សហជីព៩ នឹងធ្វើកូដកម្មជាថ្មីទៀត បើគណៈកម្មការប្រឹក្សាការងារមិនដំឡើងប្រាក់ឈ្នួល១៦០ដុល្លារ
ដោយ៖ ឡាយ សាមាន | ថ្ងៃអង្គារ ទី4 ខែកុម្ភៈ ឆ្នាំ2014
លោក រ៉ុង ឈុន ប្រធានសហភាពសហជីពកម្ពុជា (រូបថតដោយ ជន ស្រីណុច)
សហព័ន្ធសហជីពចំនួន៩ បង្ហាញជំហរថា នឹងដឹកនាំធ្វើកូដកម្មទាមទារដំឡើងប្រាក់ឈ្នួលអប្បបរមា ១៦០ដុលា្លរ ប្រសិនបើគណៈកម្មការប្រឹក្សាការងារ បើកកិច្ចប្រជុំស្តីពីប្រាក់ឈ្នួលគោល នៅថ្ងៃស្អែកនេះ មិនមានផលវិជ្ជមាននោះ។
ក្នុងសិក្ខាសាលាពិគ្រោះយោបល់របស់សហជីព ស្តីពីការសម្របសម្រួលរប្រាក់ឈ្នួលអប្បបរមា នៅថ្ងៃទី ០៤ ខែកុម្ភៈ នេះ មេដឹកនាំសហព័ន្ធសហជីព៩ នោះក៏បានជំរុញឲ្យមានការបង្កើតគណៈកម្មការ ប្រាក់ឈ្នួលសម្រាប់ក្រុមសហជីពផងដែរ។ ប្រធានសហភាពសហជីពកម្ពុជា លោក រ៉ុង ឈុន ថ្លែងថា ប្រសិនបើការប្រជុំនៅថ្ងៃស្អែក មិនមានលទ្ធផលសមរម្យទេនោះ សហព័ន្ធសហជីពទាំង៩ នឹងដាក់លិខិតជូនដំណឹងទៅអាជ្ញាធរពាក់ព័ន្ធ ក្នុងការធ្វើការប្រមូលផ្តុំធ្វើកូដកម្មឡើងវិញ។
ប្រធានសហព័ន្ធសហជីព នៃឧស្សាហកម្មវាយនភណ្ឌកាត់ដេរកម្ពុជាលោកស្រី ម៉ម ញឹម មានប្រសាសន៍ថា ការប្រជុំរបស់គណៈកម្មការប្រឹក្សាការងារនៅថ្ងៃស្អែកនេះ មិនមានភាពឯករាជ្យ ដោយមិនមានការចូលរួមពីសហជីព និងតំណាងកម្មករចូលរួមដើម្បីពិគ្រោះយោបល់គ្នា។
អគ្គលេខាធិការ ក្រុមប្រឹក្សាសហជីពជាតិកម្ពុជា របស់លោកជួន មុំថុល ដែលតែងគាំទ្ររាល់សេចក្តីសម្រេចរបស់រដ្ឋាភិបាលនោះ ថ្លែងថា ការដំឡើងប្រាក់ឈ្នួល ត្រូវគិតអំពីការប្រកួតប្រជែង និងគិតពីការទាក់ទាញអ្នកវិនិយោគផងដែរ។
កម្មកររាប់ម៉ឺននាក់ នៅបណ្តារោងចក្រនានា បានផ្ទុះបាតុកម្មព្រមៗគ្នាក្នុងទ្រង់ទ្រាយធំ មិនទទួលយកការដំឡើងប្រាក់ឈ្នួលត្រឹម១០០ដុល្លារ ដោយកម្មករទាមទារដល់១៦០ដុល្លារ ៕
No comments:
Post a Comment