World Bank៖ អត្រា​ភាពក្រីក្រ ​នៅ​កម្ពុជា ក្នុង​រយៈពេល ​៧​ឆ្នាំ ធ្លាក់ចុះ​ ជា​ង​ពាក់កណ្តាល​​

សៀវភៅវាយតម្លៃភាពក្រីក្រនៅកម្ពុជាឆ្នាំ២០១៣ បោះពុម្ភដោយធនាគារពិភពលោក (រូបថត៖ តាំង វីដា)

អត្រាភាពក្រីក្រនៅកម្ពុជា ឆ្នាំ២០០៤-២០១១ គិតជាភាគរយ

បញ្ជាក់៖ សម្រាប់ឆ្នាំ២០០៥ និងឆ្នាំ២០០៦ ស្ថិតក្នុងចន្លោះពី 53.2% ដល់50.1%

2011

20.5

53.2

2004

null

2005

null

2006

50.1

2007

38.8

2008

23.9

2009

22.1

2010

20.5

2011

ក្រាហ្វិចអត្រាភាពក្រីក្រនៅកម្ពុជា (ដោយ តាំង វីដា)

World Bank៖ អត្រា​ភាពក្រីក្រ ​នៅ​កម្ពុជា ក្នុង​រយៈពេល ​៧​ឆ្នាំ ធ្លាក់ចុះ​ ជា​ង​ពាក់កណ្តាល​​

ដោយ៖​ តាំង វីដា​ / វីអូឌី | ថ្ងៃព្រហស្បតិ៍ ទី20 ខែកុម្ភៈ ឆ្នាំ2014

ធនាគារពិភពលោក (World Bank) នៅ​ថ្ងៃ​ព្រហស្បតិ៍​នេះ ផ្សព្វផ្សាយ​របាយការណ៍​ថ្មី​មួយ ដោយ​រកឃើញថា អត្រា​ភាពក្រីក្រ​នៅ​កម្ពុជា ក្នុង​រយៈពេល ៧​ឆ្នាំ គិត​ចាប់ពី​ឆ្នាំ​២០០៤ បាន​ធ្លាក់ចុះ​ជាង​ពាក់កណ្តាល ដែល​នាំ​ឲ្យ​កម្ពុជា ក្លាយជា​ប្រទេស​កាត់បន្ថយ​ភាពក្រីក្រ​ល្អ​ជាងគេ​មួយ ក្នុងចំណោម​ប្រទេស​ដទៃ​ទៀត​។​

​របាយការណ៍​វាយតម្លៃ​ភាពក្រីក្រ​នៅ​កម្ពុជា ប្រចាំឆ្នាំ​២០១៣ ដែល​ត្រូវបាន​ដាក់​បង្ហាញ​ក្នុង​សិក្ខាសាលា​ផ្សព្វផ្សាយ​របាយការណ៍​រួម រវាង​រដ្ឋាភិបាល​កម្ពុ​ជា និង​ធនាគារ​ពិភពលោក នៅ​ថ្ងៃ​ទី​២០ ខែ​កុម្ភៈ​នេះ បង្ហាញថា អត្រា​ភាពក្រីក្រ​នៅ​កម្ពុជា ត្រូវ​បាន​ធ្លាក់ចុះ​យ៉ាងគំហុក ពី ៥៣,២% នៅ​ឆ្នាំ​២០០៤ មក​ត្រឹម ២០,៥% នៅ​ឆ្នាំ​២០១១ ដែល​ជា​ហេតុ​ធ្វើឲ្យ​កម្ពុជា ជាប់​ចំណាត់ថ្នាក់​លេខ ៤ ក្នុងនាម​ជា​ប្រទេស​ដែល​កាត់បន្ថយ​ភាពក្រីក្រ​ល្អ​ជាងគេ ក្នុង​ពិភពលោក​។ ក្នុងន័យនេះ ប្រជាពលរដ្ឋ​ក្រីក្រ​ចំនួន ៧​លាន​នាក់ ក្នុង​ឆ្នាំ​២០០៤ ត្រូវបាន​កាត់បន្ថយ​ម​ក​ត្រឹម ៣​លាន​នាក់ ក្នុង​ឆ្នាំ​២០១១​។​

រដ្ឋមន្ត្រីក្រសួង​សេដ្ឋកិច្ច ហិរញ្ញវត្ថុ និង​ជា​ប្រធាន​គណៈកម្មាធិការ​គោលនយោបាយ​សេដ្ឋកិច្ច និង​ហិរញ្ញវត្ថុ​រាជរដ្ឋាភិបាល​កម្ពុជា លោក គាត ឈ​ន់ មានប្រសាសន៍ថា នេះ​ជា​ភាពជោគជ័យ​មួយ​សម្រាប់​កម្ពុជា ដែល​ស្រប​តាម​យុទ្ធសាស្ត្រ អភិវឌ្ឍន៍​សហស្សវត្សរ៍ ក្នុង​កាត់បន្ថយ​ភាពក្រីក្រ ដែល​បាន​កំណត់​យ៉ាងហោចណាស់​១% ក្នុង​១​ឆ្នាំ​ ៖ «ជាជោគជ័យ ព្រោះយើងឃើញយុទ្ធសាស្ត្រ ដើម្បីកាត់បន្ថយភាពក្រីក្រ ឲ្យបានជាង១ភាគរយ ក្នុង១ឆ្នាំ ឥលូវបានលឿន ឥលូវនេះ»។

