ស្ត្រីម្នាក់បិតខិតបណ្ណនឹងដៃ ដើម្បីទាមទារឲ្យដោះលែងអ្នកទាំង២៣ (រូបថត៖ តាត ឧត្តម)
វិភាគ៖ បន្តឃុំសកម្មជន ការពារសិទ្ធិមនុស្ស និងកម្មករ ២១នាក់ ជារឿង ផ្លូវច្បាប់ ឬនយោបាយ?
ដោយ៖ ពៅ មេត្តា / វីអូឌី | ថ្ងៃពុធ ទី12 ខែកុម្ភៈ ឆ្នាំ2014
នៅថ្ងៃទី១១ខែកុម្ភៈ ប្រធានក្រុមប្រឹក្សាអង្គជំនុំជម្រះសាលាឧទ្ធរណ៍ លោក ឃុន លាងម៉េង បានសម្រេចតម្កល់សេចក្តីសម្រេចរបស់សាលាដំបូងរាជធានីភ្នំពេញ ដោយបដិសេធបណ្តឹងសុំនៅក្រៅឃុំ របស់អ្នកជាប់ឃុំទាំង២១នាក់។ ការសម្រេចបន្តឃុំខ្លួននេះ ចៅក្រមមានហេតុផលបីសំខាន់សំអាងថា ដើម្បីការពារសណ្តាប់ធ្នាប់សាធារណៈ ធានាដំណើរការសវនការ និងដោយសារសំណុំរឿងនេះ កំពុងស្ថិតក្នុងនីតិវិធីស៊ើបអង្កេតនៅឡើយ។
តែសំអាងហេតុផលទាំងបីចំណុចនេះ ត្រូវអង្គការសង្គមស៊ីវិល និងអ្នកច្បាប់មួយចំនួនដែលតាមដានករណីនោះ ហៅការសម្រេចរបស់សាលាឧទ្ធរណ៍ថា មិនបានផ្តល់យុត្តិធម៌ដល់ជនរងគ្រោះទេ។
ក្រោយការប្រកាសសេចក្តីសម្រេចតែប៉ុន្មានម៉ោង សមាគមអាដហុក ចេញសេចក្តីថ្លែងការណ៍ ថ្កោលទោសការសម្រេចរបស់សាលាឧទ្ធរណ៍ មិនឲ្យអ្នកទាំង២១នាក់នៅក្រៅឃុំ តាមការស្នើសុំរបស់មេធាវី និងជំរុញឲ្យមានដំណើរការស្វែងរកការពិត ដែលធ្វើឡើងដោយគណៈកម្មាធិការស៊ើបអង្កេតអង្គការសហប្រជាជាតិ។
សេចក្តីថ្លែងការណ៍របស់អង្គការអាដហុក ក៏បានជំរុញឲ្យតុលាការ ទម្លាក់បទចោទទាំងឡាយណាប្រឆាំងនឹងអ្នកទាំង២៣នាក់ ដោយផ្តល់នូវសំណងសម្រាប់ពេលវេលា ដែលពួកគេត្រូវបានឃុំដោយខុសច្បាប់។
មជ្ឈមណ្ឌលសិទ្ធិមនុស្សកម្ពុជា(CCHR) ក៏បានថ្កោលទោសចំពោះការសម្រេចរបស់ សាលាឧទ្ធរណ៍ដែរដោយសំអាងថា ធ្វើការសម្រេចមិនស្របនិងនីតិវិធីច្បាប់។ CCHR ក៏ជំរុញ ឲ្យរដ្ឋាភិបាលត្រូវសម្រួលពន្លឿន លើបណ្តឹងសារទុក្ខទៅតុលាការកំពូល ហើយគោរពច្បាប់ជាតិ និងអន្តរជាតិ ចំពោះមូលដ្ឋានសិទ្ធិមនុស្សរបស់ប្រជាពលរដ្ឋ។
តុលាការពេលសវនាការសម្រេចទោសគឺផ្អែកទៅលើអង្គហេតុ និង អង្គច្បាប់ តែអង្គការឃ្លាំមើលទាំងនេះយល់ថា ការសម្រេចនោះមិនផ្អែកលើផ្លូវច្បាប់ទេ តែបែជាពាក់ព័ន្ធរឿងនយោបាយទៅវិញ?
