អាជ្ញាធរ ខេត្តស្ទឹងត្រែង រងការចោទ ថា ជំរិតប្រាក់ ពីពលរដ្ឋ ដឹកឈើ ដោយរទេះគោយន្ត
ប្រជាពលរដ្ឋ នៅស្រុកសៀមប៉ាង ខេត្តស្ទឹងត្រែង អះអាងថា សកម្មភាព កាប់ឈើ ធ្វើអាជីវកម្ម ខុសច្បាប់ កើតមានអនាធិបតេយ្យ នៅតំបន់ក្បែរព្រំដែន ប្រទេសឡាវ ក៏ប៉ុន្តែ ក្រុមសមត្ថកិច្ច បង្ក្រាប តែប្រជាពលរដ្ឋ ចូលព្រៃ កាប់ឈើតូចតាច ដឹកតាមរទេះគោយន្ត។ ចំណែក រថយន្ត ដឹកជញ្ជូនឈើខុសច្បាប់ ទ្រង់ទ្រាយធំៗ របស់ ក្រុមហ៊ុនមួយចំនួន នៅតំបន់នោះ មិនឃើញមានការបង្ក្រាបឡើយ។
ដោយ រដ្ឋា វិសាល / អាស៊ីសេរី | ០៤ កុម្ភៈ ២០១៤
ប្រជាពលរដ្ឋរស់នៅស្រុកសៀមប៉ាង ខេត្តស្ទឹងត្រែង នៅថ្ងៃអង្គារ ទី៤ ខែកុម្ភៈ ចោទប្រកាន់ក្រុមសមត្ថកិច្ចមាន យោធាការពារព្រំដែន និងកងរាជអាវុធហត្ថស្រុកសៀមប៉ាង ថាបានជំរិតប្រាក់ពីពលរដ្ឋអ្នកដឹកជញ្ជូនឈើដោយរទេះគោយន្តម្នាក់ៗ ៨០០ដុល្លារ។
កាលពីចុងសប្ដាហ៍មុននេះ អ្នកភូមិ ៨នាក់ រស់នៅភូមិខិ និងភូមិកំភោគ ត្រូវបានសមត្ថកិច្ចយោធាការពារព្រំដែន និងកងរាជអាវុធហត្ថស្រុក រឹបអូសរទេះគោយន្ត ៨គ្រឿង ក្នុងបទចោទថា អ្នកភូមិដឹកជញ្ជូនឈើចេញពីព្រៃធ្វើអាជីវកម្មខុសច្បាប់ ហើយតម្រូវឲ្យអ្នកភូមិបង់ប្រាក់ម្នាក់ ១ពាន់ដុល្លារ។
ប្រជាពលរដ្ឋមួយរូបសុំមិនបញ្ចេញឈ្មោះ រៀបរាប់ថា ក្រោយការសម្របសម្រួល សមត្ថកិច្ចយល់ព្រមឲ្យអ្នកភូមិប្រគល់ប្រាក់ ៨០០ដុល្លារ ជាថ្នូរនឹងប្រគល់រទេះគោយន្តមកប្រជាពលរដ្ឋវិញ។ ប្រជាពលរដ្ឋដដែលសម្ដែងទុទ្ទិដ្ឋិនិយមថា ការបង្ក្រាបរបស់ក្រុមសមត្ថកិច្ចធ្វើឡើងចំពោះតែប្រជាពលរដ្ឋតូចតាចគ្មានអំណាច៖
«គេថាដឹកឈើខុសច្បាប់ គេនិយាយអ៊ីចឹង ប៉ុន្តែការងារពិតនោះ ប្រជាជនគេឃើញក្រុមហ៊ុនវាធ្វើនោះ វាក៏នាំគ្នាធ្វើគគ្រឹកគគ្រេងដែរ។ គេចាប់បីថ្ងៃហើយ គេថាថ្ងៃនេះក្រុមសមត្ថកិច្ចគេយកលុយអស់ ហើយគេថាគេជូនគោយន្តគ្នា ៦គ្រឿងទាំងអស់ហ្នឹង»។
