ធយុវជន បានរកឃើញថា ការចែកជូនសៀវភៅសិក្សាគោល ឬសៀវភៅមេរៀនជូនសិស្សានុសិស្សនៅតាមវិទ្យាល័យរបស់ក្រសួងអប់រំ សាលាភាគច្រើនមិនទាន់បានទទួលសៀវភៅមេរៀនគ្រប់មុខវិជ្ជានៅឡើយទ។ បញ្ហាខ្វះខាតនេះ មន្ត្រីក្រសួងអប់រំ អះអាងថា នឹងកែលំអ ឬផ្តល់សៀវភៅឲ្យបានគ្រប់មុខវិជ្ជានាថ្ងៃអនាគត។
វិទ្យាស្ថានខ្មែរសម្រាប់អភិវឌ្ឍន៍ជាតិ និងសម្ព័ន្ធគណនេយ្យភាពសង្គមអាស៊ីបូព៌ា និងប៉ាស៊ីហ្វិក បានផ្សព្វផ្សាយរបាយការណ៍ស្ដីពីកម្រិតនៃការទទួលបានសៀវភៅសិក្សាគោល ឬសៀវភៅមេរៀន មិនគ្រប់មុខវិជ្ជានៅតាមវិទ្យាល័យ បាននាំឲ្យប៉ះពាល់ដល់ការសិក្សារបស់សិស្សធ្ងន់ធ្ងរ។
របាយការណ៍ចេញផ្សាយថ្ងៃទី១២ ខែកុម្ភៈ បានបង្ហាញថា ការសួរសំណួរទៅលើសិស្សានុសិស្សរៀននៅវិទ្យាល័យចំនួន ៣៣សាលា ក្នុងរាជធានី-ខេត្តចំនួន៤ បានរកឃើញថា សិស្សចំនួន ៩៩% បានឆ្លើយថា ការទទួលបានសៀវភៅមេរៀនគ្រប់មុខវិជ្ជា គឺមានសារសំខាន់បំផុតសម្រាប់ការសិក្សារបស់ពួកគេ។
បញ្ហានេះ សិស្សានុសិស្សនៅវិទ្យាល័យមួយចំនួន បានទទួលស្គាល់ថា ពួកគេពិតជាមិនទទួលបានសៀវភៅមេរៀនគ្រប់មុខវិជ្ជាពិតមែន ព្រោះសាលាមិនមានសៀវភៅឲ្យខ្ចីគ្រប់ ១១មុខវិជ្ជា តាមកម្មវិធីសិក្សារបស់ក្រសួងអប់រំ កំណត់ទេ។
ផ្ដើមពីបញ្ហានេះ លោក សន ជ័យ តំណាងសម្ព័ន្ធគណនេយ្យភាពសង្គមអាស៊ីបូព៌ា និងប៉ាស៊ីហ្វិក ប្រចាំប្រទេសកម្ពុជា បានរកឃើញថា មានសៀវភៅមេរៀនលើមុខវិជ្ជាខ្លះមានលក់នៅលើទីផ្សារ។ លោកថា ការដែលមានសៀវភៅមេរៀនរបស់ក្រសួងអប់រំ មានលក់នៅលើទីផ្សារ ទំនងជាអាចបណ្ដាលមកពីអំពើពុករលួយរបស់បុគ្គលិកអប់រំ។ មន្ត្រីសង្គមស៊ីវិលរូបនេះ បានស្នើដល់ថ្នាក់ដឹកនាំក្រសួងអប់រំ ឲ្យជួយពិនិត្យ និងមានវិធានការ ធ្វើយ៉ាងណាត្រូវផ្តល់សៀវភៅមេរៀនតាមវិទ្យាល័យនៅទូទាំងប្រទេស ឲ្យបានគ្រប់មុខវិជ្ជានាថ្ងៃអនាគត។
