ពលរដ្ឋ នៅបន្ទាយមានជ័យ គ្រោងដង្ហែក្បួន យកសំណុំរឿង ដីធ្លី ដាក់ជូន អាជ្ញាធរ
ដោយ សួន សុផលមុន្នី / អាស៊ីសេរី | ១៧ មីនា ២០១៤
អ្នកភូមិ ៤៥នាក់ តំណាងឲ្យប្រជាពលរដ្ឋជិត ២ពាន់គ្រួសារដែលជាអ្នកមានករណីជម្លោះដីធ្លីគ្រោងនាំគ្នាដង្ហែ ក្បួនដោយនាំយកសំណុំរឿងជម្លោះដីធ្លីរ៉ាំរ៉ៃចំនួន ១៨ពាក្យបណ្ដឹងដាក់ជូនអាជ្ញាធរខេត្តបន្ទាយមានជ័យ ដើម្បីពន្លឿនការដោះស្រាយ។ រយៈពេលចុងក្រោយនេះ ករណីទំនាស់ដីធ្លីក្នុងខេត្តបន្ទាយមានជ័យ បានកម្រើកឡើងវិញ គួរឲ្យមានការព្រួយបារម្ភ។
តំណាងអ្នកភូមិជាច្រើនគ្រោងឡើងទៅជួបជុំគ្នានៅទីស្នាក់ការសមាគមអាដហុក បន្ទាប់មកនាំគ្នាដង្ហែក្បួននាំយកពាក្យបណ្ដឹងលើករណីដីធ្លីចំនួន ១៨ សំណុំរឿងដែលមានប្រជាពលរដ្ឋរងគ្រោះចំនួនជិត ២.០០០គ្រួសារដាក់ជូនទៅសាលាខេត្តបន្ទាយមានជ័យ ឲ្យពន្លឿនការដោះស្រាយនៅថ្ងៃទី១៩ ខែមីនា ឆ្នាំ២០១៤។
លិខិតជូនដំណឹងរបស់សមាគមអាដហុក ដែលបានដាក់ជូនសាលាខេត្តបន្ទាយមានជ័យ កាលពីថ្ងៃទី១៧ ខែមករា ឆ្នាំ២០១៤ បញ្ជាក់ថា នៅក្នុងខេត្តបន្ទាយមានជ័យ មានករណីទំនាស់ដីធ្លីជាច្រើនករណីមិនទាន់ដោះស្រាយ ហើយបានអូសបន្លាយជាច្រើនឆ្នាំ។
លោក ស៊ុំ ចន្ទគា មន្ត្រីសមាគមអាដហុក បញ្ជាក់បន្ថែមថា ករណីទំនាស់ដីធ្លីរ៉ាំរ៉ៃនេះ បានធ្វើឲ្យមានផលប៉ះពាល់មិនល្អទៅលើប្រជាពលរដ្ឋ៖ «លិខិតជូនដំណឹងរបស់យើងមិនមែនធ្វើឡើងប៉ះពាល់ដល់ខេត្តទេ ឬក៏ធ្វើឲ្យប៉ះពាល់លើគណបក្សនយោបាយ យើងធ្វើឲ្យប្រជាពលរដ្ឋបានយល់ដឹង ទី១ អោយប្រជាពលរដ្ឋហ្នឹងរត់ទៅរកអាជ្ញាធរ ទី២ យើងសុំឲ្យអាជ្ញាធរដែលបម្រើប្រជាពលរដ្ឋហ្នឹង ចាប់ផ្ដើមយកចិត្តទុកដាក់នឹងធ្វើការជូនពួកគាត់ឲ្យទាន់ពេលវេលា។ ករណីដីធ្លីហ្នឹងហើយដែលធ្វើឲ្យប្រជាពលរដ្ឋហ្នឹងមានស្ថានភាពក្រីក្រនិងធ្វើចំណាកស្រុក»។
ឆ្លើយតបចំពោះករណីនេះ អភិបាលខេត្តបន្ទាយមានជ័យ លោក គោ ស៊ុំសារឿត ស្នើឲ្យប្រជាពលរដ្ឋគួរនាំគ្នាគោរពច្បាប់ ចៀសវាងការនាំគ្នាចូលទៅរំលោភបំពានកាន់កាប់ដីរបស់រដ្ឋ។ លោកបញ្ជាក់ថា តាមការសិក្សា ប្រជាពលរដ្ឋមួយចំនួនបានរងគ្រោះក្នុងករណីដីធ្លីដោយសារក្រុមមេខ្យល់ជាអ្នកញុះញង់។ ក្រុមជនខិលខូចខ្លះបានទទួលយកលុយកាក់ជាថ្នូរនឹងការលក់ដី តែក្រោយមករកដីឲ្យគេពុំបាន ក៏បង្កើតជាចលនាញុះញង់ឲ្យប្រជាពលរដ្ឋនាំគ្នាចូលទៅរំលោភបំពានកាន់កាប់ដីធ្លីខុសច្បាប់។ ទោះយ៉ាងនេះក្ដី អាជ្ញាធរខេត្តកំពុងខិតខំដោះស្រាយលើករណីទំនាស់ដីធ្លីនេះជាបន្តបន្ទាប់។
លោក គោ ស៊ុំសារឿត៖ «ខ្ញុំមិនបន្ទោសអីទេចំពោះអាដហុក គាត់ជាអង្គការមួយដែលថា ចង់បានសេរីភាពបញ្ចេញមតិ គាត់ត្រូវតែជួយធ្វើហើយ ក៏ប៉ុន្តែយើងក៏ត្រូវស្ដាប់អាជ្ញាធរ អាជ្ញាធរមានច្បាប់មានទម្លាប់ស្អីឲ្យសម្របសម្រួលគ្នាពាក្យបណ្ដឹងប្រជាពលរដ្ឋមកយើងខំចាត់ការទាំងអស់ មិនដែលទុកចោលទេ»។
យ៉ាងណាក៏ដោយនៅក្នុងលិខិតជូនដំណឹងរបស់សមាគមអាដហុក បានបញ្ជាក់ ៥ចំណុចចំពោះគោលបំណងដែលនាំឲ្យប្រជាពលរដ្ឋដង្ហែក្បួនដាក់សំណុំរឿងដីធ្លីចាស់ទៅសាលាខេត្ត។ បំណងសំខាន់ទាំងនោះមានពាក់ព័ន្ធទៅនឹងការអប់រំប្រជាពលរដ្ឋឲ្យយល់ដឹងពីនីតិវិធីដាក់ពាក្យបណ្ដឹងលើករណីទំនាស់ដីធ្លីទៅស្ថាប័នមានសមត្ថកិច្ចនានា របស់សាលាខេត្តបន្ទាយមានជ័យ និងជំរុញឲ្យប្រជាពលរដ្ឋចេះគោរពច្បាប់បញ្ឈប់ការប្រើហិង្សាក្នុងករណីជម្លោះដីធ្លី។ បង្ហាញពីសំណុំរឿងដីធ្លីជាច្រើនករណី មិនទាន់ដោះស្រាយនិងពង្រឹងទំនាក់ទំនងរវាងប្រជាពលរដ្ឋនិងមន្ត្រីក្នុងមុខងារសាធារណៈ ដើម្បីឈានទៅដល់ការបង្កើតនូវវប្បធម៌នៃការទំនាក់ទំនងល្អរវាងអាជ្ញាធរ និងប្រជាពលរដ្ឋដែលកំពុងជួបប្រទះបញ្ហាដីធ្លី៕
No comments:
Post a Comment