លោក វន់ ពៅ ផ្ញើសារ ជំរុញអ្នកស្នេហាជាតិ បន្តយុទ្ធនាការ ទាមទារយុត្តិធម៌
ដោយ៖ តាំង វីដា / វីអូឌី | ថ្ងៃចន្ទ ទី17 ខែកុម្ភៈ ឆ្នាំ2014
លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ផ្ញើសារពីពន្ធនាគារ បង្ហាញទឹកចិត្ត និងជំរុញឲ្យប្រជាពលរដ្ឋខ្មែរ បន្តសកម្មភាពទាមទារសិទ្ធិសេរីភាព និងយុត្តិធម៌ ដើម្បីប្រជាជាតិទាំងមូល ទៅថ្ងៃអនាគត។
សំបុត្រពីរសន្លឹកសរសេរ និងចុះហត្ថលេខាដោយលោក វន់ ពៅ នៅមណ្ឌលអប់រំកែប្រែ ម៣ ថ្ងៃទី១៤ ខែកុម្ភៈ ដែលត្រូវបានភរិយារបស់លោក គឺអ្នកស្រី ប្រាក់ សុវណ្ណារី ផ្សព្វផ្សាយ និងចែករំលែកក្នុងបណ្តាញសង្គមហ្វេសប៊ុកថ្មីៗនេះ ឲ្យដឹងថា លោក វន់ ពៅ បានដឹងយ៉ាងច្បាស់ពីយុទ្ធនាការ និងទុក្ខលំបាករបស់ពលរដ្ឋ កម្មករ និងអង្គការសង្គមស៊ីវិល ដែលបានទាមទាររកយុត្តិធម៌ទាំងក្នុង និងក្រៅប្រទេស ដើម្បីឲ្យតុលាការដោះលែងរូបលោក និងអ្នកទាំង២២នាក់ ដែលទាំងនេះស្តែងឲ្យឃើញពីឆន្ទៈមុតមោះ ដើម្បីយុត្តិធម៌ សន្តិភាពសម្រាប់ប្រទេសជាតិទាំងមូល។
ក្នុងសំបុត្រដដែលនោះ លោក វន់ ពៅ អះអាងថា បើទោះបីជាលោកកំពុងជាប់ឃុំ តែព្រលឹង ឆន្ទៈ និងស្មារតីរបស់លោក មិនត្រូវបានឃុំគ្រងឡើយ។ លោកថា ជីវិតក្នុងមន្ទីរឃុំឃាំង ផ្តល់នូវបទពិសោធន៍ជីវិតក្នុងការតស៊ូ និងជ្រាបច្បាស់ពីការរស់នៅរបស់អ្នកជាប់ឃុំ។ ក្នុងសំបុត្រ បន្តថា ទោះជាស្នាមរបួស ឈឺចាប់ពាសពេញខ្លួន ក៏មិនអាចធ្វើឲ្យលោកភ្លេចនូវការតស៊ូ ហើយសង្ឃឹមថា ថ្ងៃណាមួយ សិទ្ធិសេរីភាព នឹងត្រូវបានទទួលស្គាល់ក្រោយការលះបង់ប្រជាសហជាតិទាំងអស់។ លោក វន់ ពៅ បានចាត់ទុកថា រាល់សកម្មភាពលះបង់របស់អ្នកទាំងអស់គ្នា ចំពោះអ្នកជាប់ឃុំទាំង២១នាក់ គឺជាផ្នែកមួយនៃការលើកស្ទួយសិទ្ធិសេរីភាព និងយុត្តិធម៌សង្គម «មិនត្រឹមតែគាំទ្រគាត់ហើយរំភើពនិងពាក្យសំដីដែលគាត់សុខចិត្តពាក់លីការដើម្បីទាមទារប្រាក់ខែឪ្យប្រជាពលរដ្ដទាំងអស់ហើយបែរជាគាត់ជាប់នៅក្នុងពន្ធធានាគារទៀត យើងនៅតែខំព្យាយាមនៅអ្វីដែលយើងអាចធ្វើបានសំរាប់អ្នកស្នេហាជាតិពិតប្រាកដ»។
ភរិយាលោក វន់ ពៅ អ្នកស្រី ប្រាក់ សុវណ្ណារី សង្ឃឹមថា អ្នកដែលបានអានសំបុត្រនេះ នឹងយល់ពីទឹកចិត្ត និងការលះបង់របស់លោក វន់ ពៅ ក្នុងនាមជាអ្នកស្នេហាជាតិ និងហ៊ានចេញមុខតវ៉ាទាំងអស់គ្នា ដើម្បីយុត្តិធម៌សង្គម។
