ប្រជាពលរដ្ឋអះអាងថា ពួកគេធ្វើចំណាកស្រុកដោយសារការងារនៅស្រុកខ្មែរបានប្រាក់ខែតិច ដែលមិនអាចយកមកដោះស្រាយជីវភាពប្រចាំថ្ងៃឲ្យប្រសើរបាន។
នៅតាមបណ្ដាស្រុកនានា ក្នុងខេត្តព្រៃវែង ជាពិសេសភូមិ ឃុំនៅតាមទីជនបទតែម្ដង សព្វថ្ងៃសង្កេត ឃើញពុំសូវមានមនុស្សពេញវ័យច្រើនដូចពេលមុនៗឡើយ។
ក្រុមប្រជាពលរដ្ឋបានរៀបរាប់បញ្ជាក់ថា មូលហេតុដែលពុំមានមនុស្សពេញ វ័យនៅតាមភូមិឃុំច្រើន ដូចសព្វដង ដោយសារពួកគេទាំងនោះ បានធ្វើចំណាកស្រុកទៅស្វែងរកការងារធ្វើនៅប្រទេសថៃ អស់ទៅហើយ។ ក្នុងនោះក៏មានប្រជាពលរដ្ឋខ្លះទៅធ្វើការងារតាមរោងចក្រនានា នៅក្នុងរាជធានីភ្នំពេញដែរ ប៉ុន្តែមិនច្រើនដូចអ្នកធ្វើចំណាកស្រុកទៅរកការងារនៅប្រទេសថៃ នោះទេ។
ពលរដ្ឋជាសាច់ញាតិរបស់អ្នកធ្វើចំណាកស្រុកទៅធ្វើការនៅប្រទេសថៃម្នាក់ លោក ស៊ិន ឡេង រស់នៅឃុំពោធិ៍ទី នៃស្រុកស៊ីធរកណ្ដាល ថ្លែងបញ្ជាក់ថា មូលហេតុដែលក្រុមអ្នកភូមិបានធ្វើចំណាកស្រុកទៅស្វែងរកការងារធ្វើនៅប្រទេសថៃ លោកថា ដោយសារនៅប្រទេសថៃ ធ្វើការទទួលបានប្រាក់កម្រៃខ្ពស់ប្រមាណ ៣០០បាត ឬប្រហែល ១០ដុល្លារអាមេរិកក្នុងមួយថ្ងៃ។ ចំនួននេះបើធៀប នឹងប្រាក់ឈ្នួលរបស់កម្មករនៅកម្ពុជាវិញ គឺមានចំនួនប្រមាណជាង ៣ដុល្លារអាមេរិកក្នុងមួយថ្ងៃ ដែលចំនួននេះខុសគ្នារហូតដល់ ៣ដង។
លោក ស៊ិន ឡេង ថ្លែងបន្តថា បើទោះជាធ្វើការនៅប្រទេសថៃ ជួបការលំបាកក្នុងពេលធ្វើការងារខ្លះក៏ដោយ ក៏ប្រជាពលរដ្ឋនៅតែបន្តធ្វើចំណាកស្រុកទៅធ្វើការនៅប្រទេសថៃ ដដែល៖ «អូ! ខាងខ្ញុំប្រជាពលរដ្ឋទៅស្ងាត់ពីភូមិតែម្ដង ប្រជាពលរដ្ឋអត់មានទេ មានតែកម្លាំងចាស់ៗ ហើយកូនក្មេង។មួយចំនួនទៅក្មេងៗគេទៅភ្នំពេញ ទៅដេរដែរ ប៉ុន្តែ ដេរ ឧទាហរណ៍ប្រាក់ខែតិចមិនអាចដោះស្រាយបាន ដូច្នេះប្រុសៗភាគច្រើនទៅខាងថៃ ប្ដីប្រពន្ធ។ នៅក្បែរខ្ញុំហ្នឹងមានអ្នកគេទៅគេមកបានទិញម៉ូតូទៅ ០១៣ ០១៤ (ម៉ូតូស៊េរីឆ្នាំ២០១៣ ២០១៤) ខ្លះគេទិញគោក្របីធ្វើផ្ទះ។ ដូច្នេះបានជាគាត់បាក់ទៅដោយសារនៅក្នុងស្រុកអត់ការងារធ្វើ»។
