រដ្ឋមន្រ្តី ក្រសួងវប្បធម៌ ជំរុញ ឲ្យលើកកម្ពស់ និងការពារ វប្បធម៌ជាតិ ខណៈកម្ពុជា កំពុងរងនូវលំហូរចូល នៃវប្បធម៌ បរទេស
ដោយ៖ កាន់ វិច្ឆិកា | ថ្ងៃអង្គារ ទី4 ខែកុម្ភៈ ឆ្នាំ2014
ពិធីបូកសរុបការងាររបស់ក្រសួងវប្បធម៌ (រូបថត កាន់ វិច្ឆិកា)
រដ្ឋមន្ត្រីក្រសួងវប្បធម៌ និងវិចិត្រសិល្បៈ ជំរុញឲ្យប្រជាជនកម្ពុជាទាំងអស់រួមគ្នាបន្តការយកចិត្តទុកដាក់ថែរក្សា លើកកម្ពស់ និងការពារសម្បត្តិវប្បធម៌ឲ្យបានគង់វង្ស ខណៈលំហូរចូលនៃវប្បធម៌បរទេស និងផលប៉ះពាល់ធ្ងន់ធ្ងរមួយចំនួន បាននឹងកំពុងគំរាមកំហែងដល់វប្បធម៌ជាតិ។
ថ្លែងក្នុងឱកាសបើកសន្និបាតបូកសរុបលទ្ធផលការងារឆ្នាំ២០១៣ និងលើកទិសដៅសកម្មភាពការងារឆ្នាំ២០១៤ នៅព្រឹកថ្ងៃអង្គារនេះ រដ្ឋមន្ត្រីក្រសួងវប្បធម៌ និងវិចិត្រសិល្បៈ លោកស្រី ភឿង សកុណា មានប្រសាសន៍ថា សម្បតិ្តវប្បធម៌ដ៏មានតម្លៃមហាសាល បានទទួលរងផលប៉ះពាល់យ៉ាងខ្លាំងក្នុងរយៈកាលប៉ុន្មានទស្សវត្សកន្លង មកនេះ ដោយសារកត្តាធម្មជាតិ និងកត្តាមនុស្ស តាមរយៈការលួចគាស់កកាយ ការលួចធ្វើចរាចរដោយខុសច្បាប់ ព្រមទាំងលំហូរចូលនូវវប្បធម៌អវិជ្ជមានពីបរទេស។ លោកស្រីបន្តថា កត្តាទាំងនេះ គឺជាផលប៉ះពាល់ធ្ងន់ធ្ងរដល់វប្បធម៌ជាតិ ដែលទាមទារឲ្យយើងទាំងអស់គ្នា រួមគ្នាលើកកម្ពស់ និងបន្តការយកចិត្តទុកដាក់ថែររក្សា និងការពារសម្បតិ្តវប្បធម៌ទាំងនោះ ឲ្យបានគង់វង្សស្របតាមគោលដៅកម្ពុជា ព្រះរាជាណាចក្រនៃវប្បធម៌។
លោកស្រី ភឿង សកុណា ក៏បានថ្លែងបន្តថា ក្រសួងបានរៀបចំដាក់ចេញផែនការសកម្មភាពចំនួន៣ជាអាទិភាព ដើម្បីពង្រឹងទំនាក់ទំនងជាលក្ខណៈអន្តរវិស័យ និងអន្តរភារកិច្ច នៃមជ្ឈដ្ឋាននានាក្នុងសង្គ រួមមាន ទី១ ពង្រឹងពង្រីកសក្តានុពលវប្បធម៌ ឲ្យក្លាយជាកម្លាំងចលករប្រកបដោយប្រសិទ្ធភាព ក្នុងការរួមចំណែកអភិវឌ្ឍសេដ្ឋកិច្ចជាតិ ទី២ ពង្រឹងពង្រីកការអប់រំ ផ្សព្វផ្សាយ ការច្នៃប្រឌិត និងការបង្កើនទីផ្សារ និងទី៣ ពង្រឹងពង្រីកសមត្ថភាពស្ថាប័ន ភាពជាដៃគូអភិវឌ្ឍដើម្បីបង្កើនប្រសិទ្ធភាពសេវា៕
No comments:
Post a Comment