ទាក់ទិនការអះអាងនេះ មន្ត្រីស្រុកសៀមប៉ាង មួយរូបសុំមិនបញ្ចេញឈ្មោះកត់សម្គាល់ដែរថា ឈើមានតម្លៃនៅក្បែរតំបន់ព្រំដែនឡាវ ក្នុងស្រុកសៀមប៉ាង ត្រូវបានគេជួលកម្មករអាររំលំ ហើយអារច្រៀកជាឈើជ្រុងធំៗ ប្រើប្រាស់រថយន្តធំៗដឹកជញ្ជូនទៅស្តុកទុកនៅការដ្ឋានក្រុមហ៊ុននៃគម្រោងបោសសម្អាតអាងស្តុកទឹកនៃទំនប់វារីអគ្គិសនីសេសានក្រោម២ ដើម្បីនាំចេញក្រោមរូបភាពប្រមូលឈើបានពីការបោសសម្អាតផ្ទៃអាង។
វិទ្យុអាស៊ីសេរី នៅថ្ងៃទី៤ ខែកុម្ភៈ មិនអាចទាក់ទងអភិបាលស្រុកសៀមប៉ាង លោក ស៊ី សួន សុំអធិប្បាយពីករណីនេះបានទេ។
ចំណែកមេបញ្ជាការយោធាខេត្តស្ទឹងត្រែង លោក ស្វាយ ញ៉ន បដិសេធថា ក្រុមយោធាការពារព្រំដែនមិនមានពាក់ព័ន្ធបង្ក្រាប ឬចាប់រទេះគោយន្តប្រជាពលរដ្ឋនោះទេ។ លោកបញ្ជាក់ថា សមត្ថកិច្ចចម្រុះនៃអាជ្ញាធរខេត្ត គឺជាអ្នកបង្ក្រាបករណីនេះ ក៏ប៉ុន្តែលោកមិនបានបញ្ជាក់ពីហេតុផលនៃការទារប្រាក់ពីប្រជាពលរដ្ឋថាយ៉ាងណាឡើយ៖ «អាហ្នឹងកិច្ចការងារចម្រុះរបស់គណៈបញ្ជាការឯកភាពខេត្ត មិនមែនកិច្ចការរបស់យោធាខ្ញុំទេ។ ចំណុះមានមេព្រៃ រដ្ឋបាលព្រៃឈើ មានប៉ូលិសប៉េអិម»។
អ្នកឃ្លាំមើលសិទ្ធិមនុស្សនៅខេត្តស្ទឹងត្រែង កត់សម្គាល់ថា កន្លងទៅ ការអនុវត្តច្បាប់របស់សមត្ថកិច្ចនៅតំបន់នោះមានការរើសអើង និងពុករលួយ។
មន្ត្រីសម្របសម្រួលសមាគមអាដហុក ខេត្តស្ទឹងត្រែង លោក ហូ សំអុល ទទួលស្គាល់ថា ការអង្កេតរបស់លោកឃើញថា សកម្មភាពកាប់ឈើអនាធិបតេយ្យនៅស្រុកសៀមប៉ាង ពិតជាកើតមានច្រើន។ លោកអំពាវនាវឲ្យអង្គភាពប្រឆាំងអំពើពុករលួយ ស៊ើបអង្កេតករណីនេះ ជាពិសេសករណីចាប់រទេះគោយន្តប្រជាពលរដ្ឋយកប្រាក់៖ «បើសិនជាមានការឃុបឃិតគ្នាសម្រួលគ្នាដោយការយកលុយ អ៊ីចឹងមានន័យថា អាហ្នឹងចូលទៅនិទ្ទណ្ឌភាពនៃការរួចទោស ហើយច្បាប់ប្រឆាំងអំពើពុករលួយ គឺវាពុករលួយបាត់ទៅហើយ»។
ប្រមុខរាជរដ្ឋាភិបាល កាលពីឆមាសទី២ឆ្នាំ២០១៣ បានសម្រេចឲ្យផ្អាកសកម្មភាពកាប់ឈើបោសសម្អាតផ្ទៃអាងស្តុកទឹកនៃគម្រោងសាងសង់ទំនប់វារីអគ្គិសនីសេសានក្រោម២ នៅខេត្តស្ទឹងត្រែង បន្ទាប់ពីបទល្មើសព្រៃឈើអនាធិបតេយ្យកើតច្រើនតំបន់នោះ។
ទោះជាយ៉ាងនេះក្តី វិទ្យុអាស៊ីសេរី មិនអាចទាក់ទងនាយខណ្ឌរដ្ឋបាលព្រៃឈើខេត្តស្ទឹងត្រែង សុំបញ្ជាក់ពីករណីនេះបាននៅឡើយ៕
No comments:
Post a Comment