ក្រុមប្រជាសហគមន៍បុរីកីឡា កំពុងឈរកាន់បដាទាមទាររកយុត្តិធម៌ដល់ពួកគេ(រួបភាព៖ ជន ស្រីណុច)
អ្នកបុរីកីឡា និងបឹងកក់ ទាមទារ ឲ្យតុលាការ ដោះស្រាយបណ្តឹង ករណីអាជ្ញាធរ ប្រើហិង្សា លើពួកគេ
ដោយ៖ ជន ស្រីណុច / វីអូឌី | ថ្ងៃពុធ ទី19 ខែមិនា ឆ្នាំ2014
ប្រជាសហគមន៍បុរីកីឡា និងបឹងកក់ ប្រមាណជិត១០០នាក់ នៅព្រឹកថ្ងៃពុធនេះ ប្រមូលផ្តុំគ្នានៅសាលាដំបូងរាជធានីភ្នំពេញ ទាមទារឲ្យតុលាការពន្លឿនដោះស្រាយបណ្តឹងរបស់ពួកគេ ដែលប្ដឹង ក្រុមហ៊ុន ផាន អ៊ីមិច ពីបទឧក្រិដ្ឋប្រើកម្លាំងប្រដាប់អាវុធបណ្ដេញប្រជាពលរដ្ឋចេញពីលំនៅដ្ឋានទាំងបង្ខំ និងប្តឹងអាជ្ញាធរខណ្ឌ៧មករា ពីបទប្រើហិង្សាលើប្រជាសហគមន៍បុរីកីឡា ជាពិសេសស្ត្រីមានផ្ទៃពោះ កាលពីថ្ងៃ១៤ ខែកុម្ភៈ។
កាលពីថ្ងៃទី១៤ ខែកុម្ភៈ អ្នកមានជម្លោះដីធ្លី នៅអតីតសហគមន៍បុរីកីឡា ៧នាក់រងរបួស ដែលមានទាំងស្ត្រីមានផ្ទៃពោះផង ក្រោយអាជ្ញាធរវាយបណ្តេញឲ្យចេញពីអាគារទី៩ របស់ក្រុមហ៊ុនផានអ៊ីមិច ដែលសង់លើដីកំពុងមានជម្លោះ។
អ្នកស្រីឆាយ គឹមហ៊ន តំណាងពលរដ្ឋរងគ្រោះដីធ្លីបុរីកីឡា រៀបរាប់នៅមុខតុលាការថា ការប្រមូលផ្តុំនៅថ្ងៃនេះ គឺទាមទារឲ្យតុលាការពន្លឿនការដោះស្រាយលើបណ្តឹងរបស់ពួកគាត់ ដែលប្តឹងអាជ្ញាធរខណ្ឌ៧មករា ដែលប្រើហិង្សាលើពួកគាត់ និងទាមទារឲ្យតុលាការដោះស្រាយបណ្តឹងរបស់ពួកគាត់ដែលប្តឹង អ្នកស្រី ស៊ុយ ស៊ីផាន ម្ចាស់ក្រុមហ៊ុនផានអ៊ីម៉ិច ដែលរំលោភយកដីរបស់ពួកគាត់។
អ្នកស្រីបន្តថា បច្ចុបន្នប្រជាពលរដ្ឋរងគ្រោះនៅបុរីកីឡា ជួបទុក្ខលំបាកយ៉ាងខ្លាំង បន្ទាប់ពីក្រុមហ៊ុនឈួសឆាយដីធ្លី និងរងនូវការវាយដំពីអាជ្ញាធរ «ខ្ញុំយល់ថាតុលាការឥតមាន ភាពឯករាជ្យសំរាប់ពួកខ្ញុំទេ ដូចខ្ញុំបានជំរាបពីមុនអញ្ចិង ដូចជាពាក្យបណ្តឹងដែលខ្ញុំធ្លាប់ដាក់ជូនគាត់ រឿងសំនុំរឿង រដ្ឋប្បវេណី រឿងលផ្ទះសំដែង របស់នាង ខ្ញុំអញ្ចិង មកដល់២ឆ្នាំនេះមិនដែលកោះហៅ អ្នកស្រី ស៊ុយ ស៊ីផាន មកជួបឬមកបំភ្លឺ អីហេណាស់ កោះហៅបានពួកបងបាន តែ៥នាក់គត់ ហើយបានតែ៥ដងគត់ គឺឈប់រហូត មកដល់ពេលនេះ អញ្ចិងនៅក្នុងថ្ងៃនេះគឺបងផ្តោត ទាំងអស់គឺសំនុំរឿងព្រហ្មទណ្ឌពីឆ្នាំ ២០១២ និងសំនុំរឿងពីឆ្នាំ ២០១២ នេះដែល រឿង រដ្ឋប្បវេណី និងព្រហ្មទណ្ឌ ហើយនិងរឿង នៅថ្ងៃ១៤ កុម្ភះនេះ»។
អ្នកស្រីឆាយ គឹមហ៊ន តំណាងពលរដ្ឋរងគ្រោះដីធ្លីបុរីកីឡា