​របាយការណ៍​ដដែល​នេះ ឲ្យដឹង​ដែរថា កត្តា​៤ ដែល​ជំរុញ​ឲ្យ​ប្រជាពលរដ្ឋ​ចាក​ផុត​ពី​ភាពក្រីក្រ ក្នុងនោះ​មាន ការបង្កើន​តម្លៃ​ស្រូវ កំណើន​អត្រា​ថ្លៃឈ្នួល​ពលកម្ម​នៅ​តាម​ទីជនបទ ការកើនឡើង​នូវ​ការងារ​ដែល​មាន​ប្រាក់​បៀវត្ស​នៅ​តាម​ទីប្រជុំជន និង​កំណើន​ប្រាក់​ចំណូល​ពី​ការប្រកប​របរ​ជំនួញ​តូចតាច​។​

ប្រធាន​គ្រប់គ្រង​ប្រចាំ​ប្រទេស​នៃ​ធនាគារ​ពិភពលោក លោក អា​ឡា​សាន សូ ឲ្យដឹង​ដែរថា ទោះបីជា​កំនើន​ជីវភាព​កើនឡើង​ក្តី តែ​កម្ពុជា នៅ​មិនទាន់​ចាក​ឆ្ងាយ​ពី​ភាពក្រីក្រ​នៅឡើយ​ទេ ដែល​បណ្តាល​មក ពី​ការប្រែប្រួល​នៃ​បំណងប្រាថ្នា និង​តម្រូវការ​របស់​ប្រជាពលរដ្ឋ​សម្រាប់​ការរស់នៅ​ប្រចាំថ្ងៃ ដែល​នាំ​ឲ្យ​កត្តា​ទាំងនេះ កា្លយ​ជា​បញ្ហា​ប្រឈម និង​ជា​ហានិភ័យ​ខ្ពស់​ក្នុងការ​ធ្លាក់​ចូលទៅក្នុង​ភាពក្រីក្រ​វិញ​។​

​អ្នកស្រាវជ្រាវ​ឯករាជ្យ​ពី​ការអភិវឌ្ឍ​សង្គម លោក កែម ឡី យល់ថា របាយការណ៍​នេះ មិន​បាន​ឆ្លុះបញ្ចាំង​ពី​ទិដ្ឋភាព​ជាក់ស្តែង​ទាំងស្រុង​ទេ ដោយសារ​ទិន្នន័យ​ដែល​វិភាគ គឺ​មិន​ស្រប​បច្ចុប្បន្នភាព ហើយ​កម្រិត​អតិផរណា ចំណូល​ប្រចាំថ្ងៃ ១,២៥​ដុល្លារ គឺ​មិន​ស្រប​នឹង​ទីផ្សារ​នោះឡើយ​។ លោក​ថា ឧបសគ្គ ចំពោះ​ការកាត់បន្ថយ​ភាពក្រីក្រ​នៅ​កម្ពុជា គឺ​អំពើពុករលួយ ការដឹកនាំ​បែប​បក្ខពួកនិយម ដែល​នាំ​ឲ្យ​ផលចំណេញ មិន​ត្រូវបាន​បែងចែក​ដល់​ប្រជាពលរដ្ឋ ដែល​ស្ថិត​ក្រោម​បន្ទាត់​ក្រីក្រ​ ៖ « របៀបបែងចែកផលប្រយោជន៍ចេញពីការអភិវឌ្ឍន៍សេដ្ឋកិច្ចនេះ អត់បានល្អ ដោយសារ​តែ​មាន​អំពើ​ពុក​រលួយ​ខ្ពស់ ដោយសារតែមានអំណាចប្រមូលផ្តុំ ហើយវប្បធម៌នយោបាយ ជាវប្បធម៌នយោបាយគ្រួសារនិយម family affair នៅតាមក្រសួងនីមួយៗ អញ្ចឹង វាធ្វើឲ្យគំលាតអ្នកមានអ្នកក្រច្រើន»​។

​កាលពី​ថ្ងៃ​ទី​៦ ខែ​ធ្នូ ប្រមុខ​រដ្ឋាភិបាល​កម្ពុ​ជា លោក ហ៊ុន សែន បាន​ចេញ​សារលិខិត​មួយ​ដោយ​ថា ឧបសគ្គ​នៃ​ការអភិវឌ្ឍន៍​គោលដៅ​កំណើនសេដ្ឋកិច្ច និង​យុទ្ធសាស្ត្រ​កាត់បន្ថយ​ភាពក្រីក្រ​នៅ​កម្ពុជា គឺ​ចោទ​លើ​អំពើពុករលួយ ដោយ​លោក​ជំរុញ​ឲ្យ​អង្គភាព​ប្រឆាំង​អំពើពុករលួយ ធ្វើ​សកម្មភាព​ដោយ​ឯករាជ្យ ទប់ស្កាត់​អំពើ​ពុករលួយ ដោយ​មាន​ការចូលរួម​យ៉ាង​សកម្ម​ពី​ភាគី​ពាក់ព័ន្ធ ព្រមទាំង​រៀបចំ​ខ្លឹមសារ​មេរៀន​ប្រឆាំង​អំពើពុករលួយ ដាក់បញ្ចូល​ទៅក្នុង​កម្មវិធីសិក្សា​របស់​សិស្ស និស្សិត​ទៀតផង ក្នុង​គោលដៅ​រួម​ដើម្បី​កាត់បន្ថយ​ភាពក្រីក្រ​៕