តំណាងសហគមន៍ទន្លេបី ផ្ដល់បទសម្ភាសន៍នៅខាងមុខស្ថានទូតចិន នារាជធានីភ្នំពេញ នៅព្រឹកថ្ងៃទី១២ ធ្នូ ឆ្នាំ២០១៣។ ពលរដ្ឋយកញត្តិទៅដាក់នៅស្ថានទូតចិន ទាមទារឲ្យក្រុមហ៊ុនចិន ផ្អាកសាងសង់ទំនប់វារីអគ្គិសនីសេសានក្រោម២។
ពលរដ្ឋ ប៉ះពាល់ ដោយសារ ទំនប់វារីអគ្គិសនី សេសានក្រោម២ ឡើងមក តវ៉ា
ដោយ វោហារ ជាតិ / អាស៊ីសេរី | ១៣ កុម្ភៈ ២០១៤
តំណាងប្រជាពលរដ្ឋរងប៉ះពាល់ដោយទំនប់វារីអគ្គិសនីសេសានក្រោម២ ក្នុងខេត្តស្ទឹងត្រែង បាននាំគ្នាឡើងមកតវ៉ានៅរាជធានីភ្នំពេញ នៅថ្ងៃទី១៣ កុម្ភៈ នេះ ដើម្បីទាមទារសំណងដែលរងផលប៉ះពាល់ដោយសាររដ្ឋាភិបាលសង់ទំនប់វារីអគ្គិសនីក្នុងមូលដ្ឋានគាត់។
កញ្ញា ណែន សុគិត តំណាងប្រជាពលរដ្ឋរងផលប៉ះពាល់ឲ្យដឹងថា ការទាមទារនោះគឺសុំឲ្យរដ្ឋាភិបាល និងស្ថានទូតចិន រួមទាំងក្រុមហ៊ុនសាងសង់ទំនប់វារីអគ្គិសនីនេះ ជួយជំរុញឲ្យរដ្ឋាភិបាលចេញសងផលប៉ះពាល់ឲ្យពួកគាត់ឲ្យបានត្រឹមត្រូវ។
តំណាងប្រជាពលរដ្ឋទាំងនោះនឹងដាក់ញត្តិតាមក្រសួងពាក់ព័ន្ធមួយចំនួនដូចជា ក្រសួងសេដ្ឋកិច្ចនិងហិរញ្ញវត្ថុ ក្រសួងបរិស្ថាន ក្រសួងរ៉ែនិងថាមពល រួមទាំងដាក់ញត្តិនៅស្ថានទូតចិនទៀត ព្រោះក្រុមហ៊ុនវិនិយោគវារីអគ្គិសនីជាក្រុមហ៊ុនមកពីប្រទេសចិន។
កញ្ញាឲ្យដឹងថា ប្រជាពលរដ្ឋជាង ៥៥០គ្រួសារ មានសមាជិក ៧.០០០នាក់ នៅក្នុងខេត្តស្ទឹងត្រែង ក្នុងនោះមានជនជាតិភាគតិចផងបានរងផលប៉ះពាល់ការសាងសង់ទំនប់នេះ។
មន្ត្រីសម្របសម្រួលទន្លេបី លោក មៀច មាន ឲ្យដឹងថា មកទល់ពេលនេះប្រជាពលរដ្ឋ ១២គ្រួសារហើយដែលត្រូវជម្លៀសចេញពីភូមិតែមិនបានទទួលសំណងត្រឹមត្រូវទេ នៅពេលក្រុមហ៊ុនបានចាប់ផ្ដើមសាងសង់ទំនប់។ លោកបន្តថា នេះមិនមែនលើកទី១ទេ ដែលតំណាងប្រជាពលរដ្ឋទាំងនោះឡើងមកតវ៉ានៅភ្នំពេញ គឺពួកគាត់បានឡើងមកតវ៉ាច្រើនដងហើយតែមិនមានដំណោះស្រាយ៕
No comments:
Post a Comment