ប៉ូលិសខេត្តព្រះវិហារ បីស្ត្រីចំណាស់ឈ្មោះ ឈាវ លៀង ចាកចេញពីផ្ទះ ដាក់បញ្ចូលក្នុងឡាននាំយកទៅទីស្នាក់ការប៉ូលិស នៅពេលអនុវត្តសាលដីការបស់តុលាការកំពូលរឹបអូសដី កាលពីថ្ងៃទី១១ ខែកុម្ភៈ ឆ្នាំ២០១៤។
ស្ត្រីចំណាស់ម្នាក់ រស់នៅ តាមចិញ្ចើមថ្នល់ ក្រោយចាញ់ក្ដី រឿងដី នៅព្រះវិហារ
ដោយ ហង្ស សាវយុត / អាស៊ីសេរី | ១៦ កុម្ភៈ ២០១៤
សាលាដំបូងខេត្តព្រះវិហារ បានអនុវត្តសាលដីការបស់តុលាការកំពូល កាលពីដើមសប្ដាហ៍នេះ ដោយរឹបអូសយកដី ព្រមទាំងបណ្ដេញប្រជាពលរដ្ឋ ២គ្រួសារ ក្នុងភូមិអណ្ដូងពោធិ៍ ឱ្យចាកចេញដោយបង្ខំ។
សមាគមការពារសិទ្ធិមនុស្សអាដហុក (Adhco) បានមើលឃើញការអនុវត្តសាលដីកានោះថា គឺជាការដាក់បន្ទុកកាន់តែធ្ងន់ទៅលើប្រជាពលរដ្ឋក្រីក្រ ដែលធ្លាប់តែមានដីនិងផ្ទះសំបែងរស់នៅឱ្យក្លាយទៅជាជនអនាថាគ្មានទីជម្រក។
ស្ត្រីចំណាស់ម្នាក់ ក្នុងចំណោមគ្រួសារមួយទៀត កំពុងក្លាយខ្លួនទៅជាជនគ្មានទីជម្រក ហើយរស់នៅតាមចិញ្ចើមថ្នល់ក្នុងទីក្រុងព្រះវិហារ។ ការធ្លាក់ខ្លួនក្នុងសភាពបែបនេះ បន្ទាប់ពីសាលាដំបូងខេត្តព្រះវិហារ បានអនុវត្តសាលដីការបស់តុលាការកំពូល រឹបអូសយកដីទៅប្រគល់ឱ្យមន្ទីរសុខាភិបាល គ្រប់គ្រងជាសម្បត្តិរបស់រដ្ឋមក។
កាលពីថ្ងៃទី១១ ខែកុម្ភៈ កន្លងទៅ សាលាដំបូងបានចុះអនុវត្តសាលដីកាដោយរឹបអូសយកដីទាំងពីរប្លង់ ដែលគាត់ធ្លាប់កាន់កាប់ជិត ៣០ឆ្នាំមកហើយ ព្រមទាំងបណ្ដេញឱ្យចេញពីលំនៅឋានដោយបង្ខំទៀតផង។
អ្នកស្រី ឈាវ លៀង បានបញ្ជាក់ថា ចាប់តាំងពីអាជ្ញាធរបណ្ដេញគាត់ចេញពីលំនៅឋាន គឺគាត់ពុំមានកន្លែងផ្សេងរស់នៅទេ មានតែនៅលើចិញ្ចើមផ្លូវជាមួយនឹងចៅម្នាក់៖ «ខ្ញុំបោះតង់នៅ! ពិបាកមហាសែនពិបាកហើយ នៅតាមចិញ្ចើមផ្លូវ ខ្វះទឹក ខ្វះកន្លែងបត់ដៃបត់ជើង ណាជីវភាពក៏វាខ្វះខាតមួយចប់នេះ តែអត់ទ្រាំទៅ»។
មន្ត្រីសាលាខេត្តព្រះវិហារ បានអះអាងថា បើទោះបីជាតុលាការបានអនុវត្តសាលដីការឹបអូសយកដីរបស់ប្រជាពលរដ្ឋទាំង ២គ្រួសារនោះក៏ដោយ ក៏អាជ្ញាធរមិនព្រងើយកន្តើយក្នុងការរកដីថ្មីប្រគល់ជូនអ្នកទាំងពីរនោះទេ។
នាយកខុទ្ទកាល័យសាលាខេត្តព្រះវិហារ លោក ខូយ ឃុនហ៊ បានមានប្រសាសន៍ថា អាជ្ញាធរខេត្តបានខ្នះខ្នែងក្នុងរឿងផ្ដល់ដីថ្មីនៅក្នុងទីក្រុងសម្រាប់គ្រួសារទាំងពីរនេះ ក៏ប៉ុន្តែគ្រួសារទាំងពីរបានបដិសេធមិនព្រមយក៖ «ក្រោយពីអនុវត្តមក យើងទៅជួបគាត់ទៀត យើងនាំទៅបង្ហាញដីអីណេះ ណោះដែរ ឱ្យគាត់នៅ តែគាត់មិនយក។ គាត់ឆ្លើយជាមួយអ្នកព័ត៌មានថា ខេត្តមិនរកឱ្យ។ ឥឡូវយើងនៅតែព្យាយាមសួរគាត់ ហើយគាត់នៅតែធ្វើអ៊ីចឹង ឱ្យយើងធ្វើយ៉ាងម៉េច?»។
ក្រុមប្រជាពលរដ្ឋនិងសង្គមស៊ីវិលក្នុងខេត្តព្រះវិហារ ដែលឃើញព្រឹត្តិការណ៍អនុវត្តសាលដីការឹបអូសយកដីកាលពីថ្ងៃទី១១ ខែកុម្ភៈ នោះថា មានភាពសង្វេគ ដោយអាជ្ញាធរបានប្រើកម្លាំងចាប់ដូនចាស់រុញបញ្ចូលក្នុងឡាន និងស្រ្តីអ្នកតវ៉ាខ្លះទៀតត្រូវគេចាប់ដាក់ខ្នោះដៃ។
អ្នកសម្របសម្រួលសមាគមការពារសិទ្ធិមនុស្សអាដហុក ខេត្តព្រះវិហារ លោក ឡោ ចាន់ បានមានប្រសាសន៍ថា លោកទើបតែបានទៅសួរសុខទុក្ខស្ត្រីចំណាស់ អាយុ ៧០ឆ្នាំ បន្ទាប់ពីតុលាការរឹបអូសយកដីនោះ។ គាត់គ្មានផ្ទះសម្បែងរស់នៅផ្សេងទេ គឺកំពុងរស់នៅលើចិញ្ចើមផ្លូវ ក្រោមកំដៅថ្ងៃក្ដៅហែង ដោយខ្វះទឹក និងម្ហូបអាហារគួរឱ្យសង្វេគ។
លោក ឡោ ចាន់ បានរិះគន់ថា ការអនុវត្តច្បាប់ដែលធ្វើឱ្យប្រជាពលរដ្ឋបាត់ដីនិងផ្ទះ ហើយរស់នៅតាមចិញ្ចើមផ្លូវនេះ គឺវាផ្ទុយពីគោលការណ៍របស់រដ្ឋាភិបាល ដែលតែងអះអាងថា កំពុងបំបាត់ភាពក្រីក្រ៕
No comments:
Post a Comment