លោក នាយករដ្ឋមន្រ្តី ហ៊ុន សែន និង លោក សម រង្ស៊ី ប្រធានគណបក្សសង្គ្រោះជាតិ ក្នុងកិច្ចប្រជុំកំពូលនៅរដ្ឋសភា ថ្ងៃទី១៦ កញ្ញា ឆ្នាំ២០១៣
RFI/Siv Channa
គណបក្សប្រជាជន និង គណបក្សសង្គ្រោះជាតិ ត្រៀមជួបគ្នា
ក្រោយការបន្ទន់ជំហររៀងៗខ្លួន រវាង គណបក្ស ប្រជាជនកម្ពុជា ដែលកំពុងកាន់អំណាច និងគណបក្ស សង្គ្រោះជាតិ ដែលជាបក្ស ប្រឆាំងធំបំផុត គណបក្សទាំងពីរ បានរៀបចំ សមាសភាពម្ខាងបីនាក់រៀងខ្លួន រួចរាល់ហើយ ដើម្បីជជែក ពីកំណែទម្រង់ ការបោះឆ្នោត ទាំងមូល។ ការបោះឆ្នោត ដែលគណបក្សទាំងពីរ បានព្រមព្រៀង តាំងពី ខែកញ្ញាមក ប៉ុន្តែ គាំងដំណើរ រហូតដល់ ពេលបច្ចុប្បន្ន។
នៅទីបំផុតទៅសមាសភាពកំណែទម្រង់ការបោះឆ្នោតរវាងគណបក្សសង្គ្រោះជាតិ និងគណបក្សប្រជាជនកម្ពុជា បានលេចចេញជារូបរាងហើយនៅពេលនេះ។ សមាសភាពមកពីគណបក្សសង្គ្រោះជាតិមានបីរូប គឺ លោក សុន ឆ័យ លោក គួយប៊ុនរឿន និងលោកយ៉ែម បុញ្ញាឫទ្ធិ នេះបើតាមការបញ្ជាក់របស់អ្នកនាំពាក្យគណបក្សសង្គ្រោះជាតិ លោក យឹម សុវណ្ណ ដែលបានថ្លែងប្រាប់វិទ្យុបារាំងអន្តរជាតិនៅថ្ងៃសុក្រនេះ។
ដោយឡែកគណបក្សប្រជាជនកម្ពុជាបានឱ្យដឹងថាខ្លួនក៏ ត្រៀមសមាសភាពចំនួនបីរូប ជួបជាមួយបក្សសង្គ្រោះជាតិរួចហើយដែរ។ សមាសភាពដែលនឹងចូលរួមជជែកនោះ គឺមានលោកព្រុំ សុខា រដ្ឋលេខាធិការក្រសួងមហាផ្ទៃដែលធ្លាប់ដឹកនាំក្រុមបច្ចេកទេសចរចាមកពីគណបក្សប្រជាជនកន្លងមក។ នេះបើតាមការបញ្ជាក់របស់លោក ជាម យៀប សមាជិកជាន់ខ្ពស់របស់គណបក្សប្រជាជនកម្ពុជា ដែលបានថ្លែងប្រាប់វិទ្យុបារាំងអន្តរជាតិនៅល្ងាចថ្ងៃសុក្រនេះ។
បើទោះបីជាមិនទាន់កំណត់ថ្ងៃជួបគ្នាជាក់លាក់ក៏ដោយ លោកព្រុំ សុខា បានថ្លែងសាទរចំពោះការបញ្ជូនសមាសភាពពីគណបក្សសង្គ្រោះជាតិនេះ ហើយថានេះជាសញ្ញាណវិជ្ជមានដើម្បីស្វែងរកយន្តការកំណែទម្រង់ការបោះឆ្នោត ដែលត្រូវការពេលវេលាមិនអាចអូសបន្លាយតទៅទៀត និងថាជាកំណែទម្រង់ស្មុគស្មាញ។
សូមបញ្ជាក់ថា ការព្រមព្រៀងរៀបចំសមាសភាពជួបចរចាគ្នារវាងបក្សទាំងពីរនេះ គឺក្រោយពេលដែលគណបក្សជាប់ឆ្នោតទាំងពីរបានថ្លែងការណ៍ឆ្លើយឆ្លងចោទប្រកាន់គ្នាទៅវិញទៅមកស្តីពីសមាសភាព បង្កើតគណៈកម្មការស្រាវជ្រាវកំណែទម្រង់ការបោះឆ្នោត។
គណបក្សសង្គ្រោះជាតិចោទបក្សកាន់អំណាចរបស់លោកនាយករដ្ឋមន្ត្រីហ៊ុន សែនថា រំលោភកិច្ចព្រមព្រៀងរវាងបក្សទាំងពីរកាលពីខែកញ្ញាកន្លងទៅដោយបង្កើតគណៈកម្មការដែលមានតែសមាសភាពបក្សប្រជាជានកម្ពុជា។ ប៉ុន្តែគណបក្សប្រជាជនកម្ពុជាវិញ បានចោទបក្សប្រឆាំងរបស់លោក សម រង្ស៊ីថា បានផ្លាស់ប្តូរប្រធានបទ និងលក្ខខណ្ឌនៃការទាមទារជាបន្តបន្ទាប់ ធ្វើឱ្យកិច្ចពិភាក្សាកំណែទម្រង់ការបោះឆ្នោត ត្រូវអូសបន្លាយរហូតដល់ពេលបច្ចុប្បន្ន។
បើទោះបីជាបែបណាក៏ដោយ ការបង្កើតសមាភាពចរចារវាងបក្សទាំងពីរនេះស្តីពីកំណែទម្រង់ការបោះឆ្នោត គឺគ្រាន់តែជំហ៊ានតូចមួយតែប៉ុណ្ណោះ ប៉ុន្តែអ្វីដែលសំខាន់នោះគឺថាតើបក្សទាំងពីរនឹងមានសុឆន្ទៈ ឈានដល់ការសម្រេចយន្តការកំណែទម្រង់ការបោះឆ្នោតពិតប្រាកដដែរឬទេ ដើម្បីជៀសវាងវិបត្តនយោបាយក្រោយការបោះឆ្នោតនោះ៕
No comments:
Post a Comment