អ្នកស្រី ប្រាក់ សុវណ្ណារី ឲ្យដឹងដែរថា ថ្ងៃទី១៨ ខែកុម្ភៈ ស្អែកនះ ជាថ្ងៃកំណត់ដែលលោក វន់ ពៅ ត្រូវទៅពិនិត្យជំងឺនៅប្រទេសថៃ តាមកាលកំណត់ ប៉ុន្តែលោកមិនអាចទៅបាន ដោយសារតែលោកជាប់ឃុំ។
មន្ដ្រីស៊ើបអង្កេតសមាគមសិទ្ធិមនុស្សអាដហុក លោក ចាន់ សុវ៉េត យល់ថា សំបុត្ររបស់លោក វន់ ពៅ ឆ្លុះបញ្ចាំងពីឆន្ទៈតស៊ូ ក្នុងនាមជាអ្នកការពារសិទ្ធិមនុស្ស និងជាសារមួយទៅរដ្ឋាភិបាល ឲ្យដោះលែងរូបលោក ព្រមទាំងបញ្ចប់អំពើហិង្សាលើពលរដ្ឋខ្លួនឯង «គាត់កំពុងតែទទូចដល់រដ្ដាភិបាលដើម្បីឪ្យរដ្ដាភិបាលមើលឃើញពីបញ្ជាតុលាការ សូមឪ្យតុលាការលោក ធ្វើការដោះលែងលោកឪ្យមានសេរីភាពឡើងវិញ»។
កាលពីថ្ងៃទី១១ ខែកុម្ភៈ ក្រោយពីសាលាឧទ្ធរណ៍ បដិសេធបណ្តឹងសុំនៅក្រៅឃុំរបស់អ្នកទាំង២១នាក់ ដោយតម្កល់សេចក្តីសម្រេចសាលាដំបូងរាជធានីភ្នំពេញ ទុកជាបានការ នៅថ្ងៃដដែលនោះ ក្រុមមេធាវីអ្នកជាប់ឃុំទាំង២១នាក់ បានដាក់បណ្តឹងសារទុក្ខទៅតុលាការកំពូល ដោយអះអាងថា ការសម្រេចរបស់សាលាឧទ្ធរណ៍ មិនមានសំអាងហេតុត្រឹមត្រូវ។
ជុំវិញករណីនេះ លោក គីម សុជាតិ មេធាវីសហភាពការងារកម្ពុជាការពារក្តីលោក វន់ ពៅ ឲ្យដឹងថា នៅព្រឹកថ្ងៃចន្ទនេះ លោកបានដាក់បណ្តឹងសារទុក្ខមួយទៀតទៅតុលាការកំពូល តាមផ្នែករដ្ឋបាលសាលាឧទ្ធរណ៍ ក្រោយពីទទួលបានការផ្តិតមេដៃប្រគល់សិទ្ធិពីកូនក្តីខ្លួន គឺលោក វន់ ពៅ។ លោក ជឿជាក់ថា តុលាការកំពូល នឹងពិចារណារឿងនេះ ដោយលើកអំណះអំណាងសមរម្យ មិនប្រាសចាកពីទិដ្ឋភាពជាក់ស្តែងឡើយ «គេទៅជាសំអាងហេតុថ្មីដែលជាមិនមូលហេតុមិនដឹងតមកនេះគេថា មានសហចារីច្រើន ត្រូវសើបអង្កេតបន្តវិញ វាមិនត្រូវគ្នា ចឹងបើតុលាការកំពូលគេយកសំអាងហេតុត្រឹមត្រូវ ពិចារណាលើអង្គហេតុត្រឹមត្រូវខ្ញុំគិតថាគេលែងហើយ»។
លោក វន់ ពៅ សកម្មជនសិទ្ធិការងារ រួមនឹងសកម្មជនសិទ្ធិមនុស្ស សិទ្ធិដីធ្លី និងកម្មករ ទាំងអស់ចំនួន ២៣នាក់ ត្រូវបានអាជ្ញាធរចាប់ខ្លួន ក្នុងហេតុការណ៍ប៉ះទង្គិចរវាងសមត្ថកិច្ច និងកម្មករ កាលពីថ្ងៃទី២ និងទី៣ ខែមករា នៅពេលដែលពួកគេចូលរួមក្នុងយុទ្ធនាការទាមទារប្រាក់ឈ្នួលជូនកម្មករ ១៦០ដុល្លារក្នុង១ខែ និងត្រូវបានចោទប្រកាន់ពីបទហិង្សាដោយចេតនាមានស្ថានទម្ងន់ទោស និងបំផ្លិចបំផ្លាញទ្រព្យសម្បត្តិអ្នកដទៃ៕
No comments:
Post a Comment