កន្លែងផ្ទុកសំរាមរបស់ក្រុមហ៊ុន GEA EA រងការរិះគន់ពីប្រជាពលរដ្ឋនៅខេត្តសៀមរាប (រូបថត៖ បូ សាវី)
ពលរដ្ឋ រកអន្ដរាគមន៍ អភិបាលខេត្ដ ឲ្យប្ដូរទីតាំង ស្ដុកសំរាម ក្រុមហ៊ុន GEA EA ពីតំបន់ទេសចរណ៍ សៀមរាប
ដោយ៖ បូ សាវី / វីអូឌី | ថ្ងៃពុធ ទី19 ខែកុម្ភៈ ឆ្នាំ2014
ប្រជាពលរដ្ឋរាប់រយគ្រួសារ នៅក្រុងសៀមរាប ខេត្ដសៀមរាប រកអន្ដរាគមន៍ ពីអភិបាលខេត្ដនេះ និងស្ថាប័នពាក់ព័ន្ធ ដើម្បីឲ្យក្រុមហ៊ុនសម្អាតក្រុងឈ្មោះ ហ្គាអ៊ី អេ(GEAEA) ប្ដូរទីតាំងចេញពីតំបន់ទេសចរណ៍សៀមរាប ដែលពួកគេអះអាងថា កន្លែងស្ដុកសំរាមនោះ ជះក្លិនស្អុយ ធ្វើឲ្យប៉ះពាល់សុខភាព។
លិខិតស្នើសុំ ដែលគ្រោងដាក់ជូនអភិបាល ខេត្ដសៀមរាប លោក ឃឹម ប៊ុនសុង ដែលVODទទួលបាន នៅថ្ងៃនេះបង្ហាញថា កន្លែងចាក់សំរាមក្រុមហ៊ុនហ្គាអ៊ីអេ ស្ថិតនៅភូមិខ្នារ សង្កាត់ជ្រាវ បានជះក្លិនកាកសំណល់ស្អុយរលួយ មកលើពលរដ្ឋរាប់រយគ្រួសារ នៅក្បែរនោះជាយូរឆ្នាំមកហើយ ដែលធ្វើឲ្យប៉ះពាល់សុខភាពពួកគេជាបន្ដបន្ទាប់ ចាប់តាំងពីអាណត្ដិអភិបាលខេត្ដ លោក ស៊ូ ភិរិន្ទ មកម្ល៉េះ។
លិខិតបន្ដថា ពលរដ្ឋមួយចំនួនបានសម្រេចចិត្ដ ជួលផ្ទះគេស្នាក់នៅកន្លែងផ្សេង ដោយសារ ពួកគេមិនអាចទ្រាំនឹងក្លិនស្អុយរលួយ ពីកន្លែងចាក់សំរាមរបស់ក្រុមហ៊ុនសម្អាតក្រុងហ្គាអ៊ីអេនោះបាន។ លិខិតបញ្ជាក់ថា ពលរដ្ឋក្រីក្រ ទ្រាំរស់នៅក្បែរនោះទាំងលំបាក ជាពិសេស ស្ដ្រីមានផ្ទៃពោះ កុមារ ចាស់ជរា និងយុវជនដែលកំពុងសិក្សា។
អ្នកស្រី អ៊ូ សុភ័ណ្ឌ អះអាងថា ទឹកកក្វក់ និងក្លិនកាកសំណល់នៅកន្លែងចាក់សំរាមក្រុមហ៊ុននោះ បានជះក្លិនស្អុយ ធ្វើឲ្យពិបាកដល់ការទទួលទានអាហារ និងការរស់នៅ។ អ្នកស្រីបន្ដថា មិនត្រឹមតែប៉ុណ្ណោះ នៅពេលយប់គ្រឿងចក្រក្រុមហ៊ុន បានកកាយគំនរសំរាម រាវរកវត្ថុមានតម្លៃ ឮសំឡេងគ្រឿងចក្រខ្លាំងៗស្ទើរសំរាកមិនបាន។ អ្នកស្រីថា អ្នកស្រី និងពលរដ្ឋកំពុងផ្ដិតមេដៃ សើ្នអភិបាលខេត្ដ លោក ឃឹម ប៊ុនសុង អន្ដរាគមន៍ទៅក្រុមហ៊ុន ឲ្យប្ដូរទីតាំងចាក់សំរាមនោះ ទៅកន្លែងផ្សេង «វាប៉ះពាល់គេច្រើនពេក គេនៅមិនកើត សូម្បីហូបបាយពេលខ្លះក៏រុយវា និយាយរួមទៅ រុយវាសំបូរទៅដោយមេរោគតែម្តង ដល់ពេលអញ្ចឹង សូម្បីតែពេលយើងហូបបាយ ក៏វាមានក្លិន ក៏វាសំបូរទៅដោយរុយ ជាពិសេសទឹកដែលគាត់ស្តុកទុកនៅហ្នឹង វាហូរមក វាស្អុយ វាប៉ះពាល់ច្រើនណាស់ ឲ្យដោះដូរទៅកន្លែងផ្សេងតែម្តងទៅ ដូចជាថ្លង់ ដូចក្តុងក្តាំងកកូរកកាយ ពេលដែលកាយ ពេលដែលចាក់ហ្នឹង វាថ្លង់ វាស្អុយ»។
VOD មិនអាចទាក់ទង អភិបាលខេត្ដសៀមរាប លោក ឃឹម ប៊ុនសុង និងអ្នកនាំពាក្យ លោក ប៊ុន ថាឬទ្ធិ បាននៅឡើយទេ ដោយលោកទាំងពីរប្រាប់ថា ជាប់ប្រជុំ។ ប្រធានមន្ទីរបរិស្ថានខេត្ដ លោក លន់ កាណែល មានប្រសាសន៍ថា ករណីនេះ ក្រុមហ៊ុនសម្អាតក្រុងហ្គាអ៊ីអេ បានធ្វើកិច្ចសន្យារកវិធីសាស្ដ្រ ដើម្បីកាត់បន្ថយក្លិនកាកសំណល់នោះហើយ។ លោកបន្ដថា ប្រសិនក្រុមហ៊ុនមិនអនុវត្ដនោះ អាជ្ញាធរ នឹងមានវិធានការបន្ដទៀត «ថ្ងៃមុន មានចុះធ្វើកិច្ចសន្យា ប៉ុន្តែមិនមែនការដោះដូរទេ កិច្ចសន្យាកែប្រែ កែប្រែចំនុចអ្វីដែលធ្វើឲ្យប៉ះពាល់ដល់ប្រជាពលរដ្ឋ។ គោលការណ៍ទើបតែចេញពីរបីថ្ងៃទេបង កំពុងចាប់ផ្តើមការកែប្រែ អញ្ចឹងវាមិនទាន់មានផលអ្វីច្រើនប៉ុន្មានទេ ព្រោះខ្ញុំឆែកទៅសួរមុនហ្នឹង គាត់បានចាក់សាប ចាក់បេតុង ពេលដែលចាក់ទៅ វាក៏រួមចំនែកនៃការកែប្រែដែរ ព្រោះក្នុងឯកសារ មាននិយាយពីលក្ខខណ្ឌ ឲ្យកែអ្វីខ្លះៗ ជាចំនុចមួយក្នុងគោលការណ៍របស់ខេត្តហ្នឹង»។
យ៉ាងនេះក្ដី កន្លងមក ប្រជាពលរដ្ឋនៅជុំវិញគំនរសំរាម របស់ក្រុមហ៊ុននោះ បានប្ដឹងអតីតអភិបាលខេត្ដ លោក ស៊ូ ភិរិន្ទ ឲ្យជួយអន្ដរគមន៍ ប្ដូរទីតាំងកន្លែងស្ដុកសំរាមបណ្ដោះសាសន្ននេះ ជាបន្ដបន្ទាប់ ប៉ុន្ដែអាជ្ញាធរពុំចាត់វិធានការជួយប្រជាពលរដ្ឋបានឡើយ៕
No comments:
Post a Comment