ទាក់ទិនបញ្ហានេះ លោក លឹម សុត្ថារិទ្ធ ប្រធានការិយាល័យ និងផ្គត់ផ្គង់សៀវភៅគោលនៃក្រសួងអប់រំ មានប្រសាសន៍ថា ការផ្តល់សៀវភៅមេរៀនលើមុខវិជ្ជាខ្លះ ពិតជាមិនទាន់បានគ្រប់ចំនួនពិតមែន។ ប៉ុន្តែ ទិសដៅនៅថ្ងៃអនាគត ក្រសួងមានផែនការផ្តល់ជូនសៀវភៅមេរៀនលើគ្រប់មុខវិជ្ជា ចាប់ពីថ្នាក់មូលដ្ឋានដល់ថ្នាក់វិទ្យាល័យ៖ «នៅក្នុងគោលនយោបាយស្ដីពីសៀវភៅសិក្សាគោលនេះ យើងបាននិយាយដែរថា បច្ចុប្បន្ននេះ យើងបានប្រើរូបមន្ត ១លើ២ បានន័យថា សៀវភៅមួយឈុតសម្រាប់សិស្សពីរនាក់។ អ៊ីចឹងទៅពេលអនាគត នៅពេលដែលយើងអាចមានលទ្ធភាព យើងអាចផ្លាស់ប្ដូរទៅរូបមន្ត ១លើ១ នៅក្នុងគោលនយោបាយយើងនិយាយអ៊ីចឹង គឺក្នុងរយៈពេលវែង។ បញ្ហាទប់ស្កាត់ក្រោយទទួលបានរបាយការណ៍ពីការលក់សៀវភៅមេរៀននៅលើទីផ្សារ គឺក្រសួងអប់រំ បានធ្វើលិខិតផ្សព្វផ្សាយទប់ស្កាត់ និងហាមមិនឲ្យលក់សៀវភៅមេរៀននៅលើទីផ្សារទៀតទេ»។
លោក រ៉ុង ឈុន ជាប្រធានសមាគមគ្រូបង្រៀនកម្ពុជាឯករាជ្យ។ លោកបានចាត់ទុកការផ្តល់សៀវភៅមេរៀនមិនបានគ្រប់ចំនួន នៅតាមគ្រប់កម្រិតនៅទូទាំងប្រទេស អាចបណ្ដាលមកពីអំពើពុករលួយ ផ្ដើមដោយបុគ្គលិកអប់រំ។ ព្រោះកន្លងមក លោករកឃើញថា មានសៀវភៅមេរៀនរបស់ក្រសួងអប់រំ មាននៅលើទីផ្សារលក់សៀវភៅ៖ «បញ្ហាកង្វះខាតសៀវភៅគោល សៀវភៅសិក្សាសម្រាប់សិស្ស និងគ្រូបង្រៀន មិនថាតែនៅថ្នាក់វិទ្យាល័យទេ គឺនៅគ្រប់កម្រិតសិក្សាទាំងអស់ ដែលមិនបានផ្តល់សៀវភៅឲ្យសិស្សានុសិស្ស និងគ្រូបង្រៀនបានគ្រប់គ្រាន់។ បញ្ហាហ្នឹងហើយ នាំឲ្យប៉ះពាល់ទៅដល់ដំណើរការសិក្សា។ ការលួចសៀវភៅទៅលក់នៅលើទីផ្សារ ហើយមិនបានយកទៅចែកចាយទៅដល់សិស្សានុសិស្ស និងគ្រូបង្រៀន»។
យ៉ាងណាក៏ដោយ មន្ត្រីសង្គមស៊ីវិលបានលើកជាអនុសាសន៍ថា ការខ្វះខាតសៀវភៅសិក្សាគោល ឬសៀវភៅមេរៀនផ្តល់ជូននៅតាមសាលាមិនគ្រប់ចំនួន គួរតែក្រសួងអប់រំ និងក្រសួងសេដ្ឋកិច្ច បង្កើនថវិកាជាតិសម្រាប់កម្មវិធីសៀវភៅសិក្សាគោលឲ្យបានច្រើនថែមទៀត ជាពិសេសត្រូវពង្រឹងប្រព័ន្ធគ្រប់គ្រង និងចែកចាយសៀវភៅមេរៀនឲ្យបានត្រឹមត្រូវនាថ្ងៃអនាគត៕
No comments:
Post a Comment