ប្រធានផ្នែកសិទ្ធិការងារនៃមជ្ឈមណ្ឌលអប់រំច្បាប់សម្រាប់សហគមន៍លោកមឿន តុលា ដែលបានតាមដានករណីនោះ លើកឡើងថា អ្នកទាំង២១នាក់ មិនមានធាតុផ្សំណាដែលត្រូវឃុំខ្លួនបន្តទេ។
លោក តុលា ពិនិត្យឃើញថា រឿងសម្រេចឃុំខ្លួនបន្តនោះពាក់ព័ន្ធ និងបញ្ហានយោបាយ «បើខ្ញុំចាំបាន សម្តេចតេជោ លោកបានមានប្រសាសន៍ច្បាស់ណាស់ នៅខេត្តកំពត និយាយាអំពីការប្រើឥទ្ធិពលរបស់គាត់ហ្នឹង ទៅលើតុលាការ សាលាដំបូង មិនឲ្យឃុំខ្លួនអ្នកទាំងបីនាក់។ អ្នកទាំងបីនាក់នោះគឺមាន លោក សមរង្ស៊ី លោក កឹម សុខា និងលោក រ៉ុង ឈុន ទី១។ ទី២ គាត់បាននិយាយអំពីអ្នកទាំង២៣នាក់នោះដែរ ហាក់ដូចជាគាត់បានបង្ហាញថា ទុក២៣នាក់នោះជាចំណាប់មួយ ដើម្បីឲ្យគណបក្សសង្គ្រោះជាតិហ្នឹង មកចូលរដ្ឋសភាសិន ហើយបើកផ្លូវចរចានយោបាយ»។
ប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុកលោក នី ចរិយា យល់ឃើញថា សមកម្មជនសិទ្ធិមនុស្ស និងកម្មករទាំង២១នាក់នោះ គួរទទួលបានសិទ្ធិនៅក្រៅឃុំ ព្រោះពួកគេមិនស្ថិតក្នុងលក្ខខណ្ឌដូចការលើកឡើងរបស់ចៅក្រមទេ «ទី២ ការឃុំខ្លួនបណ្តោះអាសន្ននេះ មិនមែនជាលក្ខខណ្ឌពិសេស មិនមែនជាលក្ខណៈពិសេសដែលត្រូវតែ ធ្វើការឃុំខ្លួនបណ្តោះអាសន្ន យោងតាមច្បាប់ស្តីពីនីតិវិធីព្រហ្មទណ្ឌទេ ហើយក៏គ្មានហេតុផលណា បង្ហាញថា អ្នកទាំងនោះដែលចេញមកធ្វើឲ្យប៉ះពាល់ ធ្ងន់ធ្ងរទៅនឹងសណ្តាប់ធ្នាប់សាធារណៈដែរ ហើយក៏គ្មានហេតុផលណា បង្ហាញថាអ្នកទាំង២៣នាក់នោះ គេចវេសពីការបង្ហាញខ្លួន នៅដំណាក់កាលនៃតុលាការដែរ»។
កាលពីថ្ងៃទី០៧ ខែកុម្ភៈ កន្លងទៅនេះ សាលាដំបូងរាជធានីភ្នំពេញ បានសម្រេចឲ្យកម្មករពីរនាក់ ឈ្មោះ ប៊ូ សារិទ្ធ អាយុ ២៧ឆ្នាំ និងឈ្មោះ ផុន សុខជា អាយុ១៧ឆ្នាំ នៅក្រៅឃុំបណ្តោះអាសន្ន។ អ្នកទាំង២១នាក់ ដែលនៅសេសសល់នោះ រួមមាន លោកវន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក ថេង សាវឿន មន្ត្រីសម្របសម្រួលបណ្តាញកសិករ លោក ចាន់ ពុទ្ធីស័ក្ក សកម្មជនបឹងកក់នោះ និងកម្មករ១៧នាក់ ត្រូវបានចោទប្រកាន់ពីបទហិង្សាដោយចេតនាមានស្ថានទម្ងន់ទោស និងបំផ្លិចបំផ្លាញទ្រព្យសម្បត្តិអ្នកដទៃ។