ស្រដៀងគ្នានេះដែរ ប្រជាពលរដ្ឋនៅឯស្រុកស្វាយអន្ទរ ម្នាក់ទៀត អ្នកស្រី គិន គាត ថ្លែងបញ្ជាក់ថា សាច់ញាតិរបស់អ្នកស្រីក៏ដូចជាប្រជាពលរដ្ឋនៅក្នុងភូមិដទៃទៀតដែរ គឺម្នាក់ៗនាំគ្នាសម្រុកទៅធ្វើការនៅប្រទេសថៃ ស្ងាត់ពីភូមិ។
អ្នកស្រី គិន គាត ថ្លែងបន្តថា ក្នុងនោះមានអ្នកភូមិខ្លះធ្វើចំណាកស្រុករហូតដល់ទៅ ៥នាក់ក្នុងមួយគ្រួសារក៏មានដែរ។ អ្នកស្រីបន្តថា អ្នកដែលធ្វើចំណាកស្រុកទាំងនោះ ពួកគេភាគច្រើនជាយុវវ័យពេញកម្លាំងដែលមានអាយុចន្លោះពី ១៨ ទៅ ៤០ឆ្នាំ៖ «ប្រាកខែគេថ្លៃគ្រាន់បើ ហើយទំនិញម្ហូបម្ហាហូបចុករបស់គេធូរថ្លៃ គេអាចនឹងទៅបាន ដល់ហើយគេនាំតែគ្នាទៅៗ។ គ្រាន់តែភូមិខ្ញុំហ្នឹងទៅយ៉ាងស្ងាត់ភូមិ សព្វថ្ងៃនៅតែយាយតាចាស់ៗ នៅមើលចៅនៅផ្ទះឡើងស្ងាត់ភូមិអស់ហើយ។ មួយភូមិខ្ញុំហ្នឹង ខ្ញុំរាប់យ៉ាងតិចថា ៤០០នាក់ទៅចុះ នៅគ្រប់តែស្រុក គ្រប់តែភូមិតែអ៊ីចឹង សុទ្ធតែអ៊ីចឹងទាំងអស់ ភូមិណាក៏ដូចភូមិណាដែរ»។
រីឯប្រជាពលរដ្ឋនៅឯឃុំថ្មពួន នៃស្រុកកញ្ជ្រៀច ម្នាក់ទៀត លោក យ៉ុន អ៊ុក មានប្រសាសន៍ថា ប្រជាពលរដ្ឋនៅក្នុងភូមិក្បែរខាង រួមទាំងសាច់ញាតិរបស់លោកផង បាននាំគ្នាធ្វើចំណាកស្រុកទៅធ្វើការនៅប្រទេសថៃ ក្នុងនោះមានទាំងអ្នកទៅធ្វើការដោយស្របច្បាប់ និងមិនស្របច្បាប់។
លោកថ្លែងបន្តថា អ្នកដែលទៅធ្វើការដោយស្របច្បាប់ ភាគច្រើនទៅតាមរយៈក្រុមហ៊ុននាំពលករទៅធ្វើការនៅប្រទេសថៃ រីឯអ្នកដែលទៅធ្វើការដោយខុសច្បាប់វិញ ភាគច្រើនពួកគេធ្វើចំណាកស្រុកតាមរយៈមេខ្យល់ ដោយបង់ប្រាក់ប្រមាណពី ៨០ ទៅ ១០០ដុល្លារអាមេរិកក្នុងម្នាក់។