សកម្មជនដីធ្លីនៅតំបន់បឹងកក់អ្នកស្រី ទេព វន្នី ដែលចូលរួមជាមួយអ្នកបុរីកីឡាដែរនោះ បានរិះគន់រដ្ឋាភិបាលកម្ពុជា ក៏ដូចជាប្រព័ន្ធតុលាការ សព្វថ្ងៃមិនឯករាជ្យ ធ្វើការបម្រើតែអ្នកមានលុយ និងអ្នកមានអំណាច ហើយនាំគ្នាធ្វើបាបប្រជាពលរដ្ឋក្រីក្រស្លូតត្រង់ «ពួកយើងឃើញថា ប្រទេសកម្ពុជាយើងបានចុះស្ថាប័ន ជាមួយនិងអន្តរជាតិ ក៏ដូចជា សន្ធិសញ្ញានៅទីក្រុងបារីស ធានាខុសត្រូវ លើអាយុជីវិតរបស់ប្រជាពលរដ្ឋ បើស្ថិតនៅប្រទេសមួយដែលមានសន្តិសុខ និងគោរពសិទ្ធមនុស្ស និងលទ្ធិប្រជាធិតេយ្យពិតប្រាកដ ប៉ុន្តែបច្ចុប្បន្ននេះរដ្ឋាភិបាល កំពុងតែប្រើប្រាស់ នៅអំពើពុករលួយ សំលាប់ប្រជាពលរដ្ឋខ្លួនឯងទាំងប្រយោល ហើយធ្វើឲ្យពួកយើង មានការឈឺចាប់ជាទីបំផុត គឺពិបាកជាយើងស្លាប់ភ្លាមៗទៅទៀត»។
ប្រធានលេខាធិការដ្ឋានក្រុមការងារពិសេសនៃសិទ្ធិលំនៅដ្ឋានលោក សៀរ ភារម្យ មានប្រសាសន៍ថា ការទាមទាររបស់ពលរដ្ឋគឺជាការត្រឹមត្រូវ ផ្ទុយទៅវិញតុលាការ ដែលត្រូវឈរលើគោលការណ៍ឯករាជ្យនោះ បែរជាមិនព្រមដោះស្រាយបញ្ហា និងផ្តល់យុត្តិធម៌ឲ្យប្រជាពលរដ្ឋរងគ្រោះទេ។
លោកជំរុញឲ្យតុលាការចាត់ការលើក្រុមសមត្ថកិច្ចដែលបានប្រើហិង្សាទៅលើប្រជាពលរដ្ឋបុរីកីឡា ពិសេសស្ត្រីមានផ្ទៃពោះ ឲ្យបានឆាប់រហ័ស «សមត្ថកិច្ចគេមិនមែន បើកប្រាក់ខែឲ្យគាត់ តឹងផ្កាយតម្លែងស័ក ដើម្បីទៅវាយស្ត្រីទេបាទ ដូច្នេះហើយ នៅពេលដែលអ្នកទាំងអស់និងគាត់ស្លៀកពាក់ឯកសណ្ឋាន ដែលមានការទទួលស្គាល់ពីអាជ្ញាធររដ្ឋ អញ្ចិងគឺនៅពេលណាដែលគាត់ប្រើអំពើហង្សារ ទៅលើស្ត្រី ទៅលើអីអញ្ចិងគឺ លើកុមារអញ្ចិងគឺ ត្រូវតែតុលាការចាត់វិធានការភ្លាម មិនបាច់ចាំដល់ប្រជាពលរដ្ឋទៅ ពាក្យបណ្តឹងទេបាទ»។
បន្ទាប់ពីអនុញ្ញាតឲ្យតំណាងសហគមន៍បុរីកីឡា៤នាក់ ចូលជួបប្រហែល១ម៉ោង ក្រឡាបញ្ជីសាលាដំបូងរាជធានី ដែលអ្នកស្រីឆាយ គឹមហ៊ន ប្រាប់VODថា ឈ្មោះ ខា បានសន្យាថា ខ្លួននឹងព្យាយាមដោះស្រាយឲ្យពលរដ្ឋ ដោយសុំទុកពេល៣សប្តាហ៍សិន។
ប៉ុន្តែក្រឡាបញ្ជីរូបនោះអះអាងថា លោកទើបតែទទួលបានពាក្យបណ្ដឹងនៅថ្ងៃនេះ។ លោកថា តុលាការនឹងកោះហៅភាគីទាំងសងខាងចូលមកបំភ្លឺនៅតុលាការ ដើម្បីដោះស្រាយទំនាស់។
ទោះយ៉ាងណា ការប្រមូលផ្តុំនៅព្រឹកនេះ គេពុំឃើញមានសមត្ថកិច្ច និងសន្តិសុខសាលារាជធានីភ្នំពេញ ដាក់ពង្រាយការពារ ឬបំបែកនោះទេ៕ ដោយ ជន ស្រីណុច
No comments:
Post a Comment