CNRP នៅអាមេរិក រៀបចំតវ៉ា ជាទ្រង់ទ្រាយធំ នៅមុខ អង្គការ សហប្រជាជាតិ នៅថ្ងៃចន្ទ ស្អែក
ដោយ៖ ពៅ មេត្ដា / វីអូឌី | ថ្ងៃអាទិត្យ ទី2 ខែកុម្ភៈ ឆ្នាំ2014
គណបក្សសង្គ្រោះជាតិនៅទ្វីបអាមេរិកខាងជើងរៀបចំការការតវ៉ាជាទ្រង់ទ្រាយធំ នៅថ្ងៃចន្ទស្អែកនេះ នៅមុខអង្គការសហប្រជាជាតិ ដើម្បីប្រឆាំងសកម្មភាពរដ្ឋាភិបាលកម្ពុជាបង្ក្រាបលើកកម្មករ និងទាមទារឲ្យមានការបោះឆ្នោតឡើងវិញ។
សេចក្តីជូនដំណឹងរបស់គណបក្សសង្គ្រោះជាតិនៅទ្វីបអាមេរិកខាងជើង បានឲ្យដឹងថា ការតវ៉ាជាទ្រង់ទ្រាយធំនៅថ្ងៃចន្ទស្អែកធ្វើឡើងនៅមុខអង្គការសហប្រជាជាតិចាប់ពីម៉ោង១១:៣០នាទី ដល់ ២:៣០នាទីរសៀល។ ក្នុងសេចក្តីជូនដំណឹងនោះ អំពាវនាវឲ្យសាធារណជនចូលរួមឲ្យបានច្រើន ដើម្បីស្វែងរកយុត្តិធម៌សម្រាប់ប្រជាពលរដ្ឋក្នុងប្រទេសកម្ពុជា។
ក្នុងសេចក្តីជូនដំណឹងក៏បានភ្ជាប់នូវពាក្យមួយចំនួនដូចជា យើងត្រូវការយុត្តិធម៌ ត្រូវការបោះឆ្នោតឡើងវិញ បញ្ឈប់ការប្រើយោធាបាញ់សម្លាប់ប្រជាពលរដ្ឋ បញ្ឈប់ការប្រើហិង្សាលើបាតុកម្មអហិង្សា លោក ហ៊ុន សែន ត្រូវចុះចេញ តុលាការព្រហ្មទណ្ឌអន្តរជាតិគួរស៊ើបអង្កេតនៅកម្ពុជាជាដើម។
ក្នុងសេចក្តីជូនដំណឹងនោះ ក៏មានភ្ជាប់រូបថតសន្លឹក និងខ្សែវីដេអូ ពីសកម្មភាពហិង្សា ដែលយោធាបាញ់បង្ក្រាបលើកម្មករ នៅថ្ងៃទី២ និងទី៣ នៅតំបន់សេដ្ឋកិច្ចពិសេសភ្នំពេញ និង នៅតាមបណ្តោយផ្លូវវ៉េងស្រេង រួមទាំងសកម្មភាពបង្ក្រាបលើបាតុកររបស់គណបក្សសង្គ្រោះជាតិនៅទីលានប្រជាធិបតេយ្យនៅថ្ងៃទី៤ ខែមករា ផងដែរ៕
No comments:
Post a Comment