អ្នកទាំង២៣នាក់ ត្រូវសមត្ថកិច្ចចាប់ខ្លួនកាលពីថ្ងៃទី២ និងទី៣ខែមករា ពេលដែលពួកគេធ្វើបាតុកម្មទាមទារ ដំឡើងប្រាក់ឈ្នូលឲ្យឡើងដល់១៦០ដុល្លារ។
បើទោះជាចៅក្រមសម្រេចបន្តឃុំខ្លួន ដោយសំអាងលើការរក្សាសន្តិសុខធារណៈ និង ធានាដំណើរការរឿងក្តី ដែលផ្អែកលើធាតុច្បាប់ មិនពាក់ព័ន្ធលើរឿងនយោបាយក៏ដោយ តែកាលពីសប្តាហ៍មុន នាយករដ្ឋមន្ត្រី ហ៊ុន សែន បានថ្លែងពេលចែសញ្ញាបត្រដល់និស្សិតនៅរាជធានីភ្នំពេញដោយព្រមានដល់អ្នកតវ៉ាដំឡើងប្រាក់ខែកុំឲ្យជាប់ពាក់ព័ន្ធនឹងរឿងនយោបាយ «ការទាមទារណា ឲ្យវាទាមទារហ្នឹងឲ្យប្រាកដ កុំឲ្យមានរឿងនយោបាយទៅពាក់ព័ន្ធ កុំទៅចូលក្នុងរោងចក្រគេ បំផុសស្អីអញ្ចេះអញ្ចោះ ឲ្យវាត្រូវតាមច្បាប់ តាមទម្លាប់ទៅ រឿងនយោបាយ ឲ្យវារឿងនយោបាយ រឿងប្រាក់ខែ ឲ្យវានៅរឿងប្រាក់ខែទៅ»។
ការព្រមានរបស់លោកនាយករដ្ឋមន្ត្រី ក៏ធ្វើឡើងស្របពេលដែលការតវ៉ាទាមទារដំឡើងប្រាក់ខែរបស់កម្មករ កាលពីថ្ងៃទី២ និង ទី៣ខែមករាធ្វើឡើងទន្ទឹមនឹងបាតុកម្មរបស់ គណបក្សសង្គ្រោះជាតិ ដែលទាមទារឲ្យបោះឆ្នោតឡើងវិញ។ សន្ទុះនៃការទាមទារដំឡើងប្រាក់ខែគោលដល់១៦០ដុល្លារ ក៏ស្របទៅនឹងការសន្យារបស់មេដឹកនាំគណបក្សសង្គ្រោះជាតិ ដែលថ្លែងថា ហ៊ានប្រគល់ប្រាក់ខែគោលឲ្យកម្មករ១៦០ដុល្លារបើខ្លួនឈ្នះឆ្នោតដឹកនាំប្រទេស។
ចំណុចគាប់ជួនទាំងនេះ នាំឲ្យអ្នកតាមដានបញ្ហាសង្គមយល់ ការសម្រេចបន្តឃុំខ្លួនអ្នកទាំង២១នាក់នោះ ជារឿងនយោបាយ។
លោក មឿន តុលា ការបន្តថា ឃុំខ្លួនអ្នកទាំង២១នាក់នោះនាំឲ្យ ប្រជាពលរដ្ឋផ្ទុះកំហឹងតវ៉ាច្រើនឡើង និង នាំអន្តរជាតិឈប់ទិញផលិតផលពីកម្ពុជា ដោយពួកគេយល់ថា ក្រុមហ៊ុន នៅកម្ពុជាបានរំលោភសិទ្ធិទៅលើកម្មករ៕
No comments:
Post a Comment