លោកបន្តថា មិនខុសគ្នាទេ ទាំងអ្នកដែលទៅធ្វើការដោយស្របច្បាប់ និងមិនស្របច្បាប់កន្លងមកធ្លាប់មានទុក្ខលំបាកកើតរឿងប្ដឹងផ្ដល់គ្នា ដោយសារការធ្វើចំណាកស្រុកនេះដូចគ្នា។ លោកថ្លែងបន្តថា ប៉ុន្តែដោយសារអ្នកធ្វើចំណាកស្រុកទាំងនោះគ្មានជម្រើស ព្រោះការងាររបស់កម្មករនៅស្រុកខ្មែរ ប្រាក់ខែតិចមិនសមស្របទៅតាមតម្លៃទំនិញនៅលើទីផ្សារសព្វថ្ងៃ ដែលមិនអាចយកទៅផ្គត់ផ្គង់សម្រាប់ជីវភាពរបស់គ្រួសារកម្មករឲ្យប្រសើរបានឡើយ។
ទាក់ទងនឹងការធ្វើចំណាកស្រុកនេះ ប្រធានមន្ទីរការងារនិងបណ្ដុះបណ្ដាលវិជ្ជាជីវៈខេត្តព្រៃវែង លោក ហែម ហឿន មានប្រសាសន៍បញ្ជាក់ថា ប្រជាពលរដ្ឋនៅខេត្តព្រៃវែង ដែលបានធ្វើចំណាកស្រុក ទៅធ្វើការនៅក្រៅប្រទេសទាំងស្របច្បាប់ និងមិនស្របច្បាប់រយៈពេល ៦ខែ គឺគិតចាប់ពីខែមករា ដល់ខែមិថុនា ឆ្នាំ២០១៣ កម្មករធ្វើចំណាកស្រុកមានចំនួនប្រមាណជាង ៤ម៉ឺននាក់។
លោកថ្លែងបន្តថា ចំនួននេះភាគច្រើនជាប្រជាពលរដ្ឋដែលធ្វើចំណាក ដោយស្របច្បាប់។ រីឯអ្នកដែលធ្វើចំណាកស្រុកដោយខុសច្បាប់នោះ លោកថា ពុំបានទទួលទូរលេខបញ្ជាក់ឲ្យបានច្បាស់លាស់នៅឡើយនោះទេ ព្រោះអ្នកដែលធ្វើចំណាកស្រុកទាំងនោះច្រើនទៅតាមរយៈមេខ្យល់ដោយខុសច្បាប់។
លោក ហែម ហឿន ថ្លែងបន្តថា ទាំងអ្នកធ្វើចំណាកស្រុកដោយខុសច្បាប់ និងទាំងអ្នកទៅដោយស្របច្បាប់ ធ្លាប់មានបញ្ហាប្ដឹងឲ្យមន្ទីរការងារជួយអន្តរាគមន៍ជាច្រើនករណី ហើយបញ្ហាដែលអាចដោះស្រាយបានភាគច្រើនជាប្រជាពលរដ្ឋដែលធ្វើចំណាកស្រុកដោយស្របច្បាប់លោកថា ចំពោះអ្នកដែលធ្វើដោយខុសច្បាប់ពិបាកក្នុងការដោះស្រាយ ដោយសារមេខ្យល់ដែលនាំពលករពុំមាន ច្បាប់បញ្ជាក់ពីអាសយដ្ឋានច្បាស់លាស់។
តែយ៉ាងណា ក្រុមប្រជាពលរដ្ឋឲ្យដឹងថា អ្នកដែលធ្វើចំណាកស្រុកទៅធ្វើការនៅប្រទេសថៃ នៅក្នុងដើមឆ្នាំ២០១៤ នេះ គឺមានសន្ទុះកើនឡើងជាងឆ្នាំកន្លងទៅ ហើយពីមួយថ្ងៃទៅមួយថ្ងៃ អ្នកធ្វើចំណាកស្រុកកាន់តែមានសភាពខ្លាំងឡើងជាបន្តបន្ទាប់៕
No comments:
Post a Comment